Vrafta ta zlahu 12

Vli ŋa tsəlɓu ŋa Yawe

1 « Wya skwiha ta raku ka magay, nda zlahuha dzaʼa kuni ŋanata nda ma maga slna nda tsi ma haɗik ya vlaghuna Yawe, Lazglafta dzidzíha ghuni ŋa ŋa ghuni ma inda nzakwa ghuni ta haɗik.

2 Ka zaɗanata kuni tendərzleleʼ ta inda vliha ta tsəlɓu tsa mndəra mnduha dzaʼa ghəzlafta kuni ya ta tsəlɓu ŋa lazglaftaha taŋ, ta ghwáha nda slara nda slara, nda ya ta kuɗuŋurha, nda ya mataba həga fuha. 3 Ka zlazliŋta kuni ta gwirha taŋ, pasliŋta kuni ta dzagwatá palaha skwa wuyay taŋ, dariŋ kuni nda vu ta udzuha Asera skwa wuyay taŋ, dzaɓiŋha kuni ta tsatsatá lazglaftaha taŋ. Mantsa ya dzaʼa zaɗanata kuni ta hga tsa skwiha ya ma tsa vliha ya. 4 Yaha kuni da tsəlɓu ŋa Yawe, Lazglafta ghuni, manda ya ta mag tsa mnduha ŋa skwa wuyayha taŋ ya. 5 Ama ka dzaʼa kuni da tsəlɓu ŋa ni ma vli ya dzaʼa zbafta Yawe, Lazglafta ghuni mataba inda mndəra ghuni, ŋa fata hga ni, ka nzata ni hada. Hada da dzaʼa kuni. 6 Hada dzaʼa hladaghata kuni ta skwa pla ghəŋ ghuni ŋa dray tsuh tsuh, nda sanlaha ma pla ghəŋha ghuni, nda zaka ghuni, nda mbəhuha ghuni ta klapta kuni, nda mbəhuha ŋa hɗamtá skwi waɗa kuni, ka ya ta vlata kuni nda kumay ŋuɗufa ghuni a tsi, nda taŋtaŋa yakwa slaha ghuni, nda rina fisika ghuni. 7 Hada ta kəma Yawe, Lazglafta ghuni dzaʼa za kuni ta skwa zaya rfu kawadaga nda la ga ghuni, ka rfay ghuni ta magatá inda slna dzva ghuni, kabga tfaghunagha tfa Yawe, Lazglafta ghuni ta wi.

8 Magta a kuni manda na ta mag mu gitana, ta mag dər wa ta skwi ta zɗəganata na wu, 9 kabga ta ɓhadagha a kuni da tsa vla mbiʼa vgha ya wu, ta mutsaf a kuni ta skwa za həga ghuni ya vlaghuna Yawe, Lazglafta ghuni ya karaku wa. 10 Ama ka tsughwaɗap tsughwaɗa kuni ta Yardeŋ, ka nzata ta tsa haɗik ya vlaghuna Yawe, Lazglafta ghuni ka skwa za həga ghuni ya, dzaʼa vlaghuna vla ta mbiʼa vgha da ghumaha ghuni ta waghunafta, ŋa nzay ghuni ta nzakw ləŋləŋ. 11 Tahula tsa, dzaʼa zbapta Yawe, Lazglafta ghuni ta vli ŋa nzakwa hga ni, hada dzaʼa hladaghata kuni ta inda skwiha ya mnaghunaf yu: Tsaya skwi ŋa pla ghəŋ ghuni ŋa dray tsuh tsuh, nda sanlaha ma pla ghəŋha ghuni, nda zaka ghuni, nda mbəhuha ghuni ta klapta kuni, nda mbəhuha ta zbapta kuni ŋa vlaŋta Yawe ŋa hɗamtá skwi waɗana kuni. 12 Dzaʼa nzakway kuni ma rfu ta kəma Yawe, Lazglafta ghuni, kaghuni, nda zwana ghuni, nda kwagha ghuni, nda kwalvaha ghuni, nda kurɗuha ghuni. Mantsa ya la Levi ta nzakw ma luwaha ghuni guli, kabga haɗ mayaka hahəŋ ma za həga kawadaga nda kaghuni wa. 13 Ɗaswa ka kuni, yaha kuni da pla ghəŋ ŋa dray tsuh tsuh ma gima vli dzaʼa nghaŋta kuni. 14 Ma vli ya dzaʼa zbapta Yawe kweŋkweŋ, ma ya turtuk ma mndəra ghuni dzaʼa pla kuni ta ghəŋ ŋa dray tsuh tsuh. Hada dzaʼa maga kuni ta inda skwi ya mnaghunaf yu.

15 Nziya nza tsi, laviŋ lava kuni ta ghwanaftá skwi nda səla manda ya ta kum kuni ma inda luwaha ghuni ka za sluʼa ni, taɓta ta tfa wi ya tfaghunagha Yawe, Lazglafta ghuni ta vlaghunata. Laviŋ lava mndu nda skwa tsaɗa tida nda ya kul haɗ skwa tsaɗa tida ta zay manda ya ta zə lu ta madva nda ghadigir. 16 Ba us yeya dzaʼa kwal kuni zay, ta haɗik dzaʼa mbəziŋta kuni manda imi. 17 Laviŋ a kuni ta zay ma luwa ghuni ta zaka nimaya ghuni, nda ŋa ima inabi ta ka nuni, nda ŋa rɗi, dər taŋtaŋa yakwa sla ghuni nda rina fisika ghuni, dər inda mbəhuha vla lu ka ŋa hɗamtá skwi waɗa lu a tsi, dər mbəhuha nda kumay ŋuɗuf, dər mbəhuha ghuni ta klapta kuni. 18 Ta kəma Yawe, Lazglafta ghuni kweŋkweŋ dzaʼa za kuni, ma vli ya dzaʼa zbap Yawe, Lazglafta ghuni. Ka za kuni kawadaga nda zwana ghuni, nda kwagha ghuni, nda kwalvaha ghuni, nda kurɗuha ghuni, nda mnda la Levi ma luwaha ghuni. Ka rfa kuni ta rfu ta kəma Yawe, Lazglafta ghuni ta ghəŋa inda slna maga kuni nda dzva ghuni. 19 Ama ɗaswa ka kuni da zanaptá kuni ta la Levi ma inda nzakwa ghuni ta haɗika ghuni.

20 Ma sganaghata dzaʼa sganaghata Yawe, Lazglafta ghuni ta kwakwara ghuni, manda ya taghunaf tsi ta imi ta sləməŋ ya, ka ksaghunaf ksa mamaya sluʼi, ta kumay kuni ta za sluʼi, laviŋ lava kuni ta zay manda ya kumaŋ kuni. 21 Ka si diʼiŋ tsa vli zbap Yawe, Lazglafta ghuni ŋa fatá hga ni ya nda kaghuni katsi, dzaʼa laviŋ lava kuni ta ghwanaftá sla ghuni ka rina fisika ghuni a tsi ya vlaghuna Yawe, ka magata ghuni manda ya mnaghunaf yu, ka zay ghuni ma luwaha ghuni manda ya ta kum kuni. 22 Laviŋ lava mndu nda skwa tsaɗa tida nda ya kul haɗ skwa tsaɗa tida ta zay, nda nza manda ya ta zə lu ta madva nda ghadigir. 23 Ba us yeya dzaʼa kwal kuni zay, kabga us ná, hafu ya. Zəta a kuni ta hafu kawadaga nda sluʼi wa. 24 Zəta a kuni ta us wu, ta haɗik dzaʼa mbəziŋta kuni manda imi. 25 Ma walaŋ kuni ta zay, kada nzata kuni ləŋləŋ, kaghuni nda zivirha ghuni tahula kaghuni, kabga magata ghuni ta skwi tɗukwata wa ira Yawe.

26 Ama mbəhuha nda ghuɓa, nda mbəhuha ŋa hɗamtá skwi waɗana kuni ya, ka hla kuni ta tsaha ya da vli ya dzaʼa zbapta Yawe. 27 Ka vlata kuni ta pla ghəŋa ghuni ŋa dray tsuh tsuh, sluʼa ni nda usa ni tani, ta gwira Yawe, Lazglafta ghuni. Usa hamata skwa pla ghəŋ ya ná, ta gwira Yawe, Lazglafta ghuni dzaʼa pghafta kuni, ama laviŋ lava kuni ta zutá luʼa ni.

28 Ŋanawa ŋa ta inda tsa gwaɗaha mnaghunaf yu ya, ka snata kuni mantsa ya, ka nzata kuni ləŋləŋ ŋa ɗekɗek, kaghuni nda zivirha ghuni tahula kaghuni, kabga magata ghuni ta skwi ɗina, nda skwi tɗukwata wa ira Yawe, Lazglafta ghuni. »

Tɗaŋtá sləməŋ ta ghəŋa skwa wuyay

29 « Hliŋta Yawe, Lazglafta ghuni ta kəma ghuni ta tsa mndəra mnduha ta tsa haɗik dzaʼa lam kuni klaghuta ŋa ŋa ghuni ya, ŋa klaghuta ghuni ŋa ŋa ghuni ŋa nzata ghuni ma haɗika taŋ. 30 Tahula zaɗanatá həŋ ta kəma ghuni ya, ɗaswa ka kuni dá dɗamtá kuni da dəɓəla ksa saɗa taŋ. Yaha kuni da zba snaŋta sana skwi ta ghəŋa lazglaftaha taŋ ŋa mnay kazlay na: “Si kinawu ka tsa mnduha ya si ta tsəlɓu ta kəma lazglaftaha taŋ ya kay na? Ka maga iʼi guli manda tsa ŋa taŋ ya” kəʼa. 31 Yaha kaghuni da magay manda tsa ŋa taŋ ya ŋa Yawe, Lazglafta ghuni, kabga inda manzakɗaway skwiha ta husaŋtá Yawe ya ná, tsaya ta mag həŋ ŋa lazglaftaha taŋ, ha ka dray taŋ ta zwana taŋ nda kwagha taŋ ta vu ŋa pla ghəŋ ŋa lazglaftaha taŋ.