13
1 Ŋanawa ŋa ka ksa kuni ta slna nda inda gwaɗaha ya mnaghunaf yu. Yaha kuni sganaghata, yaha kuni htanaghuta.ª »
Pyaftá tsəlɓu ŋa skwa wuyay
2 « Kawayaka skwi, mamu sana anabi ka sana mnda suni a tsi dzaʼa sliʼafta mataba ghuni da mnay kazlay, dzaʼa magaghuna maga yu ta ŋizla ka skwa mandərmimi a tsi, kəʼa. 3 Ka magatá tsa ŋizla ya, ka tsa mandərmimi si mnaghuna tsi ya a tsi, ka kaʼa mantsa: “Mbaɗma mista sanlaha ma lazglaftaha ŋa tsəlɓu ŋa taŋ,” kaʼa, tsa kul snaŋtá kuni ya, 4 yaha kuni sna gwaɗa tsa anabi, ka tsa mnda suni ya a tsi ya. Ya Yawe, Lazglafta ghuni ta dzəgha kaghuni manda tsaya, ŋa snaŋta kazlay ka ta ɗvu rí ɗva a kuni ta Yawe, Lazglafta ghuni ma hya hya ŋuɗufa ghuni, nda ya nda inda nzakwa ghuni kəʼa. 5 Mista Yawe, Lazglafta ghuni turtukwa ni dzaʼa kuni. Tsatsi dzaʼa kuni zləŋay, ka ŋanata zlahuha ni ya mnaghunaf tsi, lwa ni dzaʼa kuni da snay. Tsatsi dzaʼa tsəlɓu kuni ŋa ni, ta tsatsi dzaʼa ndiʼafta kuni ta vgha. 6 Ama tsa anabi, ka tsa mnda suni ya a tsi ya, dzaʼa dza dza lu, kabga gagaf gaga ta kaghuni ŋa ganavatá sidi ta Yawe, Lazglafta ghuni ta hlagaptá kaghuni ma haɗika Masar, ka varagaptá kaghuni ma ga vuʼa. Si ta kumay tsa mndu ya ta mbəɗiŋtá kaghuni ta tvi ŋa ksay ghuni ya mnaghunaf Yawe, Lazglafta ghuni. Mantsa ya dzaʼa kliŋta kuni ta tsa ghwaɗaka mndu ya mataba ghuni.
7 Ka lagha zwaŋama gha, zwaŋ ya ya ma gha, ka zwaŋa gha a tsi, ka makwa gha a tsi, ka markwa ghuni ta han ka ta ghuva nda tsi a tsi, ka gra gha tegeɗ tegeɗ a tsi, da mnaghata kɗekkɗek kazlay na: “Mbaɗa tsəlɓu ŋa sanlaha ma lazglaftaha” kəʼa, lazglaftaha ya kul snaŋta kaghuni, dər dzidzíha ghuni, 8 mataba lazglaftaha mnduha ta waghunafta, gwal ndusa ndusa nda gwal diʼiŋ diʼiŋ nda kaghuni ta wa kɗavakta haɗik ha təv sana kɗavakta haɗik, 9 yaha ka da snanata, yaha ka da fanatá sləməŋ, yaha ka da dzray nda tsi, yaha da ksaghata ka hiɗahiɗa, yaha ka bukwanata. 10 Katək ná, dzata gha. Tiŋəl vərɗa kagha nda dzva gha dzaʼa zlrafta wuɗata nda pala ŋa dzata. Tahula tsa, ka zlambata sanlaha ŋa dzata. 11 Ka zlambata kuni nda pala ha ka mtata ni, kabga psaŋ psa ta tsaghuta ghuni ta vgha nda Yawe, Lazglafta ghuni ta hlagaghunapta ma ga vuʼa ma haɗika Masar. 12 Mantsa ya dzaʼa snaŋta inda la Israʼila, ŋa zləŋay taŋ ta zləŋ, ŋa kwal magəgəlta tsa ghwaɗaka skwi ya mataba ghuni.
13 Ka lagha ghuni ka snaŋta ma ya turtuk ma luwaha ya vlaghuna Yawe, Lazglafta ghuni ŋa nzakwa ghuni mida ta mnay kazlay 14 mamu la falayha ta sliʼagapta mataba ghuni, ka baraghatá mnduha ma luwa nda mnay kazlay na: “Mbaɗma tsəlɓu ŋa sanlaha ma lazglaftaha,” lazglaftaha ya kul snaŋta kuni kəʼa, 15 ka ɗatsafta kuni dardar nda ma ɗaɗawapta. Ka si kahwathwata mamu tsa manzakɗaway ya mataba ghuni katsi, 16 ka pslata kuni ta inda mnduha ma tsa luwa ya nda kafay. Ka zaɗanata kuni nekwnekw ta həŋ nda inda skwiha ma tsa luwa ya tani nda rini tani nda kafay. 17 Ka tskanata kuni ma takataka dawadawa vli ta inda skwiha zləɗa kuni ma tsa luwa ya, ka driŋta tsa luwa ya nekwnekw nda vu kawadaga nda tsa skwiha zləɗa lu ya ŋa Yawe, Lazglafta ghuni. Dzaʼa nzakway tsa luwa ya ka ŋira kufik ŋa ɗekɗek, haɗ mndu dzaʼa walglaŋta bəglafta wa. 18 Yaha ka da faftá dzvu ta skwi nda fa ŋa zaɗanata nekwnekw, kada vrata gufatá ŋuɗufa Yawe, ŋa zɗaghunaŋta ni ta huɗi, ŋa tawata ni ta hiɗahiɗa ta kaghuni, ka yaghunafta manda ya waɗana tsi ta dzidzíha ghuni ya. 19 Dzaʼa magay mantsa ya, ka sna sna kaghuni ta lwa Yawe, Lazglafta ghuni, nda ma ŋanatá inda zlahuha ni ya mnaghunaf yu gita, nda ma maga skwi tɗukwata wa ira Yawe, Lazglafta ghuni. »