Skwi lmaf lu baɗ mtata mndu
14
1 « Nda nza kaghuni ka zwana Yawe, Lazglafta ghuni. Ka ta tawa mndu ta mtuta kuni, yaha kuni da kwaha vgha ghuni, yaha kuni da htsa swidi ta wa kuma ghuni. 2 Kaghuni ná, nda fa kuni ka ŋa Yawe, Lazglafta ghuni. Yawe ta psaptá kaghuni ŋa nzakwa ghuni ka mnduha ni, ŋa nzakwa ghuni nda sgit ta həŋ mataba inda mndəra mnduha ta ghəŋa haɗik. »Sluʼi ŋa zay nda ya ŋa kwal kul zay
3 « Yaha kuni da za dər wati ma skwi ka manzakɗaway. 4 Wya nimtak nda rini dzaʼa laviŋta kuni ta zay:
Sla, nda tuwak, nda gu, 5 nda ghadigir, nda madva, nda gidzala, nda gwa ghwá, nda mndəra sana gwa mtak, nda mndəra sana gidzala, nda tuwaka ghwá.
6 Inda skwi nda ta takuɗama ni ta lghaɗu, laviŋ lava kuni ta zay. 7 Ama mataba skwiha ta lghaɗu ka nda ta takuɗama taŋ a tsi ná, wya ya dzaʼa kwal kuni zay:
Ŋalibwa, nda vilakw, nda ksuɓi. Ta lghaɗu həŋ, ama ta a takuɗama taŋ wa. Nda nza həŋ ka skwi ta tsaɗ lu ka ŋa ghuni. 8 Zəta a kuni ta ghuvazu wa. Nda ta takuɗama ni, ama haɗ ta lghaɗu wa. Nda nza ka skwi ta tsaɗ lu ka ŋa ghuni.
Zəta a kuni ta sluʼa taŋ wu, ksaŋta a kuni ta mbla taŋ wa.
9 Mataba inda skwiha ma imi ma ghwa, laviŋ lava kuni ta za inda ya mamu zlər ta həŋ, mamu ŋulaŋ ta həŋ. 10 Ama yaha kuni da za ya kul haɗ zlər tida, kul haɗ ŋulaŋ tida. Nda nza tsaya ka skwi ta tsaɗ lu ka ŋa ghuni.
Dzala, nda guguzlum, nda guguzluma ŋəra, 13 nda bikwira dva, nda bikwira ŋəra nda mndəra taŋ, 14 nda inda zarakataghuvi nda mndəra taŋ, 15 nda zarwa, nda mbizim nda mndəra taŋ, nda mndəra sanlaha ma bikwir, 16 nda mbizima dva, mbizima wereh, nda mbizima ŋusliŋ, 17 nda mbizima bəghawa, nda kwila, nda mbizima imi, 18 nda zulum, nda mimtagu nda mndəra taŋ, nda watah, nda zvahw.
19 Inda zwana skwiha nda zlghəŋ ta həŋ ná, nda nza həŋ ka skwiha ta tsaɗ lu, yaha kuni da zay. 20 Ama dzaʼa laviŋ lava kuni ta za inda zwana skwiha kul tsaɗ lu, nda zlghəŋ ta həŋ.
21 Yaha kuni da za inda skwiha ta mtuta nda mta, kabga kaghuni ná, nda fa kuni ka ŋa Yawe, Lazglafta ghuni. Vlaŋwa vla ta mayəm ta nzakw ma səla ghuni ka za tsi, ka ta skwanapta nda skwa a kuni ta sanlaha ma matbayha.
Yaha kuni da damtá zwaŋa gu ma uʼa ma ni*. »
Zaka
22 « Ka hlapta kuni ta zaka ma inda skwi ta mutsafta kuni ta vwaha ghuni inda vaku. 23 Ta kəma Yawe, Lazglafta ghuni dzaʼa za kuni, ma vli ya dzaʼa tsi zbapta ŋa nzakwa hga ni, ta zaka nimaya ghuni, nda ŋa ima inabi ta ka nuni, nda ŋa rɗi, nda ŋa taŋtaŋa yakwa sla ghuni nda rina fisika ghuni. Mantsa ya dzaʼa tagha kuni ta zləŋa Yawe, Lazglafta ghuni inda fitik. 24 Ka si tfaghunagha tfa Yawe, Lazglafta ghuni ta wi nda skwi ŋulum, ka laviŋta a kuni ta kladaghatá zaka ghuni, kabga diʼiŋata vli zbap Yawe, Lazglafta ghuni ŋa nzakwa həga ni hada ya wu, 25 mbəɗapta ghuni ta tsa zaka ya ka tsedi, ka klafta kuni ma dzvu ka klay da tsa vli zbap Yawe, Lazglafta ghuni ya. 26 Hada, ka dzawata kuni ta inda skwi ta kum kuni nda tsa tsedi ya: Dər sla tsi, dər rina fisik tsi, dər ima inabi tsi, dər skwa say nda tawa tsi, ka dər wati ma skwi ta kum kuni a tsi. Hada dzaʼa za kuni ta skwa zaya rfu kawadaga nda la ga ghuni ta kəma Yawe, Lazglafta ghuni. 27 Ama yaha kuni da zanapta la Levi ta nzakw ma luwa ghuni, kabga haɗ mayaka hahəŋ ma za həga kawadaga nda kaghuni wa.
28 Ta inda kɗavakta mahkəna vaku, ka hlapta kuni ta inda zaka skwi ta tsa vaku ya, ka tskanata kuni ma luwa ghuni. 29 Tahula tsa, ŋa lagha la Levi, tsa hahəŋ kul mayaka taŋ ma za həga kawadaga nda kaghuni ya. Mantsa ya la mayəm ma səla ghuni, nda tawakri, nda wadgu ma luwa ghuni, ŋa lagha taŋ zay ka baghaku, kada tfaghunaghata Yawe, Lazglafta ghuni ta wi ta ghəŋa inda slna dzva ghuni. »