Zlahu ta ghəŋa vulu
20
1 « Ka sab sa kuni da gəmata nda vulu nda ghumaha ghuni, ka nghaŋtá kuni ta plisha, ka mwata plisha a tsi, dər malaghu mala ndəghata gwal vulu ka kaghuni, yaha kuni da zləŋa həŋ, kabga kawadaga Yawe, Lazglafta ghuni nda kaghuni, tsatsi ta hlagaghunapta ma haɗika Masar. 2 Ma fitika dzaʼa ghuni da gəmata nda vulu ya, ka gavadaghata mnda dra skwi ŋa Lazglafta, ka mnanata tsi ta mnduha ni. 3 Kaʼa dzaʼazlay na: “Snawa la Israʼila! Wana kuni dzaʼa gəmata nda vulu nda ghumaha ghuni gita. Yaha ŋuɗufa ghuni da tɗu. Yaha kuni da zləŋ, yaha kuni da tatamaku, yaha vgha ghuni da ghudzaku ta kəma taŋ, 4 kabga Yawe, Lazglafta ghuni ta mbaɗa kawadaga nda kaghuni ŋa gəmata nda vulu nda ghumaha ghuni ŋa mbaghunafta,*” kaʼa dzaʼazlay.5 Ka maliha ta ghəŋa mnduha dzaʼazlay mantsa: “Mamu mndu ta bafta həga ka lfiɗ ta kul gunanaftá tsi ra? Ka vra tsatsi dzagha, dá mtuta tsi ma vulu, dá lam sana mndu da gunanafta. 6 Mamu mndu, ŋaɓafta ni yeya ta vwaha inabi ta kul tsagatá tsi ta yakwa ni ra? Ka vra tsatsi dzagha, dá mtuta tsi ma vulu, dá ɗag sana mndu ta taŋtaŋa yakwa ni. 7 Mamu mndu ta dzugwa makwa ta kul klaftá tsi ra? Ka vra tsi dzagha, dá mtutá tsi ma vulu, dá klaftá sana mndu ta makwamidza ni.” 8 Ka maliha ta ghəŋa mnduha dzaʼa kɗaŋtá gwaɗa mantsa: “Mamu mndu ta zləŋ nda rwa vgha ni ra? Ka vra tsi dzagha, yaha dá ganaftá zləŋ ta zwana ma ni,” ka həŋ dzaʼazlay. 9 Manda kɗiŋta maliha ta ghəŋa mnduha ta tsa gwaɗa ya dzaʼazlay, ŋa zabapta taŋ ta maliha ta ghəŋa bakuha gwal vulu.
10 Ka ndusadagha ndusa kuni nda luwa ŋa liŋta nda vulu ya, ka tsghanafta kuni karaku ta lwi ta mnduha ni ŋa zba zɗaku. 11 Ka tsuʼaf tsuʼa həŋ ta zɗakwa ghuni ka gunaghunatá wa tgha katsi, dzaʼa nzakway inda mnduha ma tsa luwa ya ka vuʼa ghuni ŋa magaghunatá slna. 12 Ama ka kwalaghu kwala həŋ ta zɗakwa ghuni, ka kumaftá həŋ ta vulu katsi, ka ŋamta kuni ta tsa luwa taŋ ya nda vulu. 13 Dzaʼa vlaghuna vla Yawe, Lazglafta ghuni ta həŋ ma dzva ghuni. Ka pslata kuni ta inda zgwana nda kafay. 14 Laviŋ lava kuni ta hlagaghutá miʼaha, nda zwani, nda rini, nda inda skwiha ma tsa luwa ya. Ka za kuni ta skwi ya zləɗa kuni ta ghumaha ghuni, kabga Yawe, Lazglafta ghuni ta vlaghunata. 15 Manda tsaya dzaʼa maga kuni nda inda luwaha diʼiŋ nda kaghuni, ya kul haɗ mataba luwaha mndəra na mnduha na.
16 Ama luwaha na mnduha vlaghuna Yawe, Lazglafta ghuni ka skwa za həga ghuni na ná, yaha kuni zlanata dər nahgani tsi nda hafu. 17 Ka zaɗanata kuni tuzluzl ta la Het, nda la Amuru, nda la Kanʼana, nda la Periz, nda la Hiv, nda la Yəbus manda ya mnaf Yawe, Lazglafta ghuni, 18 kada kwala həŋ ta taghaghunaftá inda tsa ghwaɗaka manzakɗawayha ta mag həŋ ŋa lazglaftaha taŋ ya, dá ganatá kuni ta dmaku ta Yawe, Lazglafta ghuni.
19 Ka nza nza kuni ka nzəɗavata ta ŋamtá sana luwa ŋa vulu ka da zata katsi, yaha kuni faftá slpaɗa ta fuha ŋa zaɗanata, ya yakwa taŋ dzaʼa kuni da zay. Psliŋta a kuni ta həŋ wu, kabga fuha ma mtak ná, mnda səla a həŋ ŋa vulu nda həŋ wa. 20 Ba fu ya dzaʼa kuni grafta kazlay fwa zay a nana wu kəʼa, dzaʼa kuni psliŋta ka zaɗanata. Nda nza tsaha ya ŋa magafta ghuni ta skwiha ŋa tuzla matsak ma vulu ha ka zata ghuni ta tsa luwa ya. »