Mbla mndu kul snaŋtá lu ta mndu ta dzata
21
1 « Ka slanagha sla lu ta mbla mndu dza lu ma mtak, ta tsa haɗik dzaʼa vlaghunata Yawe, Lazglafta ghuni ŋa ŋa ghuni ya, kul snaŋtá lu ta mndu ta dzata katsi, 2 dzaʼa lagha la galata mndu ghuni, nda gwal tsaghunatá guma garaftá slrakwa mtak mataba luwaha nda tsa mbli ya. 3 Dzaʼa nghay lu, ka wati luwa ya malaghu ndusatá ni nda tsa mbli ya, ŋa klafta la galata mndu ma tsa luwa ya ta rva sla ta kul ksaŋta lu ta slna nda tsi, ta fanam a lu ta udza sla ma ŋurzluŋ wa. 4 Ka kladata la galata mndu ma tsa luwa ya ta tsa rva sla ya ta da lika ta wa zala kul swiʼavata, da vli ya ta kul hvaŋta lu, dər ka sləgafta. Hada ma tsa lika dzaʼa ɓlanafta həŋ ta ŋurzluŋ ta tsa rva sla ya. 5 Ka gavadaghata gwal dra skwi ŋa Lazglafta, la Levi, kabga Yawe, Lazglafta ghuni ta zbapta həŋ ŋa maganatá slna, nda ya ŋa tfa wi nda hga ni ŋa mnduha. Ta gwaɗa taŋ ta dgakwa inda zlərɗa wi, nda inda lmu. 6 Inda la galata mndu ma tsa luwa ndusa nda tsa mbli ya, ka mbambazafta həŋ ta dzvu ta tsa rva sla dzaʼa ɓlanaf lu ta ŋurzluŋ ma lika ya. 7 Ka həŋ dazlay mantsa: “Pghiŋ a aŋni ta na us na wu, nghiŋ a ira aŋni guli wa. 8 Ar Yawe, slərɓanap slərɓa ta zughu ta mnduha gha la Israʼila varagap ka ta həŋ. Ma faŋnagha ka ta dmakwa pghiŋtá usa mndu kul haɗ dmakwa ni ta mnduha gha la Israʼila,” ka həŋ dazlay. Mantsa ya dzaʼa slərɓapta lu ta zughu ma tsa dmakwa pghiŋtá us ya. 9 Mantsa ya dzaʼa kliŋta kuni ta dmakwa pghiŋtá usa mndu kul haɗ dmakwa ni nda ma magata ghuni ta skwi nda ra ta wa ira Yawe. »Kla vuʼa ka marakw
10 « Ka lab la kuni da vulu nda ghumaha ghuni, ka faghunam Yawe, Lazglafta ghuni ma dzva ghuni, ka hlaftá kuni ta vuʼaha, 11 ka nghaŋtá ka ta makwa ɗina mataba taŋ, ka kumaftá ka ta klay ka marakw katsi, 12 laviŋ lava ka ta klaghata dzagha, ka htsiŋta tsi ta ghəŋ, ɗatsiŋha ta ɗahəŋha, 13 suɗiŋha ta lgutha si ta vgha ni ma klafta ka vuʼa ya, ka nzata ni ga ghuni. Ka ŋəzapta tsi ta i da ni nda ma ni ka tili turtuk. Tahula tsa, laviŋ lava ka ta lagha da tsi, ka klafta ŋa nzakwa ni ka markwa ghuni. 14 Ka zɗəgagha a tsi dazlay wu, zliŋta gha ka dzaʼa tsi da vli ya ta kum tsi. Laviŋta a ka ta skwapta ka tsedi wu, fəglata a ka ka vuʼa guli wu, kabga mblaf nda mbla ka ta hanata nda tsi. »
Mamalmala zumali
15 « Kawayaka skwi his miʼa mndu, ka ɗvuta tsi ta ya turtuk, ɗvu a sani wa. Ka yayanatá həŋ his his ta zwana zgwana, ama tiŋəl tsa marakw kul ɗvu tsi ya kay ta yanatá zwaŋa zgun. 16 Baɗ dá dgər tsi ta skwa za həga ni ŋa zwana zgwana ni, vlaŋta a ta mamalmali ta zwaŋa tsa marakw ɗvu tsi ya ŋa da manaka zwaŋa tsa marakw kul ɗvutá tsi ya wa. 17 Katək ná, ɗina ka snaŋta ni ta nzakwa zumali ka zumali, zwaŋa tsa marakw kul ɗvutá tsi ya. Ŋa ni dzaʼa vlaŋta tsi ta his ma dgata ni hkən ma inda skwa ni, kabga tsa zwaŋ ya taŋtaŋa ma zgun zguna ni, tsatsi raŋ nzakw ka zumali. »
Zwaŋ kul zlahavata
18 « Kawayaka skwi mamu sana mndu nda zwaŋ təŋ təŋa ghəŋa ni ta sidi, kul haɗ ta sna gwaɗa da i da ni nda ma ni dər ki həŋ ta zlahay, 19 dzaʼa ksaf ksa həŋ ka klədanaghatá la galata mndu ta wi tgha luwa nzakwa taŋ. 20 Ka həŋ dzaʼazlay nda la galata mndu ma luwa ni mantsa: “Nana zwaŋa ŋni na ná, təŋ təŋa ghəŋa ni, ta sidi, haɗ ta sna gwaɗa ta mnanata ŋni wu, ksu ksa sliʼiŋ, ta ghuyta ghuyakwa ni,” ka həŋ dzaʼazlay. 21 Ka zlərtsata inda zgwana ma tsa luwa ni ya ha ka mtata ni. Mantsa ya dzaʼa kliŋta kuni ta ghwaɗaka skwi mataba ghuni. Dzaʼa snaŋ sna inda la Israʼila ŋa zləŋay taŋ. »
Hagatá mbli ta fu
22 « Ka gaga mndu ta dmaku prək ka tsanaghata guma dzata, ka dzatá kuni, ka hagatá lu ta mbla ni ta fu katsi, 23 yaha mbla ni da hanay ta fu. Baɗ va tsaya dzaʼa lamta kuni, kabga nda nza tsa mndu haga lu ta fu ya ka mndu nda ksiʼa da Lazglafta. Ma niŋ kuni ka skwi ta tsaɗ lu ta haɗika ghuni ya dzaʼa vlaghuna Yawe, Lazglafta ghuni ka skwa za həga ghuni.* »