Vrafta ta zlahu 22

Vlaŋtá sgit ta skwa mndu

1 « Kawayaka skwi nda ngha ka ta sla la ghuni, ka rina fisika ni a tsi ta zwaɗuta, yaha ka da tsaghuta warawara, vranak vra gha ta zwaŋama.^* 2 Ka si ndusa a tsa la ghuni ya nda kagha wu, sna a kagha guli wu, pghata gha ta tsa rini ya ga ghuni, ka nghay gha ga ghuni ha ta fitik ya dzaʼa lagha tsa la ghuni ya da zbay, ŋa vlaŋta gha ta skwa ni. 3 Mantsa ya dzaʼa maga ka nda kəɗiha ni. Mantsa ya dzaʼa maga ka nda lguta ni. Mantsa ya dzaʼa maga ka nda inda skwa la ghuni ta zwaɗuta ka slaftá ka tida. Yaha ka da tsaghutá warawara.

4 Ka nda ngha ka ta kəɗih, ka sla la ghuni ya a tsi ta zləmbuta ta tvi, yaha ka da tsaghuta warawara, kataŋ kata ka sliʼanafta ka.^* »

Sanlaha ma zlahuha

5 « Yaha marakw dá suɗavatá lgutha zgun. Yaha zgun dá suɗavatá lgutha marakw. Inda ya ta magay manda tsa ná, nda nza ka manzakɗaway da Yawe, Lazglafta ghuni.

6 Ka slanagha sla ka ta mbaɗ ka ta mbaɗa ta tvi ta həga ɗyak ta fu, ka ta haɗik a tsi, mamu zwana ni, ka slislika ni a tsi mida, ta han ma taŋ ta ghəŋa taŋ, yaha ka da ksaghutá ma ta ghəŋa zwana ni. 7 Laviŋ lava ka ta hlutá zwana ni ka zliŋtá ma taŋ, ŋa nzata gha ləŋləŋ, ŋa slravaghata hafa gha.

8 Ka baf ba ka ta lfiɗa həga katsi, ka buŋta ka ta zwaŋa matsak ta wa dədəmatá ni, dá dɗagatá mndu, dá nzakw dmakwa usa ni ta ghəŋa gha.

9 Yaha ka da sləgamtá hulfa mndərga sana fu ma vwaha inaba gha. Ka manda tsa magata ka, dzaʼa nzakway yakwa tsa fu ŋəɓam ka ya nda yakwa inabi tani ka skwi kul haɗ hayhaya ni. 10 Yaha ka da gwafta sla nda kəɗih ŋa hva nda həŋ. 11 Yaha kuni da suɗa lgut gaɓanaf lu ta gafta nda sləvdza swida tuwak nda ya nda sləvdza liŋ.

12 Ka ndaruŋta ka ta bazama ta wubisimha gwada bukwa gha.^* »

Zlahu ta ghəŋa ɓadziŋtá makwa

13 « Kawayaka skwi ka klafta mndu ta marakw ka guyaftá vgha da tsi. Tahula tsa, ka husaŋtá tsi, 14 ka vzaftá tsi ta rutsak tida, ka ɓadziŋtá hga ni kazlay: “Ma klafta ɗa ta na marakw na ka guyaftá ŋni ta vgha nda tsi ná, slanagha a yu wu,” kaʼa. 15 Ka mantsa tsi katsi, kladaghata i da ni nda ma ni ma tsa marakw ya ta ŋizla ta maraŋta nzakwa ni ka daghali, ka maranaŋta la galata mndu ta wi tgha luwa. 16 Ka da ni ma tsa marakw ya dzaʼazlay nda la galata mndu mantsa: “Makwa ɗa ya, na mndu na vlaŋ yu ta makwa ɗa ŋa nzakwa ni ka markwa taŋ, ama ka husaŋtá tsi. 17 Wana vzaftá rutsak tida. Kaʼa na: Slanagha a yu ta makwa gha ka daghali wu, kaʼa. Ama wana ŋizla ta maraŋta nzakwa ni ka daghali,” kaʼa. Ŋa planapta ni ta tsa lgut ma vəl si guya vgha taŋ ya ta kəma la galata mndu ma tsa luwa ya. 18 Dzaʼa ksaf ksa la galata mndu ma tsa luwa ya ta tsa mndu ya ka zlahanaghata. 19 Dzaʼa mnana mna həŋ ŋa planata ni ta bika ta da ni ma tsa makwa ya ka sulay dərmək, kabga vəl ɓadziŋta ni ta hga makwa ta Israʼila. Nzata ni ka markwa taŋ, haɗ dzaʼa walaŋta ghəzliŋta ka ta nda hafu tsi wa.

20 Ama ka graf gra lu kahwathwata ta tsa rutsak ya, haɗ skwi ta maraŋta kazlay si ka daghali tsa makwa ya kəʼa wu katsi, 21 dzaʼa kladagha kla lu ta wa tgha ga da ni, ka zlərtsatá mnduha ma luwa ni nda pala ka dzata, kabga maga maga ta ghwaɗaka skwi ma Israʼila nda ma hliri hla tsi ta həga ga da ni. Mantsa ya dzaʼa kliŋta kuni ta ghwaɗaka skwi mataba ghuni.

22 Ka slanagha sla lu ta mndu ta han nda markwa mndu, pslatá həŋ his his, tsa zgun ta hanata nda tsa marakw ya nda vərɗa tsa marakw ya. Mantsa ya dzaʼa kliŋta kuni ta ghwaɗaka skwi mataba la Israʼila.

23 Ka ta dzugway dzugway mndu ta daghala makwa, ka gəmatá sana mndu ma luwa nda tsi, ka hanata nda tsi katsi, 24 hladaghata ghuni ta həŋ his his ta wa tgha tsa luwa ya, ka zlərtsatá həŋ nda pala ka pslatá həŋ. Dzaʼa dza dza lu ta makwa, kabga ma luwa, ka kwalaghutá tsi ta wahata ŋa kataŋta. Dzaʼa dza dza lu ta zgun, kabga ɓadziŋta ni ta markwa sana mndu. Mantsa ya dzaʼa kliŋta kuni ta ghwaɗaka skwi mataba ghuni. 25 Ama ka ma mtak slanaghata zgun nda makwa ta dzugu mndu, ka ksaftá tsa mndu ya ka hanata nda tsi katsi, tsa zgun ta hanata nda tsi ya turtukwa ni dzaʼa dzata lu. 26 Haɗ skwi dzaʼa kuni maganata tsa makwa ya wa. Ga a tsatsi ta dmaku prək ka dzata wa. Ka guram tsaya nda mndu ta valafta ta sləvda ni ka dzata.^* 27 Ma mtak slanaghata tsi, dər má waha waha tsa makwa ta dzugu mndu ya, haɗ mndu ŋa kataŋta wa.

28 Ka slanagha sla zgun ta sana daghala makwa kul haɗ mndu ta dzugway, ka ksaftá tsi ka hanata nda tsi, ka ksanaghatá lu ta həŋ katsi, 29 planata tsa mndu ta hanata nda tsi ya ta sulay hutaf mbsak ta da ni ma tsa makwa ya. Nzakwa tsa makwa ya guli, ka markwa taŋ, kabga tsatsi ta ɓadziŋta tsa makwa ya. Laviŋta a ta ghəzliŋta ka ta nda hafu tsi wa.^* »