Luwaha la Levi
35
1 Ka gwaɗganatá Yawe ta Musa ma daɓiha Muwav, ndusa nda Yardeŋ, mbəŋ nda Yeriku, kaʼa mantsa: 2 « Mnanaf mna ta la Israʼila ka tsanafta həŋ ma mayaka taŋ ta la Levi ka haɗika za həga taŋ, luwaha ya ŋa nzakwa taŋ. Valaŋ kuni guli ta həŋ ta vliha ta wanaftá tsa luwaha ya ŋa ngha rina taŋ. 3 Dzaʼa nzakway tsa luwaha ya ŋa taŋ ŋa nzakwa taŋ. Tsa haɗikha ta wanafta ya guli, ŋa vla ngha rina taŋ, nda inda sanlaha ma rina taŋ. 4 Haɗikha tsa luwaha dzaʼa valaŋta kuni ta la Levi ya, sliʼafta ni ta matsaka luwa ka laghwi ka mitər hutaf dərmək ka wanafta. 5 Ka grafta kuni ta hula luwa təv safa fitik ta mitər dəmbuʼ (1.000), nda təv sud, ka mitər dəmbuʼ (1.000), nda təv dɗakwa fitik, ka mitər dəmbuʼ (1.000), nda təv nur, ka mitər dəmbuʼ (1.000), ka nzakwa tsa luwa ya ma takataka. Tsaha ya vla ngha rini dzaʼa həŋ mutsay ta hula luwaha taŋ.6 Luwaha dzaʼa zlanaŋta kuni ta la Levi ná, luwaha mkuʼ ŋa ɗifa gwal ta hwaya mataray. Ka sganaghata kuni ta sanlaha ma luwaha fwaɗ mbsak his mida guli. 7 Gwagwata luwaha dzaʼa zlanaŋta kuni ta la Levi na: Fwaɗ mbsak tghas mida həŋ. Inda ni nda vla ni ŋa ngha rini. 8 Tsa luwaha dzaʼa vlaŋta kuni ta həŋ ma ŋa la Israʼila ya ná, dagala dzaʼa klaghuta kuni da mndəra mndu dagala ŋa taŋ, kiʼa da mndəra mndu kiʼa ŋa taŋ. Inda mndəra mndu dzaʼa vlatá luwaha ni ŋa la Levi, taɓta haɗika za həga tsanaf lu ta mndəra mndu, » kaʼa.
Luwaha ŋa hwaya mataray
9 Ka Yawe nda Musa mantsa: 10 « Mnana mna ta la Israʼila: Manda tsughwaɗadapta ghuni ta Yardeŋ ŋa lami da haɗika Kanʼana ya, 11 ka zabapta kuni ta luwaha dzaʼa nzakway ka luwaha ŋa hwaya mataray. Mndu ya dzaʼa dzata mndu kul haɗ nda kumay ni, dzaʼa hwayam hwaya ɗifaghuta mida. 12 Dzaʼa nzakway tsa luwaha ya ŋa hwaya mataraya ghuni, ŋa vlaghunatá tva hwayapta da mndu dzaʼa zba plamta. Haɗ lu dzaʼa dzatá tsa mndu ta dzatá mndu ya, makəɗ lu kladaghata ta kəma guyatá ghəŋ ŋa tsanaghatá guma wa. 13 Ka zabapta kuni ta luwaha mkuʼ ŋa hwaya mataray. 14 Hkən dzaʼa pɗanata kuni ta sana ɓla Yardeŋ, hkən ma haɗika Kanʼana ŋa nzakwa taŋ ka luwaha ŋa hwaya mataray. 15 Tsa luwaha mkuʼ ya dzaʼa nzakway ŋa hwaya mataraya la Israʼila guli, nda gwal hwaya, nda matbayha mataba taŋ tani. Inda mndu dzaʼa dzatá mndu, kul haɗ nda ɗvay ni, dzaʼa mutsay ta vli ŋa ɗifa ni.
16 Ka nda skwi ka kfur dzuŋta mndu ta mndu, ka mtuta tsi, nda nza tsa mndu ya ka mndu ta dzatá mndu. Dzaʼa dza dza lu ta tsa mndu ta dzatá mndu ya guli. 17 Ka pala wuɗadap tsa mndu ya, ka slaftá tsi tida ka dzata, nda nza tsa mndu ya ka mndu ta dzatá mndu. Dzaʼa dza dza lu ta tsa mndu ta dzatá mndu ya. 18 Ka dzuŋ dza mndu ta mndu nda udzu ta laviŋtá dzata mndu, ka mtutá tsa mndu ya, nda nza tsa mndu ya ka mndu ta dzatá mndu. Dzaʼa dza dza lu ta tsa mndu ta dzatá mndu ya. 19 Mnda plamta dzaʼa dzatá tsa mndu ta dzatá mndu ya, baɗ slafta ni tida. Tsatsi dzaʼa dzata. 20 Ka lagha mndu ka sliŋwiŋtá mndu, kabga husaŋta ni, ka skwi a klaf tsi ka wuɗata ka sidi, ka dzata, 21 ka dzuŋ nda dzvu a tsi ta mndu ka sidi, ka mtutá tsi, dzaʼa dza dza lu ta tsa mndu ta dzuŋtá mndu ya. Nda nza tsa mndu ya ka mndu ta dzatá mndu. Mnda plamta dzaʼa dzatá tsa mndu ta dzata mndu ya, baɗ gəmuvusta taŋ.
22 Ama ka si ka palama a tsi wu, ka sidi a dzuŋta tsi, ka ka sidi a wuɗata tsi wu, 23 ka ngha a wa a tsi, ka dɗaftá pala ni ta laviŋtá dzata mndu tida ka mtutá tsi, ama si ka ghuma ni a wu, zbaŋ a ta maganatá ghwaɗaka skwi wu, 24 guyatá ghəŋ dzaʼa tsa guma ni, manda ya ksaf zlahuha tsa skwi ta maguta ya, mataba tsa mndu ta dzatá mndu ya, nda tsa mnda plamta ya. 25 Dzaʼa katap kata guyatá ghəŋ ta tsa mndu ta dzatá mndu ya ma dzva mnda plamta ya, ka vriŋta da luwa hwaya mataray, ma tsa vli si ɗifaghuta tsi ya. Dzaʼa nza nza hada ha ta mtatá mali ta ghəŋa gwal ta dra skwi ŋa Lazglafta fam lu ma slna nda ma pghanaghatá rɗi nda ghuɓa ya. 26 Ama ka sab sa tsa mndu ta dzatá mndu ya, ka tsughwaɗapta kuraghwa tsa luwa hwaya mataray ɗifaghu tsi mida ya, 27 ka slanaghatá tsa mnda plamta ya, ta hula kuraghuta luwa hwaya mataray, ka dzatá tsi, pghiŋ a tsa mnda plamta ya ta us wa, 28 kabga má dzaʼa nzamta ma luwa hwaya mataray ni tsa mndu ta dzatá mndu ya, ha ka mtatá mali ta ghəŋa gwal ta dra skwi ŋa Lazglafta. Tahula mtatá tsaya, dzaʼa sliʼa tsi da vla ni ta haɗika ni. 29 Dzaʼa nzakway tsa zlahuha ya ŋa ghuni ha zivira zivirha ghuni, ka skwi ya ŋa magay ghuni ta raghunata, ma inda vli dzaʼa nzata kuni.
30 Ma inda skwi ta maguta ta ghəŋa dzatá mndu, haɗ lu dzaʼa dzatá mndu ta dzatá mndu wu, ba mamu ka masləmtsəkha kasiʼi. Slaghu a masləmtsək turtuk ŋa mnay kazlay, dzatá mndu kəʼa wa. 31 Yaha kuni da tsuʼaftá skwa varu ŋa mbanaftá hafa mndu ta dzatá mataray, kabga nda ra ka dzata, dzata. 32 Yaha kuni da tsuʼaftá skwa varu ta mndu ta hwayaghata da luwa hwaya mataray ŋa vraghuta ta haɗika ni, ta kul mtutá mali ta ghəŋa gwal dra skwi ŋa Lazglafta. 33 Yaha kuni da niŋta ka dzibata haɗik ta haɗik ya hada kuni, kabga pghiŋtá us ná, nda nza ka skwi ta niŋtá haɗik ka dzibata haɗik. Laviŋ a lu ta slərɓanaptá zughu ta haɗik pghaf lu ta us tida wu, ba nda usa mndu ta pghiŋtá tsa us ya. 34 Yaha ka da niŋta ka skwi ta tsaɗ lu ta haɗik ya nzam kuni mida, ya ta nzaku yu mataba ghuni ya, kabga iʼi ná, Yawe yu, mataba la Israʼila ta nzakwa yu, » kaʼa.