Luwaha ŋa hwaya mataray
20
1 Ka Yawe nda Yəhusuwa mantsa: 2 « Wya gwaɗa ŋa mnanata gha ta la Israʼila: “Zabapwa zaba ta luwaha ŋa hwaya mataray, ya si mnana yu ta Musa ŋa mnaghunata ya. 3 Ka dza dza mndu mataba ghuni ta mndu, ka si walaŋ nda wala a tsi ta dzata wu, nda kumay ni a tsi wu katsi, dzaʼa laviŋ lava tsa mndu ya ta dzaʼa ɗifaghuta ma sani ma tsa luwaha ya. Mantsa ya tama, ŋa ndapta ni ma dzva mndu nda mnda ni fanagha lu ta plamta. 4 Ma fitika ɓhadaghata tsa mndu ta dzatá mndu da tsa luwa hwaya mataray ya, ŋa sladata ni ta wa tgha tsa luwa ya ka rusanafta ni ta la galata mndu ma tsa luwa ya ta skwi ta maguta. Dzaʼa tsuʼafta tsa la galata mndu ya, ŋa lama ni da luwa. Dzaʼa maranata taŋ ta vli ŋa nzakwa ni. 5 Kawayaka skwi: Dzaʼa hwayiŋ hwaya tsa mndu fanam lu ta plamta ya ha da tsa luwa ya. Yaha mnduha ma tsa luwa ya da zlanaŋtá tsa mndu ya, kabga husaŋ a tsa mndu ta mtuta ya ta tsa mndu ya wa. Walaŋ palama a ta dzata wa. 6 Dzaʼa nza nza tsa mndu ta dzatá mndu ya ma tsa luwa ya, ha ka tsanaghata guyata ghəŋ ta guma. Dzaʼa nza nza ha ka mtatá mali ta ghəŋa gwal dra skwi ŋa Lazglafta ma tsa fitik ya. Tahula tsa, ŋa vra ni dzagha ni da luwa ni ya si hwayap tsi ya,” » kaʼa.7 Wya tsa luwaha faghu la Israʼila ŋa ɗifa ya: Luwa Kedes ma Galili ta ghwáha la Naftali, nda Sekem ta ghwáha la Ifrayim, nda Kiriyatʼarba ta hgə lu guli ka Hevruŋ ta ghwáha la Yahuda, 8 nda ta ɓla Yardeŋ, təv safa fitik nzar lu ma Yeriku. Ka zbaptá həŋ ta Betser sana luwa ta dandar ma mtak ma kwakwara mndəra la Rubeŋ, nda Ramut ma haɗika Gilghat ma kwakwara mndəra la Gat, nda Gulaŋ ma haɗika Basaŋ ma kwakwara mndəra la Mənase.
9 Tsaha ya luwaha zabap la Israʼila ŋa hwaya mataraya inda mnduha taŋ, nda matbayha ma səla taŋ tani. Mantsa ya tama, ka dza dza mndu ta mndu, ka walaŋ nda wala a tsi wu katsi, laviŋ lava ta ndapta ma dzva mndu ya fanam lu ta plamtá tsa mndu dza lu ya. Tsaya tama, dzaʼa katap kata ta ghəŋa ni, da dzatá lu ma kɗaku guyatá ghəŋa ka tsanaghatá guma.