Yəhusuwa 21

Luwaha mndəra la Levi

1 Ka sliʼaftá la zəʼala həga ma mndəra la Levi ka lagha slanaghatá Ilghazar mnda dra skwi ŋa Lazglafta, nda Yəhusuwa zwaŋa Nuŋ, nda la zəʼala həga ma mndəra la Israʼila. 2 Ka həŋ nda tsi ma Silu ta haɗika Kanʼana mantsa: « Mnaf mna Yawe nda ma wa Musa kazlay na, ka vlaŋnata lu ta luwaha ŋa nzakwa ŋni, nda vliha ŋa ngha rina ŋni tani kəʼa, » ka həŋ. 3 Ka zabaptá la Israʼila mataba haɗika za həga taŋ manda ya mnaf Yawe ta sanlaha ma luwaha, nda sanlaha ma vli ŋa ngha rini ka vlaŋtá mndəra la Levi.

4 Ka vzaftá lu ta vindima, ka dɗaftá tsi ta la Kehat ta uʼa taŋ. Mantsa ya mndəra la Haruna mnda dra skwi ŋa Lazglafta mataba mndəra la Levi, ka mutsaftá həŋ nda ma vindima ta luwaha ghwaŋpəɗ hkən ma kwakwara mndəra la Yahuda, nda ŋa la Simghuŋ, nda ŋa la Biŋyamiŋ. 5 Ka mutsaftá pɗakwa mndəra la Kehat nda ma vza vindima ta luwaha ghwaŋ ma kwakwara mndəra la Ifrayim, nda ŋa la Daŋ, nda ŋa rita mndəra la Mənase.

6 Mndəra la Gersuŋ ya guli ná, ka mutsaftá hahəŋ nda ma vzaftá vindima ta luwaha ghwaŋpəɗ hkən ma kwakwara mndəra la Yisakar ta uʼa taŋ, nda ŋa la Aser, nda la Naftali, nda ŋa rita mndəra la Mənase ma Basaŋ.

7 Mndəra la Mərari ya guli ná, ka mutsaftá hahəŋ ta luwaha ghwaŋpəɗ his ma kwakwara mndəra la Rubeŋ ta uʼa taŋ, nda ŋa la Gat, nda ŋa la Zəvuluŋ.

8 Ka hlaftá la Israʼila nda ma vzaftá vindima ta inda tsa luwaha ya, nda vli ŋa ngha rini tani, ka vlaŋtá la Levi, manda ya mnaf Yawe nda ma wa Musa.

9 Wya hga tsa luwaha mndəra la Yahuda, nda mndəra la Simghuŋ vlaŋ həŋ 10 ta la Haruna ta nzakway ka la Kehat zwaŋa Levi ya ta uʼa taŋ, kabga tiŋəl hahəŋ zbaf vindima. 11 Ka vlaŋta həŋ ta Kiriyatʼarba ta ghwá Yahuda, nda vla ngha rini ta wanafta. Tsaya ta hgə lu gitana ka Hevruŋ. Arba ná, dzidza Ghanak ya. 12 Ama vwaha, nda zwana luwaha ta nzakway ka ŋa tsa luwa ya ná, vlaŋtá Kalep, zwaŋa Yəfune lu.

13 Ka vlaŋtá həŋ ta mndəra la Haruna mnda dra skwi ŋa Lazglafta, ta Hevruŋ, luwa ŋa hwaya mataray, nda vli ŋa ngha rini tani, nda Livna, nda vli ŋa ngha rini tani, 14 nda Yattir, nda vli ŋa ngha rini tani, nda Istemuwa, nda vli ŋa ngha rini tani, 15 nda Huluŋ, nda vli ŋa ngha rini tani, nda Dəvir, nda vli ŋa ngha rini tani, 16 nda Ghayiŋ, nda vli ŋa ngha rini tani, nda Yutta, nda vli ŋa ngha rini tani, nda Betʼsemes, nda vli ŋa ngha rini tani. Gwagwata luwaha klaghu həŋ da tsa mndəra mnduha his ya ná, təmbay həŋ.

17 Ma ŋa mndəra la Biŋyamiŋ ya guli: Givghuŋ, nda vli ŋa ngha rini tani, nda Gevagh, nda vli ŋa ngha rini tani, 18 nda Anatut, nda vli ŋa ngha rini tani, nda Almuŋ, nda vli ŋa ngha rini tani, luwaha fwaɗ gwagwata ni. 19 Gwagwata luwaha vlaŋ lu ta gwal dra skwi ŋa Lazglafta, mndəra la Haruna ná, luwaha ghwaŋpəɗ hkən həŋ, nda vli ŋa ngha rini tani.

20 La Levi ma pɗakwa zwana Kehat ta uʼa taŋ ya guli ná, ka mutsaftá hahəŋ nda ma vza vindima ta luwaha ma kwakwara mndəra la Ifrayim. 21 Ka vlaŋtá həŋ ta həŋ ta Sekem, luwa ŋa hwaya mataray, nda vla ngha rini tani ta ghwáha la Ifrayim, nda Gezer, nda vli ŋa ngha rini tani, 22 nda Kivtsayim, nda vli ŋa ngha rini tani, nda Betʼhuruŋ, nda vli ŋa ngha rini tani. Luwaha fwaɗ, ŋa taŋ.

23 Ma ŋa mndəra la Daŋ ya guli ná, luwaha fwaɗ: Ilteke, nda vli ŋa ngha rini tani, nda Gibtuŋ, nda vli ŋa ngha rini tani, 24 nda Ayaluŋ, nda vli ŋa ngha rini tani, nda Gatʼrimmuŋ, nda vli ŋa ngha rini tani.

25 Ma ŋa rita mndəra la Mənase ya guli ná, luwaha his nda vli ŋa ngha rini tani: Taghnak, nda Gatʼrimmuŋ.

26 Gwagwata luwaha nda vli ŋa ngha rini tani vlaŋ lu ta pɗakwa la Kehat ta uʼa taŋ ná, luwaha ghwaŋ həŋ.

27 Ka vlaŋtá həŋ ta sanlaha ma la Levi ta uʼa taŋ, ta nzakway ka mndəra la Gersuŋ, ta luwaha his nda vli ŋa ngha rini tani, ma kwakwara rita mndəra la Mənase: Gulaŋ ma Basaŋ, luwa ŋa hwaya mataray, nda Bəʼestera, nda vli ŋa ngha rini tani.

28-29 Ma ŋa mndəra la Yisakar guli, luwaha fwaɗ, nda vla ngha rini tani: Kisyuŋ, nda Davrat, nda Yarmut, nda Iŋʼgannim.

30-31 Ma ŋa mndəra la Aser guli, luwaha fwaɗ, nda vli ŋa ngha rini tani: Misʼal, nda Abduŋ, nda Helkat, nda Rehuv.

32 Ma ŋa mndəra la Naftali guli, luwaha hkən, nda vli ŋa ngha rini tani: Kedes ma Galili, luwa hwaya mataray, nda Hammutʼdur, nda Kartaŋ.

33 Ka mutsaftá mndəra la Gersuŋ tama ta gwagwata luwaha ghwaŋpəɗ hkən, nda vli ŋa ngha rini tani.

34-35 Ka vlaŋ həŋ ta pɗakwa la Levi ta uʼa taŋ ta nzakway ma mndəra la Mərari ta luwaha fwaɗ, nda vli ŋa ngha rini tani, ma kwakwara mndəra la Zəvuluŋ: Yukneʼam, nda Karta, nda Dimna, nda Nahalal.

36-37 Ma ŋa mndəra la Rubeŋ guli, luwaha fwaɗ, nda vli ŋa ngha rini tani: Betser, nda Yahtsa, nda Kedemut, nda Mefaʼat.

38-39 Ma ŋa mndəra la Gat guli, luwaha fwaɗ, nda vla ngha rina tani: Ramut ma Gilghat, luwa ŋa hwaya mataray, nda Mahanayim, nda Hesbuŋ, nda Yaghəzer.

40 Ka mutsaftá pɗakwa la Levi ta uʼa taŋ ta sabi ma mndəra la Mərari, nda ma vzaftá vindima ta gwagwata luwaha taŋ ghwaŋpəɗ his.

41 Ka mutsaftá mndəra la Levi demdem ta gwagwata luwaha ma kwakwara la Israʼila, fwaɗ mbsak tghas mida, nda vli ŋa ngha rini tani. 42 Inda tsa luwaha ya ná, nda vli ŋa ngha rini ta wanaftá həŋ, həŋ.

Hluta la Israʼila ta haɗik

43 Mantsa ya ká Yawe vlaŋtá la Israʼila ta inda tsa haɗikha waɗa tsi ta vlaŋtá dzidzíha taŋ ya. Ka hlutá həŋ demdem, ka nzatá həŋ hada. 44 Ka vlaŋtá Yawe ta mbiʼa vgha ta inda vli ta wanaftá həŋ, manda ya waɗana tsi ta dzidzíha taŋ. Inda ghumaha taŋ guli, haɗ ya ta laviŋtá sladata ta kəma taŋ wu, kabga zlanaŋ zla Yawe ta inda ghumaha taŋ ma dzva taŋ. 45 Mantsa tama, inda gwaɗa ya tanaf Yawe ta imi ta sləməŋ ta la Israʼila ná, nda maga demdem. Haɗ ya ta dɗapta mida dər ka turtuk wa.