Yəhusuwa 22

Vra mndəra mnduha sana ɓla Yardeŋ dzagha taŋ

1 Ka hagaftá Yəhusuwa ta mndəra la Rubeŋ, nda mndəra la Gat, nda rita mndəra la Mənase. 2 Kaʼa nda həŋ mantsa: « Sna sna kuni ta inda skwi ya mnaghunaf Musa kwalva Yawe. Sna sna kuni guli ta inda skwi ya mnaghunaf yu. 3 Zlanava a kuni ta zwana ma ghuni daga ghalya ha ka sagha ta na fitik na wu, ŋana ŋa kuni guli ta inda skwi ya mnaghunaf Yawe, Lazglafta ghuni. 4 Ndanana, vlaŋ vla Yawe, Lazglafta ghuni ta mbiʼa vgha ta zwana ma ghuni, manda va ya mnana tsi ta həŋ. Vrawa vra tama dzagha ghuni ta haɗika ya vlaghuna Musa kwalva Yawe ta ɓla zala Yardeŋ. 5 Ama ka snata kuni ɗina ta inda zlahu, nda skwiha ya taghaghunaf Musa kwalva Yawe. Ka ɗvuta kuni ta Yawe, Lazglafta ghuni, ka mbaɗa kuni ta mbaɗa manda ya kumaŋ tsi. Ka ksa kuni ta slna nda zlahuha ni. Ka ndiʼafta kuni ta vgha tida. Ka ŋanata kuni nda inda ŋuɗufa ghuni, nda inda hafa ghuni, » kaʼa.

6 Ka tfanaghatá Yəhusuwa ta wi ta həŋ, ka ghuniŋtá həŋ. Ka laghu həŋ dzagha taŋ. 7 Vlaŋ vla Musa ta rita mndəra la Mənase ta mayak ma kwakwara Basaŋ. Ŋa sana rita tsa mndəra mndu ya, ka vlaŋtá Yəhusuwa ta mayak ta nzakway manda ŋa sanlaha ma mndəra mndu nda ta təv dɗakwa fitik ta nzata lu ma Yardeŋ. Ma fitika vray Yəhusuwa ta həŋ dzagha taŋ, ka tfanaghatá tsi ta wi ta həŋ. 8 Kaʼa nda həŋ mantsa: « Vrawa vra dzagha ghuni nda skwa gadghəl dagala, nda bra rini ta ndəghuta katakata, nda tsedi, nda dasu, nda skwiha ka ghuva tili, nda kfur, nda lgutha ta ndəghuta katakata. Ka daguvta kuni nda zwana ma ghuni ta skwiha zləɗa kuni ta ghumaha ghuni, » kaʼa.

Batá gwir ta wa Yardeŋ

9 Ka sliʼaftá mndəra la Rubeŋ, nda mndəra la Gat, nda rita mndəra la Mənase ka vraghuta dzagha taŋ. Ka zlanatá həŋ ta sanlaha ma la Israʼila ma Silu ta haɗika Kanʼana, ka laghwi ta haɗika Gilghat, haɗik ya vlaŋ lu ta həŋ manda ya mnaf Yawe nda ma wa Musa. 10 Ka ɓhadaghatá mndəra la Rubeŋ, nda mndəra la Gat, nda rita mndəra la Mənase da didiŋa Yardeŋ ma haɗika Kanʼana. Hada, ka baftá həŋ ta gwir dagala ka skwa nghay ta wa tsa ghwa ya.

11 Ka snaŋtá la Israʼila ta mnay kazlay na: « Waʼa baf ba mndəra la Rubeŋ, nda mndəra la Gat, nda rita mndəra la Mənase ta gwir ma didiŋa Yardeŋ ta mukuma Kanʼana təv amu la Israʼila, » kəʼa. 12 Snanaghata tsa gwaɗa ya ta tsa sanlaha ma la Israʼila ya, ka gi tskavatá guyatá ghəŋa inda la Israʼila ma Silu, ŋa ŋlu dzaʼa da guyata nda vulu nda tsa mndəra mnduha nda ta ɓla ghwa ya.

13 Ka ghunaftá la Israʼila ta i Pinhas zwaŋa Ilghazar mnda dra skwi ŋa Lazglafta ta haɗika Gilghat, ŋa gwaɗganatá mndəra la Rubeŋ, nda mndəra la Gat, nda rita mndəra la Mənase. 14 Ka ghunaftá lu ta maliha ghwaŋ, turtuk turtuk ma mndəra mndu kawadaga nda tsi. La zəʼala həga həŋ mataba la Israʼila ta uʼa taŋ. 15 Ka lagha həŋ slanaghatá mndəra la Rubeŋ, nda mndəra la Gat, nda rita mndəra la Mənase ta haɗika Gilghat. Ka həŋ nda həŋ mantsa: 16 « Wya ka inda guyatá ghəŋa mnduha Yawe:

“Gaga kuni ta krughuvi dagala ta wa ira Lazglafta la Israʼila. Mbəɗana mbəɗa kuni ta hul ta Yawe. Fitika banafta ghuni ta gwir ta ghəŋa ghuni ya, maraŋ mara tsaya kazlay ta ga sidi kuni nda tsi kəʼa. Nya kəl kuni ka maga ta skwi manda tsa? 17 Ta slaghu a tsa krughuvi ga mu ma Pəghur ghalya ya rki? Ta sab a mu ma skwa tsaɗa ha gita wu, ka nzakw tsi ka zləmnda ta amu inda guyatá ghəŋa mnduha Yawe. 18 Ndana guli ná, wana mbəɗanata kaghuni ta hul ta Yawe, kwalaghu kwala kaghuni ta snatá gwaɗa ni! Ka ndanana, ta pgha ghəŋ kuni nda tsi katsi, mahtsim ná, ta ghəŋa inda guyatá ghəŋa la Israʼila dzaʼa ɓasanavata tsi ta ŋuɗuf. 19 Ka si ka skwi ta tsaɗ lu tsa haɗika ghuni ya ta grə kuni katsi, vragaghuwa vra da haɗik ya ka ŋa Yawe, ma vli hada na həga tumpul ya. Sawa ka mutsafta kuni ta kwakwar ŋa ghuni mataba ŋa ŋni. Ama ma pghə kuni ta ghəŋ nda Yawe, ma pghə kuni ta ghəŋ nda aŋni guli, nda ma bəglafta ghuni ta sana gwir ka zlanatá gwira Yawe, Lazglafta mu. 20 Guv ga Ahaŋ zigha Zerah ta krughuvi dagala ma hlafta ni ta skwi ya mna lu ŋa hwanzaɓiŋta, nda sna vərɗa kaghuni. Ta ghəŋa inda guyatá ghəŋa la Israʼila dɗafta gatá sida Yawe. Ta ghəŋa tsa krughuva ni ya ná, turtukwa ni a mtuta Ahaŋ ta ghəŋa dmakwa ni wa,” » ka həŋ.

21 Ka tsa la Rubeŋ, nda la Gat, nda rita la Mənase ya zlghanaftá wa tsa la zəʼala həga mataba la Israʼila ta uʼa taŋ ya mantsa:

22 « Yawe, Lazglafta ta ghəŋa inda lazglaftaha, Yawe, Lazglafta ta ghəŋa inda lazglaftaha, nda sna tsatsi guli ka kabgawu kəl ŋni ka magata mantsa. Dzaʼa nda sna inda la Israʼila guli. Pgha ghəŋ mag ŋni nda Yawe ra? Krughuvi dagala gana ŋni ra? Ka mantsa tsi, ma zlaŋna tsi nda hafu gita. 23 Ka si baf ba ŋni ta gwira ŋni ŋa mbəɗanatá hul ta Yawe, nda ma vlata ŋni ta skwi ŋa dray tsuh tsuh, nda mbəha nimaya, nda skwa pla ghəŋa zɗaku tsi katsi, ka mantsa tsi, ka tsaŋnagha tsa Yawe ta guma ni! 24 Ama mantsa ya a wu! Skwi kəl aŋni ka magata mantsa ná, nzaku ta kəma, dá mnə zwana kaghuni nda zwana aŋni kazlay: “Nya ta guyanaftá kaghuni nda Yawe, Lazglafta la Israʼila na? 25 Kaghuni la Rubeŋ nda la Gat, vərɗa Yawe a ta fatá Yardeŋ ka mukuma mataba mu, aŋni nda kaghuni ra? Haɗ mayaka ghuni ma Yawe wu kəʼa!” Mantsa ya tama, kawayaka skwi dzaʼa tiŋway zwana kaghuni ta zwana aŋni ŋa kwalaghutá zləŋa Yawe.

26 Tsaya kəl aŋni ka kurata baftá na gwir na, ama ŋa pla ghəŋ ŋa dray tsuh tsuh a wu, ŋa vla dər wati ma skwi a guli wa. 27 Skwi kumaŋ aŋni kweŋkweŋ ná, ka nzakwa na gwir na ka masləmtsək mataba aŋni nda kaghuni, nda ya nda zivira aŋni nda zivira kaghuni. Nana gwir na ná, dzaʼa maray kazlay mamu aŋni nda tvi ŋa maga slna ta kəma Yawe, nda ma pla ghəŋ ŋa dray tsuh tsuh, nda ma vlaŋtá sanlaha ma skwa pla ghəŋ, nda ya nda skwa pla ghəŋa zɗaku. Nda ma tsa magata mantsa ya ná, haɗ zivira kaghuni dzaʼa mnay ŋa zivira aŋni kazlay: “Haɗ mayaka kaghuni ma Yawe wu,” kəʼa. 28 Wya skwi ndan aŋni: Ka dzaʼa mnay mnduha dazlay ŋa aŋni, nda ya ŋa zwana aŋni mantsa ya katsi, ka aŋni dzaʼa zlgha wa ni na: “Nghawa ta tsatá na gwir magaf dzidzíha mu na ɓa! Nda nza manda gwira Yawe. Nza a ŋa dra skwa pla ghəŋ tsuh tsuh, nda ya ŋa vla skwa pla ghəŋ tida wu, ama nda nza ka masləmtsək mataba aŋni nda kaghuni.” 29 Tsaya tama ná, ndanaŋ a aŋni ta walaŋta pgha ghəŋ nda Yawe, ka mbəɗanatá hul wa. Baf a aŋni ta gwir ŋa pla ghəŋ ŋa dray tsuh tsuh, nda mbəha nimaya, nda sanlaha ma skwiha wa. Haɗ sana vli dzaʼa aŋni da vla skwi ŋa Yawe, Lazglafta mu, ka ta tsa gwir ta kəma həga tumpula ni ya a tsi wa, » ka həŋ.

30 Snanata i Pinhas mnda dra skwi ŋa Lazglafta, nda la mali mataba guyata ghəŋ, nda la zəʼala həga mataba la Israʼila ta uʼa taŋ kawadaga nda tsi ya ta tsa gwaɗa mnagap la Rubeŋ, nda la Gat, nda rita la Mənase ya ná, ka zɗəganatá tsi ta həŋ. 31 Ka Pinhas zwaŋa Ilghazar mnda dra skwi ŋa Lazglafta, nda tsa la Rubeŋ, nda la Gat, nda rita la Mənase ya mantsa: « Nda sna ŋni ndana tama, kawadaga Yawe nda amu, kabga gana a kuni ta krughuvi ta Yawe wa. Katap kata kuni ta la Israʼila ma dzva Yawe, » kaʼa.

32 Ka zlanatá Pinhas zwaŋa Ilghazar mnda dra skwi ŋa Lazglafta, nda tsa la maliha ya ta la Rubeŋ, nda la Gat ta haɗika Gilghat. Ka vraghatá həŋ da la Israʼila ta haɗika Kanʼana, ka mnanaŋtá həŋ ta skwi ta maguta. 33 Ka zɗəganatá tsi ta la Israʼila, ka zləzləvu həŋ ta Lazglafta. Ka zlanatá həŋ ta dzaʼa guyata nda vulu nda la Rubeŋ, nda ya nda la Gat, ŋa zaɗanatá haɗika taŋ. 34 Ka i la Rubeŋ, nda la Gat mantsa: « Nda nza na gwir na ka masləmtsək mataba amu demdem kazlay na Yawe ná, Lazglafta ya! » kəʼa ka həŋ. Ka tsanaftá həŋ ta hgu ta tsa gwir ya, ka Masləmtsək.