Mnay Yəhusuwa ta sləkaɗ ŋa la Israʼila
23
1 Nda ndəgha vakuha ta luta tahula vlaŋta Yawe ta mbiʼa vgha ta la Israʼila, da inda ghumaha taŋ ta waftá həŋ. Nda hala Yəhusuwa lula ima ni katakata. 2 Ka hagaŋtá Yəhusuwa ta inda la Israʼila, nda la galata mnduha taŋ, nda maliha taŋ, nda gwal tsanatá guma ta həŋ, nda gwal ta nghapta, kaʼa nda həŋ mantsa: « Wana nda hala yu, lula ima ɗa katakata. 3 Nda ngha kaghuni nda ira ghuni ta inda skwi magana Yawe, Lazglafta ghuni ta inda mndəra mnduha ta na haɗik na dabga kaghuni, kabga Yawe, Lazglafta ghuni ta vula ta vulu ma vla ghuni. 4 Nda ngha kuni, daganaf daga yu ka skwa za həga taŋ ta mndəra ghuni nda ma vza vindima ta inda na haɗikha mndəra mnduha zak yu na, nda ya ta pɗaku tani, sliʼafta ni ta wa Yardeŋ, dikw ta wa drəf dagala nda təv dɗakwa fitik. 5 Dzaʼa ghəzliŋ ghəzla Yawe, Lazglafta ghuni ta həŋ ta kəma ghuni, ŋa ŋawafta ni ta həŋ ta kəma ghuni, ŋa zlaʼuwaghuta ghuni ta haɗika taŋ, manda ya taghunaf Yawe, Lazglafta ghuni ta imi ta sləməŋ ya.6 Ka mbra kuni ta vgha kahwathwata ŋa ŋanata, nda ya ŋa magay manda ya nda vinda ma deftera zlaha Musa kada kwala kuni mbəɗaghutá vgha dər nda ga zeghwi, dər nda ga zlaɓa. 7 Yaha kuni da laɓa vgha nda na sanlaha ma mndəra mnduha ma səla ghuni na. Yaha kuni walaŋta hgaŋtá hga lazglaftaha taŋ, yaha kuni da waɗu nda hga lazglaftaha taŋ, yaha kuni maga slna ŋa taŋ, yaha kuni da tsəlɓu ta kəma taŋ. 8 Katək ná, ka ndiʼafta kuni ta vgha ta Yawe, Lazglafta ghuni kweŋkweŋ, manda va ya mag kuni ha ka sagha ta gita.
9 Nana mnduha ŋawaf Yawe ta kəma ghuni na ná, dagala dagala həŋ, nda mbara nda mbara həŋ guli. Ama kaghuni, haɗ mndu ta ŋaŋta da kaghuni ha ka sagha ta gita wa. 10 Mndu turtuk mataba ghuni ná, mndu dəmbuʼ ta ŋawafta tsi, kabga Yawe, Lazglafta ghuni ta vulaghunatá tsa vulu ya, manda va ya mnaghuna tsi. 11 Nghuwa ngha ta ghəŋa ghuni, ɗvuwa ɗva ta Yawe, Lazglafta ghuni. 12 Ama ka vraghu vra kuni nda hul, ka laghu da ndiʼaftá vgha nda na mndəra mnduha ta nzaku ma səla ghuni na, ka dzrafta ghuni ta kluvtá makwa mataba ghuni, ka laɓamta ghuni ta vgha, kaghuni nda hahəŋ katsi, 13 ka grafta kuni kazlay na haɗ Yawe dzaʼa kɗaŋtá ŋawaftá mnduha ta na haɗik na ta kəma ghuni wu kəʼa. Dzaʼa nzakway həŋ ŋa ghuni ka kadəŋ. Dzaʼa nzakway həŋ ka dəɓəl. Dzaʼa nzakway həŋ ka maniʼuwa ta dza kaghuni ma ŋwazliɓ. Dzaʼa nzakway həŋ guli ka teki ma ira ghuni ha ka zwaɗuta ghuni ta na ŋərma haɗik vlaghuna Yawe, Lazglafta ghuni na.
14 Iʼi taɗa, wana nda sliʼa yu manda va ya ta sliʼi inda skwiha ta na ghəŋa haɗik na. Ndanana ná, nda sna kaghuni nda inda ŋuɗufa ghuni, nda inda hafa ghuni kazlay na, haɗ gwaɗa dər turtuk ta dɗavaghuta ma inda ŋərma gwaɗaha ya mnaf Yawe, Lazglafta ghuni ta ghəŋa ghuni wu kəʼa. Hɗam hɗa inda ni demdem, haɗ ya ta dɗavaghuta kul magata dər ka turtuk wa. 15 Tsaya tama, manda va ya hɗam Yawe, Lazglafta ghuni ta ŋərma skwi ya taghunaf tsi ta imi ta sləməŋ ya, manda va tsaya dzaʼa laviŋ lava ta maga ghwaɗaka skwiha guli. Laviŋ lava ta zaɗaghunata ma na ŋərma haɗik vlaghuna vərɗa tsatsi na. 16 Baɗ da ɓlanapta kuni ta dzratá wi ya mnaghunaf Yawe ŋa snata ghuni, ka mbəɗaghuta ghuni ta vgha təv sanlaha ma lazglaftaha ka tsəlɓu ŋa taŋ katsi, tsaya tama, dzaʼa gufaghunava gufa Yawe ta ŋuɗuf ŋa zwaɗuta ghuni gi misimmisim, ma na haɗik ta ɗinuta vlaghuna tsi na, » kaʼa.