Yəhusuwa 24

Kurata la Israʼila ta maganatá slna ta Yawe

1 Ka tskanatá Yəhusuwa ma Sekem ta inda mndəra la Israʼila. Ka hagaŋtá tsi ta la galata mnduha taŋ, nda maliha taŋ, nda gwal tsanatá guma ta həŋ, nda gwal ta nghapta. Ka lagha həŋ maravata ta kəma Lazglafta. 2 Ka Yəhusuwa nda inda mnduha mantsa: « Wya ka Yawe, Lazglafta la Israʼila: “Ghalya ná, si ta a ɓla zala Yufratis a ta nzakwa dzidza ghuni, i Terah, da ni ma i Abraham nda Nahur. Sanlaha ma lazglaftaha si ta tsəlɓu həŋ ta tsəlɓu ŋa ni. 3 Iʼi Yawe, ta klagaghutá dzidza ghuni Abraham ta ɓla zala Yufratis, ka wawanaftá yu ta inda haɗika Kanʼana. Ka yanaftá yu tusak ta zivira ni, ka vlaŋtá yu ta Izak, 4 ŋa Izak guli, ka vlaŋtá yu ta i Yakubu nda Ghesav. Ka vlaŋtá yu ta Ghesav ta kwakwar ta ghwá Seghir ŋa nzakwa ni.

Ama ka sliʼaftá i Yakubu nda zwana ni ka laha da nzata ma Masar. 5 Ka ghunaftá yu ta i Musa nda Haruna. Ka dzuŋtá yu ta Masar nda zləmndaha. Tahula tsa, ka hlagaghunaptá yu. 6 Ka hlagaptá yu ta dzidzíha ghuni ma Masar, ka ɓhadaghatá kuni ta wa drəfa Zaŋwafiha. Ka hwayiŋtá la Masar ta həŋ nda mwata plisha, nda sludziha ta plis tani, dikw da drəfa Zaŋwafiha. 7 Ka wahu dzidzíha ghuni ta wahu da Yawe, ka famtá tsi ta grusl ma takataka ghuni nda la Masar, ka zligiŋtá tsi ta drəf, ka hamtá həŋ. Nda ngha ira ghuni ta skwi magana yu ta la Masar. Tahula tsa, ka zatá kuni ta vaku kaɗ ka skwi ma mtak.

8 Ka ɓhadaghunaghatá yu ta haɗika la Amuru ta ɓla Yardeŋ. Ka lighunistá həŋ guk nda vulu, ka zlaghunaŋtá yu ta həŋ ma dzvu ghuni. Ka zaktá kuni ta haɗika taŋ. Ka zaɗanatá yu ta həŋ ta wa ira ghuni. 9 Ka sliʼavaftá Balak zwaŋa Tsipur, mghama Muwav da gəmata nda vulu nda la Israʼila, ka ghunaftá tsi ta mndu ŋa hgaktá Bilʼam zwaŋa Bəghur ŋa ksiʼaftá kaghuni. 10 Ama ka kwalaghutá yu ta snanatá Bilʼam. Ama ka tfu tsi ta wi ŋa ghuni. Ka zluʼaptá yu ta kaghuni.

11 Ka tsughwaɗaptá kuni ta Yardeŋ, ka ɓhadaghatá kuni da Yeriku. Ka gəmatá la Yeriku nda vulu nda kaghuni, mantsa ya la Amuru, nda la Periz, nda la Kanʼana, nda la Het, nda la Girgis, nda la Hiv, nda la Yəbus, ama ka zlaghunaŋtá yu ta inda taŋ ma dzva ghuni. 12 Ka ghunadaghatá yu ta kəma ghuni ta sana gwadzaŋha ɓərzləzla, ka ŋawaftá həŋ ta mghamha la Amuru his. Kafaya ghuni, nda lgheɗa ghuni a ta ghəzlaftá həŋ wa. 13 Mantsa tama, ka vlaghunatá yu ta haɗik ya kul ksaŋtá dzva ghuni ta slna tida. Ka vlaghunatá yu ta luwaha ya kul baŋtá dzva ghuni, ka nzakw kuni mida. Ka vlaghunatá yu ta fwa inabi, nda fwa zaytuŋ ya kul ŋəɓaŋtá dzva ghuni, ama ka zə kuni ta yakwa taŋ,” » kaʼa.

Dzrəglaftá wi

14 Ka Yəhusuwa sganaghata guli mantsa: « Ndanana tama, zləŋawa Yawe, ka maganata kuni ta slna manda ya ta raku nda inda kahwathwata. Ka hliŋta kuni mataba ghuni ta lazglaftaha ya si ta tsəlɓu dzidzíha ghuni ta tsəlɓu ŋa taŋ ta tsa ɓla zala Yufratis, nda ya ma Masar ya. Ka tsəlɓa kuni ta tsəlɓu kuni ta Yawe. 15 Ka si ta nghadaptá kuni, ɗina a tsa tsəlɓanatá tsəlɓu ta Yawe ya wu, zbaʼawa zba gita ta ya dzaʼa tsəlɓanatá kuni ta tsəlɓu. Ka lazglaftaha ya si ta tsəlɓanatá dzidzíha ghuni ta tsəlɓu ta tsa sana ɓla Yufratis ya tsi, ka lazglaftaha la Amuru ta nzakw kuni mataba taŋ na a tsi. Ama iʼi nda həga ɗa, Yawe ŋa aŋni dzaʼa tsəlɓanatá tsəlɓu, » kaʼa.

16 Ka mnduha zlghanaftá wi mantsa: « Kadzeŋkadzeŋ! Haɗ aŋni dzaʼa zlanatá Yawe ka laghu da tsəlɓanatá tsəlɓu ta sana lazglaftaha wa! 17 Yawe ná, Lazglafta mu ya. Tsatsi ta hlagaftá aŋni nda dzidzíha ŋni ma haɗika Masar ma ga vuʼa. Nda ngha aŋni da ira ŋni ta ŋizlaha ka mandərmimi maga tsi. Tsatsi ta nghagaptá aŋni ta inda tvi ya mbaɗagap ŋni, nda ya mataba inda mnduha ya tagap ŋni ta kwakwarha taŋ. 18 Yawe ta ghəzliŋtá inda mnduha ta kəma ŋni, nda la Amuru si ta nzakway ma na haɗik na. Aŋni guli ná, ŋa Yawe dzaʼa tsəlɓanatá aŋni ta tsəlɓu, kabga Yawe ná, Lazglafta mu ya, » ka həŋ.

19 Ka Yəhusuwa nda mnduha mantsa: « Laviŋta a kuni ta maganatá slna ta Yawe wa. Tsatsi ná, Lazglafta nda ghuɓa ya. Tsatsi ná, Lazglafta ta draku ya. Haɗ dzaʼa pliŋtá dmakwa ɓlanapta ghuni ta zlahuha ni, nda dmakuha ghuni wa. 20 Ka zlanava zla kuni ta Yawe ŋa laghu da tsəlɓu ŋa sanlaha ma lazglaftaha katsi, mantsa tama ná, dzaʼa gəma gəma nda kaghuni ŋa balaghunata ni, ŋa zaɗaghunata ni dər má ta magaghunatá skwi ɗina tsi ha gita, » kaʼa.

21 Ama ka mnduha nda Yəhusuwa mantsa: « Kadzeŋkadzeŋ! Yawe dzaʼa tsəlɓanata aŋni ta tsəlɓu, » ka həŋ. 22 Ka Yəhusuwa nda mnduha mantsa: « Kaghuni ka ghəŋa ghuni masləmtsəka ghəŋa ghuni. Kaghuni ka ghəŋa ghuni ta zbaptá Yawe ŋa tsəlɓanatá tsəlɓu, » kaʼa. « Mantsa nzakwa ni, aŋni masləmtsək, » ka həŋ. 23 Ka Yəhusuwa nda mnduha mantsa: « Ala, ndana tama hliŋwa hla ta sanlaha ma lazglaftaha mataba ghuni, ka ndiʼafta kuni ta ŋuɗufa ghuni ta Yawe, Lazglafta la Israʼila, » kaʼa nda həŋ. 24 Ka mnduha nda Yəhusuwa mantsa: « Ta Yawe, Lazglafta mu dzaʼa tsəlɓanata aŋni ta tsəlɓu, dzaʼa snana sna aŋni ta gwaɗa ni, » ka həŋ.

25 Baɗ tsaya ná, ka hbanaftá Yəhusuwa ta dzratá wi ŋa mnduha ma Sekem. Ka vlaŋtá tsi ta zlahuha ta həŋ, nda tviha ya ka həŋ dzaʼa nzakwa taŋ. 26 Ka vindamtá Yəhusuwa ta tsa gwaɗaha ya ma ɗelewera zlaha Lazglafta. Ka klaftá tsi ta mghama pala, ka dzugwata mista sana halalaya fu, ma vli nda ghuɓa ŋa Yawe. 27 Ka Yəhusuwa nda inda mnduha mantsa: « Nana pala na masləmtsək mataba amu, kabga da sna tsatsi ta inda tsa gwaɗaha mnama Yawe ya. Tsatsi masləmtsək mataba ghuni, ŋa pya kaghuni ta dzaʼa maganatá skwi kul raku ta Lazglafta ghuni, » kaʼa. 28 Mantsa tama, ka vriŋtá Yəhusuwa ta mnduha, dər wa ta haɗika za həga ni.

Mtakwa Yəhusuwa

29 Tahula luta tsa skwiha ya, ka mtutá Yəhusuwa zwaŋa Nuŋ, kwalva Yawe. Dərmək nda ghwaŋ ima ni. 30 Ka lamtá lu ta haɗika za həga ni ma Timnatʼserah ta ghwá la Ifrayim nda təv nur ta nzatá lu ta ghwá Gaghats. 31 Ka tsəlɓanatá la Israʼila ta tsəlɓu ta Yawe, ma inda fitika nzakwa Yəhusuwa nda hafu, nda ya ma inda fitika nzakwa la galata mndu ta nzəɗavata nda hafu ta hula tsatsi. Tsa la galata mndu ta nghaŋtá inda slnaha ya magana Yawe ta mnduha la Israʼila ya. 32 Ka lamtá la Israʼila ta ghudzifa Yusufu hlagap həŋ ma Masar, ma sana vwah tsaʼa lu, skwa Yakubu ka sulay dərmək, da zivira Hamur, da ni ma Sekem. Tsa vwah ya ná, nuna ka haɗika za həga zivirha Yusufu. 33 Ka mtutá Ilghazar zwaŋa Haruna guli, ka lamtá lu ta Givgha vlaŋ lu ta zwaŋa ni Pinhas ta ghwá la Ifrayim.