Yəhusuwa 19

Haɗika za həga vlaŋ lu ta mndəra la Simghuŋ

1 Mahisa mayak ya vla lu nda vza vindima guli ná, tsaya ŋa mndəra la Simghuŋ ta uʼa taŋ, ta uʼa taŋ. Ka wanaftá haɗika za həga la Yahuda ta kwakwara taŋ. 2 Wya haɗika za həga taŋ: Tsaya Bəʼerseva, nda Seva, nda Mulada, 3 nda Hatsarsuʼal, nda Bala, nda Ghetsem, 4 nda Iltulat, nda Betul, nda Hurma, 5 nda Tsiklag, nda Betʼmarkabut, nda Hatsarʼsusa, 6 nda Betʼlevavut, nda ya nda Saruheŋ. Luwaha ghwaŋpəɗ hkən nda zwana luwaha taŋ tani. 7 Nda Ghayiŋ, nda Rimmuŋ, nda Gheter, nda Asaŋ: Luwaha fwaɗ, nda zwana luwaha taŋ tani. 8 Nda inda zwana luwaha ta wanaftá tsa luwaha ya, dikw da Baghalatbeʼer, tsaya Rama ma Negev.

Inda tsaha ya ka haɗika za həga taŋ ta mndəra la Simghuŋ, ta uʼa taŋ, ta uʼa taŋ. 9 Ma mayaka mndəra la Yahuda tsanapta lu ta haɗika za həga ta mndəra la Simghuŋ, kabga dagala ŋa mndəra la Yahuda katakata ka ŋa taŋ. Tsaya kəl mndəra la Simghuŋ ka haɗika za həga taŋ ma mayaka mndəra la Yahuda.

Haɗika za həga vlaŋ lu ta mndəra la Zəvuluŋ

10 Ka vzəglaftá lu ta vindima ka mahkən, ka dɗaftá tsi ta ŋa mndəra la Zəvuluŋ ta uʼa taŋ, ta uʼa taŋ. Sliʼafta ni nda ma sud dikw da Sarid kuraghwa haɗika za həga taŋ. 11 Ka laf tsa mukuma taŋ ya nda təv dɗakwa fitik, dikw da Marʼala, dikw da Dabbeset, ka lagha tsi ksaŋtá lika ta dzaʼa nda təv safa fitik ta kəma Yukneʼam. 12 Ka mbəɗadaptá tsi ta vgha ma Sarid nda təv safa fitik ta mukuma nda Kisəlutʼtavur, ka lab tsi nda ma Davrat, ka lafi dikw da Yafiʼa. 13 Sliʼafta ni hada, ka labi nda ta tva safa fitik, dikw da Gatʼhefer nda Ghetkatsiŋ, ka laghwi da guya vgha nda Rimmuŋ, ka mbəɗaghatá vgha nda ma Neʼa. 14 Ka mbəɗaghatá tsa mukuma ya guli ta vgha nda təv nura Hannatuŋ, ka vraghuta ma didiŋa Yiftahʼel. 15 Ma tsa kwakwar ya, mamu luwaha: Kattat, nda Nahalal, nda Simruŋ, nda Yidʼala, nda Betlehem. Luwaha ghwaŋpəɗ his nda zwana luwaha taŋ tani. 16 Inda tsa luwaha ya, nda tsa zwana luwaha taŋ tani, vlaŋ lu ta mndəra la Zəvuluŋ ka haɗika za həga taŋ, ta uʼa taŋ, ta uʼa taŋ.

Haɗika za həga vlaŋ lu ta mndəra la Isakar

17 Ka vzaftá lu ta mafwaɗa vindima, ka dɗaftá tsi ta ŋa mndəra la Yisakar ta uʼa taŋ, ta uʼa taŋ. 18 Ma kwakwara taŋ guli ná, mamu luwaha: Yizrəghel, nda Kəsullut, nda Sunem, 19 nda Hafarayim, nda Siyuŋ, nda Anaharat, 20 nda Rabbit, nda Kisyuŋ, nda Avets, 21 nda Remet, nda Iŋʼgannim, nda Gheŋhada, nda Betʼpatsets. 22 Ka lab tsa mukuma ya ksaŋtá Tavur, nda Sahatsuma, nda Betʼsemes, ka lagha vraghuta ta Yardeŋ: Tsaya luwaha ghwaŋpəɗ mkuʼ, nda zwana luwaha taŋ tani. 23 Tsaya vraghuta haɗika za həga ta ta mndəra la Yisakar ta uʼa taŋ, ta uʼa taŋ.

Haɗika za həga vlaŋ lu ta mndəra la Aser

24 Ka vzafta lu ta mahutafa vindima, ka dɗaftá tsi ta mayaka mndəra la Aser ta uʼa taŋ, ta uʼa taŋ. 25 Mukuma taŋ na: Helkat, nda Hali, nda Beteŋ, nda Ahsaf, 26 nda Allammeleh, nda Amʼad, nda Misʼal. Nda təv dɗakwa fitik ya, ka lab tsa mukuma ya ksaŋtá ghwá Karmel, nda ma Sihurʼlivnat. 27 Nda təv safa fitik ya guli ná, ka laf tsa mukuma ya nda təv Betʼdaguŋ, ka lagha ksaŋtá kwakwara mndəra la Zəvuluŋ, nda didiŋa Yiftahʼel. Ka laghu tsi nda təv nur, dikw da luwa Betʼemek, nda luwa Neʼayel. Ka ɓhadaghata da Kavul, nda təv nur, 28 nda ma Ghevruŋ, nda Rehuv, nda Hammuŋ, nda Kana, dikw da Tsiduŋ luwa dagala. 29 Ka mbəɗadaptá tsa mukuma ya nda ma Rama, ka labi dikw nda təv matsaka huzlu ma luwa Tir, ka mbəɗadapta nda ma Husa, ka ɓhadaghatá tsi da drəf Dagala. Mida mamu luwaha: Mahalav, nda Ahziv, 30 nda Umma, nda Afek, nda Rehuv, hisambsak his mida gwagwata tsa luwaha ya, nda zwana luwaha taŋ tani. 31 Inda tsa luwaha ya, nda zwana luwaha taŋ, haɗika za həga taŋ, vlaŋ lu ta mndəra la Aser ta uʼa taŋ, ta uʼa taŋ.

Haɗika za həga vlaŋ lu ta mndəra la Naftali

32 Ka vzaftá lu ta mkuʼ a vindima, ka dɗaftá tsi ta mayaka mndəra la Naftali ta uʼa taŋ, ta uʼa taŋ. 33 Mukuma taŋ nda ma sud ná, daga ma Helef, nda halalaya fu^ª ma Tsaghananim, nda Adamiʼnekev, nda Yavnəʼel, dikw da Lakkum, ka ɓhadaghatá da Yardeŋ. 34 Mukuma ni nda təv dɗakwa fitik ná, ka mbəɗadaptá tsi nda ma Aznutʼtavur, ka laghu da guya Hukuk. Ka lagha tsi ksaŋtá kwakwara mndəra la Zəvuluŋ nda təv sud, ksaŋha ta kwakwara mndəra la Aser nda təv dɗakwa fitik. Nda təv safa fitik ya ná, la Yahuda, nda Yardeŋ na mukuma taŋ. 35 Luwaha ya ŋaŋam lu ma matsaka huzlu ná, wya həŋ: Tsiddim, nda Tser, nda Hammat, nda Rakkat, nda Kineret, 36 nda Adama, nda Rama, nda Hatsur, 37 nda Kedes, nda Idreghi, nda Gheŋhatsur, 38 nda Yiryuŋ, nda Migdalʼel, nda Hurem, nda Betʼanat, nda Betʼsemes. Luwaha ghwaŋpəɗ təmbay nda zwana luwaha taŋ tani. 39 Tsaha ya luwaha nda zwana luwaha taŋ, vlaŋ lu ta mndəra la Naftali ka haɗika za həga taŋ, ta uʼa taŋ, ta uʼa taŋ.

Haɗika za həga vlaŋ lu ta mndəra la Daŋ

40 Ka vzaftá lu ta mandəfáŋa vindima, ka dɗaftá tsi ta mayaka mndəra la Daŋ, ta uʼa taŋ, ta uʼa taŋ. 41 Mukuma haɗika za həga taŋ na: Tsaya Tsurgha, nda Istaʼul, nda Irʼsemes, 42 nda Saʼalabiŋ, nda Ayaluŋ, nda Yitla, 43 nda Iluŋ, nda Timna, nda Ghekruŋ, 44 nda Ilteke, nda Gibtuŋ, nda Baghalat, 45 nda Yehud, nda Beneʼvrak, nda Gatʼrimmuŋ, 46 nda Meʼyarkuŋ, nda luwa Rakkuŋ, nda kwakwar ya mbəŋ nda Yafu.

47 Nghay mndəra la Daŋ ta ndapta kwakwara taŋ ma dzva taŋ, ka sliʼaftá həŋ liŋtá Lesem nda vulu guk. Ka zatá həŋ ta tsa luwa ya, ka pslatá mnduha mida nda kafay. Ka klaghutá həŋ nekwnekw, ka nzatá həŋ mida. Ka tsanaftá həŋ ta hgu ta tsa Lesem ya, nda hga dzidza taŋ Daŋ. 48 Tsaha ya luwaha nda zwana luwaha taŋ, vlaŋ lu ta mndəra la Daŋ ka haɗika za həga taŋ, ta uʼa taŋ, ta uʼa taŋ.

Haɗika za həga vlaŋ lu ta Yəhusuwa

49 Manda kɗiŋta la Israʼila ta dagaftá tsa haɗikha ya ta vgha taŋ, ka tsanaftá həŋ ta ŋa Yəhusuwa zwaŋa Nuŋ ta haɗik ka skwa za həga ni mataba taŋ guli. 50 Manda va ya mnaf Yawe, ka vlaŋtá həŋ ta luwa ya ɗawaŋ tsi. Tsa luwa ya na: Tsaya Timnatʼserah ma kwakwar ta ghwáha Ifrayim. Ka bəglaftá Yəhusuwa ta tsa luwa ya, ka nzatá tsi hada.

51 Ka dagaptá i Ilghazar mnda dra skwi ŋa Lazglafta, nda Yəhusuwa zwaŋa Nuŋ, nda la zəʼala həga ma mndəra la Israʼila ta tsa haɗik ka skwa za həga taŋ ya nda ma vzaftá vindima. Ma Silu magata həŋ ta kəma Yawe, ta wa tgha lami da həga tumpula guyaku. Mantsa ya ka həŋ kɗiŋta dagaftá tsa haɗik ya.