Vza vindima ŋa pɗakwa mndəra mnduha
18
1 Ka tsəkavata inda guyatá ghəŋa la Israʼila, ma Silu. Ka dzugwatá həŋ hada ta həga tumpula guyaku. Ka nzaku tsa haɗik ya ma dzva taŋ. 2 Ka pɗatá mndəra mnduha ndəfáŋ mataba la Israʼila ta kul mutsaftá haɗik ŋa nzakway ka skwa za həga taŋ. 3 Ka Yəhusuwa nda la Israʼila mantsa: « Ŋa kulam yawu na tɗa huɗa ghuni ka dzaʼa da klaghutá haɗik ya vlaghuna Yawe, Lazglafta dzidza ghuni na? 4 Zabafwa zaba ta mnduha hkən hkən ma inda mndəra mndu, ŋa ghunafta ɗa ta həŋ ranaftá inda na haɗik na, ŋa garafta taŋ ká lu dzaʼa dagaptá mayaka skwa za həga ta inda mndəra mndu, ŋa vragaghata taŋ da sliɗaghata. 5 Dzaʼa daganapta daga həŋ ta tsa haɗik ya ndəfáŋ. Ta nzata mndəra la Yahuda ta kwakwar nda ma sud, ta nzata mndəra la Yusufu ta kwakwar nda ma nur. 6 Lawa ka kwakwarapta kuni ta tsa haɗik ya ka mayakha ndəfáŋ, ka sagha kuni da marihata. Mantsa tama, ŋa vzafta ɗa ta vindima ta mayaka inda mndəra mndu ta kəma Yawe, Lazglafta mu. 7 Ama haɗ lu dzaʼa tsanaftá kwakwar ta la Levi wu, kabga ŋa taŋ ma skwa za həga taŋ ná, nzakway ka gwal ta dra skwi ŋa Lazglafta ya. Mutsu mutsa mndəra la Gat, nda la Rubeŋ, nda rita la Mənase ta ŋa taŋ kwakwar nda ma Yardeŋ nda ta təv safa fitik. Vərɗa Musa kwalva Yawe ta vlaŋtá ŋa taŋ, » kaʼa.8 Ka sliʼaftá tsa mnduha zabap lu ta həŋ ya, ka laghu da nghanatá haɗik. Ma kɗaku həŋ ka sliʼafta, ka Yəhusuwa nda həŋ mantsa: « Lawa ranaftá na haɗik na, ka kwakwarapta kuni ɗina, ka sagha kuni da mnihata. Dzaʼa gi vzaghunaf vza yu ta vindima hadna ta kəma Yawe ma Silu, ŋa mutsafta inda ghuni ta mayaka ghuni, » kaʼa. 9 Ka laghu tsa mnduha ya ranaftá inda tsa haɗik ya. Ka vindafta ta ɗelewer ta inda skwi ta nghanatá tsa mayakha ndəfáŋ ya, nda luwaha ni nda luwaha ni. Tahula tsa, ka vraktá həŋ slanaghatá Yəhusuwa ma ghuɓu ma Silu. 10 Ka vzanaftá Yəhusuwa ta vindima ta həŋ ta kəma Yawe ma Silu. Ma va tsa vli ya, ka vlaŋta tsi ta la Israʼila ta kwakwar ta nghanata həŋ.
Haɗika za həga vlaŋ lu ta mndəra la Biŋyamiŋ
11 Taŋtaŋa mayak manda ya vzaf lu ta vindima ni ná, tsaya ŋa mndəra la Biŋyamiŋ ta uʼa taŋ ta uʼa taŋ. Ka nzakw ŋa taŋ kwakwar ma takataka ŋa i la Yahuda nda ŋa la Yusufu.
12 Mukuma taŋ nda ma nur ná, sliʼafta ni ta wa Yardeŋ, ka laf nda ma nura Yeriku, ka laghu nda təv dɗakwa fitik, nda ma kwakwarha ta ghwá, ka laghu dikw da mtaka Betʼaveŋ. 13 Sliʼafta ni hada ka labi nda ma Luz, ka labi nda ma suda Luz ta hgə lu ka Betel ya, ka laha nda ma Atrutʼadar nda ta ghwá nda ma sud ndakalandala Betʼhuruŋ.
14 Nda təv dɗakwa fitik ta nzatá lu təv tsa ghwá mbəŋ nda Betʼhuruŋ ya, ka mbəɗanatá lu ta tsa mukuma ya: Ka labi nda ma sud ŋa ɓhadaghata da Kiriyatbaʼal, ta hgə lu ka Kiryatyəgharim ta nzakway ka luwa mndəra la Yahuda ya. Tsaya vraghwa mukuma nda təv dɗakwa fitik.
15 Mukuma ni nda ma sud guli ná, sliʼafta ni ta wa Kiryatyəgharim, ka laghu nda təv dɗakwa fitik, ka lagha ta dzuɓayha Neftuwah. 16 Sliʼafta tsa mukuma ya hada guli ná, ka laha dista ghwá mbəŋ nda didiŋa Benhinum ma nura didiŋa da la Rafa. Ka lab tsi nda ma didiŋa Hinum nda təv sud ta vata kuɗuŋur da la Yəbus, ka laha dikw da Iŋʼrugel. 17 Ka mbəɗadaptá tsi ta vgha nda təv nur, ka zlagadapta nda ma Ghensemes ka labi ma Gəlilut mbəŋ nda zlərɗa Adummim, ka laha dikw ta pala Buhaŋ, zwaŋa Rubeŋ. 18 Ka lab tsi nda təv nur ta tsiŋira ghwá mbəŋ nda Gharava, ka laha da tsa didiŋa ya. 19 Ka lab tsa mukuma ya nda ta tsiŋira Betʼhugla nda təv nur, ka labi da vraghuta ta wa drəf ka Slughul, nda ma nur ma vli ya ta laha Yardeŋ da tsa drəf ya. Tsaya kuraghwa mukuma ni nda ma sud.
20 Yardeŋ mukuma nda təv safa fitik. Mantsa ya tsatá mukuma kuraghuta haɗika za həga taŋ vlaŋ lu ta mndəra la Biŋyamiŋ ta uʼa taŋ, ta uʼa taŋ.
21 Luwaha ka ŋa mndəra la Biŋyamiŋ ta uʼa taŋ, ta uʼa taŋ guli ná, tsaha ya Yeriku, nda Betʼhugla, nda Ghemekʼketsits, 22 nda Betʼaraba, nda Tsəmarayim, nda Betel, 23 nda Ghavim, nda Para, nda Ufra, 24 nda Kefarʼammuna, nda Ufni, nda Gevagh. Luwaha ghwaŋpəɗ his nda zwana luwaha taŋ tani. 25 Nda Givghuŋ, nda Rama, nda Bəʼeru, 26 nda Mitspe, nda Kəfira, nda Mutsa, 27 nda Rekem, nda Yirpeʼel, nda Tarʼala, 28 nda Tsela, nda Haʼelef, luwa la Yəbus ta nzakway ka Ursalima, nda Givgha, nda Kiriyat. Ghwaŋpəɗ fwaɗ gwagwata tsa luwaha ya nda zwana luwaha taŋ tani. Inda tsaya haɗika skwa za həga taŋ ta la Biŋyamiŋ ta uʼa taŋ, ta uʼa taŋ.