Kwakwara mndəra la Mənase
17
1 Ka mutsaftá mndəra la Mənase, zumala Yusufu, nda ma vzafta vindima ta ŋa taŋ kwakwar. Ka nzakw kwakwara Gilghat, nda Basaŋ ŋa Mahir, zumala Mənase da ni ma Gilghat ya, kabga nzakwa ni ka mndu viɗviɗ ma vulu. 2 Ka valaŋtá lu ta sanlaha ma mndəra la Mənase ta uʼa taŋ ta uʼa taŋ. Tsa hahəŋ ta uʼa taŋ ya ná, tsaya la Avighezer, nda la Helek, nda la Asriʼel ma Sekem, ma Hefer nda ya ma Səmida ta sabi ma mndəra la Mənase zwaŋa Yusufu.3 Tsəlufəhat ná, zwaŋa Hefer ya, zigha Gilghat, zigha ndindliŋa Mahir, zigha papaha Mənase. Tsa Tsəlufehat ya ná, mutsaf a ta zwaŋa zgun wu, kuʼaha yeya mutsaf tsi. Hga tsa kuʼaha ya ná tsaya: I Mahla, nda Nugha, nda Hugla, nda Milka, nda Tirtsa. 4 Ka sliʼaftá tsa kuʼaha ya ka lagha slanaghatá i Ilghazar, mnda dra skwi ŋa Lazglafta, nda Yəhusuwa zwaŋa Nuŋ, nda maliha ta ghəŋa mnduha. Ka tsa kuʼaha ya nda həŋ mantsa: « Mnanaf mna Yawe ta Musa, ŋa vlaŋnata lu ta ŋa ŋni haɗik, manda va ŋa zgwana ma mndəra amu, » ka həŋ. Manda va ya mnaf Yawe, ka vlaŋtá lu ta tsa kuʼaha ya ta ŋa taŋ haɗik ka skwa za həga ŋni manda ŋa zwana ma ni ma da taŋtaŋ. 5 Ka mutsaftá mndəra la Mənase ta kwakwarha ghwaŋ ta ghəŋa Gilghat, nda Basaŋ ta ɓla Yardeŋ ya. 6 Mantsa tama, zgwana yeya a vlaŋ lu ta kwakwar ma mndəra la Mənase wu, ama nda kuʼaha ma va tsa mndəra taŋ ya tani guli. Ka nzaku haɗika Gilghat ka ŋa sanlaha ma mndəra la Mənase.
7 Kwakwara la Mənase ná, sliʼafta ni ma Aser ma Mikmetat ndusa nda Sekem. Ka laha tsa mukuma ya guli nda ma sud, dikw da la Gheŋtapuwa. 8 Ka ŋa la Mənase tsa kwakwara ta wanaftá Tappuwah ya. Ama luwa Tappuwah ta mukuma ya ná, ŋa la Ifrayim. 9 Ka laha tsa mukuma ya nda ma suda lika Kana. Ka vlaŋtá lu ta la Ifrayim ta luwaha ma tsa vli ya, aŋ mndani ta haɗika Mənase tsa luwaha ya. Ka sliʼaftá tsa mukuma ya ma tsa vli ya, nda ma nura tsa lika ya ka lagha da drəf Dagala. 10 Mantsa tama, ka nzatá la Ifrayim hada ka zaghata nda ma sud, ta nzatá la Mənase ka zaghata nda ma nur. Ka nzaku drəf Dagala ka mukuma taŋ. Ka nzatá mndəra la Aser nda təv nur. Ta nzatá mndəra la Yisakar nda təv safa fitik. 11 Ma kwakwara Yisakar nda Aser ná, ka tsuʼaftá mndəra la Mənase ta luwa Betʼseʼaŋ nda zwana luwaha ni, nda Yivleʼam nda zwana luwaha ni, nda la Dur ta hgə lu guli ka Nafat, nda zwana luwaha ni, nda la Ghendur nda zwana luwaha ni, nda la Taghnak nda zwana luwaha ni, nda la Məgidu nda zwana luwaha ni. 12 Ama trap tra mndəra la Mənase ta zatá mnduha tsa luwaha ya, kabga təŋaf təŋa la Kanʼana ta ghəŋ ka nzata ta tsa haɗik ya. 13 Manda mutsafta la Israʼila ta mbraku tama, ka fatá həŋ ta la Kanʼana ka vuʼa taŋ, ama ghəzlaf a həŋ ta həŋ nda ghəzla wa.
14 Ka lagha zivira Yusufu da mnanatá Yəhusuwa, ka həŋ mantsa: « Kabgawu kəl kagha ka vlaŋnatá haɗik turtuktuk ŋa nzakwa ni ka skwa za həga aŋni na, wana tfaŋnagha tfa Yawe ta wi ka yaŋnafta tusak na? » ka həŋ. 15 Ka Yəhusuwa mantsa: « Ka yuya kuni, ka si htu hta kwakwar ta ghwá Ifrayim ya katsi, dzaʼa ghuni da faɗatá həga fuha ma kwakwara la Periz, nda la Rafa ŋa ŋa ghuni, » kaʼa. 16 Ka la Yusufu mantsa: « Slaghuta a kwakwar ta ghwá ka ŋa ŋni wa. Ama inda la Kanʼana ta nzaku ma daɓi ná, mamu mwata plis ka kfur da hahəŋ. Mantsa ya la Betʼseʼaŋ, nda gwal ta wanaftá həŋ ma didiŋa Yizrəghel guli, » ka həŋ. 17 Ka Yəhusuwa nda la Yusufu ta nzakway ka la Ifrayim, nda la Mənase mantsa: « Mantsa nzakwa ni, nda ya kuni, nda mbra kuni guli. Dzaʼa mutsay kuni ta mayak ka malaghutá turtuktuk ta tsa haɗik ya, 18 kabga dzaʼa nzakway kwakwar ghwáha ŋa ghuni, ŋa dzaʼa ghuni da faɗatá həga fuha ŋa nzakwa ni demdem ka ŋa ghuni. Dər má mamu la Kanʼana nda mwataha plis ka kfur, nda mbara nda mbara həŋ guli, dzaʼa ghəzlaf ghəzla kuni ta həŋ, » kaʼa.