Haɗika za həga vlaŋ lu ta mndəra la Ifrayim nda la Mənase
16
1 Ka vlaŋtá lu ta zivira la Yusufu nda ma vzaftá vindima ta mukuma vli sliʼafta ni ta wa Yardeŋ ndusa nda Yeriku, nda ya təv dzuɓayha Yeriku nda təv safa fitik. Sliʼafta ni ma Yeriku, ka laghu nda ma mtak, ka laf nda ta ghwá Betel. 2 Sliʼafta ni ma Betel guli, ka laghwi da Luz, ka zlagadapta ta mukuma nda la Arki ma Ghatarut. 3 Ka laha tsi nda təv dɗakwa fitik nda təv mukuma la Yaflet, ka zlagadapta nda ma ndakalandala Betʼhuruŋ, dikw da Gezer, ka ɓhadaghata da drəf Dagala.4 Zivira Yusufu ta nzakway ka la Mənase, nda la Ifrayim ta mutsaftá tsa haɗik ya ka skwa za həga taŋ.
Kwakwara mndəra la Ifrayim
5 Wya kuraghuta kwakwar mndəra la Ifrayim ta uʼa taŋ ta uʼa taŋ. Mukuma haɗik ka skwa za həga taŋ ná, sliʼafta ma Atrutʼadar nda təv safa fitik, ka laghu dikw nda kalafndala Betʼhuruŋ, 6 ka ɓhadaghata da drəf Dagala. Nda ma nur ya ná, ta labi ndusa nda Mikmetat. Nda ta tva safa fitik ma Mikmetat ya guli ná, ka laghu tsi nda təv Tanatʼsilu. Ka tadaptá tsa luwa ya, ŋa dzaʼa da Yanuwah. 7 Sliʼafta ni ma Yanuwah ka laha da Ghatarut, nda Naʼara ka guyanafta nda Yeriku, ka lagha da Yardeŋ. 8 Sliʼafta tsa mukuma ya ma Tappuwah, ka laghu təv dɗakwa fitik ta nzatá lu ma Mikmeta ka lab nda ma lika Kana, ka lagha ta wa drəf Dagala. Tsaya kuraghwa kwakwar vlaŋ lu ka skwa za həga taŋ ta mndəra la Ifrayim ta uʼa taŋ ta uʼa taŋ. 9 Ka sganaghatá lu ta la Ifrayim guli, ta sanlaha ma luwaha nda zwana luwaha ta nzakway ka skwa za həga taŋ ma kwakwara mndəra la Mənase. 10 Ama ghəzlaf a la Ifrayim ta la Kanʼana ma Gezer wa. Ha gita ta nzaku həŋ mataba la Ifrayim, ka fatá la Ifrayim ta həŋ ka vuʼa.