Kolose i

Sura ni Suro Paulu anu napakatuka jumaa i kota

Kolose

Pepuua lolita

Kolose iamo sambua kota i propinsi Asia Kokoi anu baria karao lako i kota Epesu. I Paulu mobago rompae labi mopadongka Ngkora Magali i toEpesu (Suro 19:1-41). Lako ni se etu, ria sira jumaa lako i Epesu anu lau i Kolose mobambari Ngkora Magali, duduuna ria mbui sira toKolose anu mepotuu si Pue Yesu. Basangkia mpae lako ni se etu, i Paulu ratarunggu nakenimpobagona mobambari Ngkora Magali. Tongona ratarunggu, nauki sura ei, mpane napakatuka sira toKolose.

I rara sura ei, i Paulu mampopaingaka sira kono i guru agama anu mangkeni patudu anu masala. Rauli nu guru aretu, ane mampenoka kita mansumba katuwu malompe lako si Pue Ala, baria sondo ane wule mepotuu kita si Yesu; sangangaa menomba mbui kita i pangka-pangkana anu makuasa i langi ai i dunia. Rauli mbui nu guru aretu, sangangaa ratindi kita mangula atura agama Yahudi, ai sangangaa mangula kita palia-palia ntanina. I rara nu sura ei, i Paulu moewa pepatudura, nauli ane mepotuu kita si Yesu, sondomo, lawi batena i Yesu anu pensani mangkeni katuwu malompe i manusia. I Yesumo anu mewali tompo Ngkora ni Pue Ala mampopewali langi ai dunia, mpane kuasaNa melumbu lako i sinangkana. Mpane i Paulu mopatudu sira kono i babeia anu sintoto i topepotuu si Pue Ala.

Isi nu Sura

1. Pepuuana Lolita (1:1-2)

2. I Paulu manguli maisi kalompena si Pue Ala nakenimpepotuu nu toKolose, mpane napekakaeka sira (1:3-14)

3. Pangkeniaka ai pobago ni Kerisitu (1:15-23)

4. Pobago ni Paulu mopadongka Ngkora Magali (1:24–2:5)

5. Babeia anu sintoto i tau anu mosintuwu ai i Kerisitu (2:6–4:6)

6. Lolita tabea ai kasopoa nu sura (4:7-18)