4
1 Komi anu rapotua, nibabeika batuami apa anu sintoto ai anu manoto, nikaendo komi mbui ria Tuami i suruga.Patudu kono i pekakae ai babeiata i tau anu baria sira mepotuu si Pue Ala
2 Mekakae liliu komi, i rara nu pekakaemi nipekiri lompe-lompe apa anu ina nipekakaeka ai niuli liliu maisi kalompena si Pue Ala. 3 Mpane nipekakaeka mbui kami, bona i Pue Ala mobungkasika kami dala mopadongka NgkoraNa anu mampololita tunggaia ni Kerisitu. Ni banimpia tunggaiaNa etu tewunikai mani, agaiana ei-ei aku anu mopadongka bambari kono si Kerisitu. Etumo mpane ratarunggu aku. 4 Nipekakaeka aku bona kubuku mopakanoto bambari kono si Kerisitu i kanoto-notona lawi etumo anu sangangaa kupobago.
5 Sangangaa tuwu komi i rara kamatopa i tau anu baria mepotuu si Kerisitu, nipopobundu tempo anu ria. 6 Pololitami sangangaa buke kamaasi, inee baria mobundu, bona niinsani mosonoi pampekunera.
Lolita tabea ai kasopoa nu sura
7 Kutudumo pokata i Tikikus lau si komi, bona naulika komi apa anu mewali si aku i se ei, iamo pokata anu tapokaasi ai rangaku sampopobago anu matundu mampopolumako bago ni Pue. 8 Kutudumo lau mosondaki komi bona niinsani adiwa katuwuki ai bona maroso rarami. 9 I Onesimus ina lau simbela-mbela ai i Tikikus, pokata anu lako i olomi anu tapokaasi, ia anu matundu ai anu pensani rapotuu. Sira rodua ina mangulika komi ope-ope anu mewali i se ei.
10 I Aristarkus, anu ratarunggu simbela-mbela ai aku, mopakatu tabeana si komi. Markus poka ni Baranaba mopakatu mbui tabeana. (Rapakatukamo komi bambari bona nidoko ia ane dongka si komi) 11 Tabea mbui lako si Yesu, anu rasanga mbui i Yustus. Lako i ope-ope toYahudi, sira tolu eidamo anu mobago simbela-mbela ai aku mampopolumako bago peparenta ni Pue Ala. Ai sira anu mopakaroso raraku.
12 Tabea mbui lako si Epafras, tudua ni Yesu Kerisitu anu lako i olomi anu tapokaasi. Ia mampekakaeka liliu komi, bona pepotuumi maroso ai bona manginao mpii komi i rara pepotuumi mangula ope-ope peundea ni Pue Ala. 13 Kusabiki kamadotana i rara pobagona si komi dongka-dongka mbui i pokata anu i Laodikia ai i Hierapolis. 14 Tabea mbui lako si Dokter Lukasi anu tapokaasi, ai lako si Demas.
15 Nipadongka tabeaki i pokata sampepepotuu anu i kota Laodikia. Tabeaki si Nimfa ai i jumaa anu menomba i rara nu tombina. 16 Ane roomo nibasa sura ei, kuperade bona nipakatuka sira jumaa anu i Laodikia, bona rabasa mbui i olo nu jumaa. Mpane suraku anu kupakatuka sira toLaodikia, nibasa mbui i olomi toKolose. 17 Nipadongka si Arkipus bona naparoo bagona anu nakiraka ni Pue!
18 Tabea lako si aku, i Paulu. Kasopoa nu sura ei kuuki ai paleku. Nikaendo aku i tempoku mani i rara nu tarunggu ei. I Pue mowati komi.