Tuwu mosintuwu ai i Kerisitu
3
1 Agaiana komi rapatuwumo simbela-mbela ai i Kerisitu. Etumo mpane sangangaa nipari-pari bona mansumba komi apa anu i suruga, i kariaa ni Kerisitu anu momeso mbai i kuana ni Pue Ala. 2 Mewali, sangangaa nipekiri katuwumi anu i suruga, inee mampekiri ngkida komi katuwumi anu i dunia ei. 3-4 Lawi mamatemo komi, ai mansumbamo komi katuwu anu bou lako si Kerisitu, anu meari simbela-mbela ai i Pue Ala i suruga. I Kerisitu anu mokiraka kita katuwu anu bou, ei-ei baria mani taita, agaiana ane dongka mpesola Ia, ina Napatongawa si kita kuasaNa ai peawaNa. Ai kita mbui ina rapopeawa simbela-mbela ai i Kerisitu.5 Mewali, nakeningkamateta simbela-mbela ai i Kerisitu, tapawiamo babeiata anu ewa babeia nu tau i dunia. Inee komi mobabei babeia anu merikati, inee komi mobabei babeia anu baria sintoto, inee komi mampeulai peundea nu rarami anu mepakaea, inee mampekiri anu madaa, inee komi masirokoa mampokailu anu-anu nu rangami lawi ima anu masirokoa, sira ewa tau anu menomba i anitu. 6 Ai i Pue Ala batena ina mokarumpui tau anu baria mampeulai parentaNa etu. 7 Ni banimpia, lako baria mani komi mengkoru si Pue Ala, ewa etu mani babeiami. 8 Agaiana ei-ei, sangangaa nipawia ope-ope babeiami anu madaa. Inee komi marumpu, apa mani duduumi mombetie, inee komi mekasisi, inee komi mesasalai ba mampolololita anu merikati. 9 Inee komi mepodongkoka, lawi tepawiamo komi lako i ope-ope katuwu ai babeia anu ewa etu. 10 Agaiana ei-ei mansumbamo kita katuwu anu bou, lawi i Pue Ala mampopewalimo kita manusia anu bou. Napakabou liliu rarata bona mampeulai kita babeiaNa, ai bona manginsani kita apa anu mamonso kono si Ia. 11 Mewali, nakeningka Napopewalita manusia anu bou, i Pue Ala bariamo mampopontani toYahudi ai tau anu baria sira toYahudi, lawi i petotokiNa simbela ngkida tau anu ratindi ai tau anu baria ratindi. Baria Ia mampopontani tau anu mosikola ai anu baria mosikola, tuana ba batua. I Kerisitu iamo anu tepailodo. Ia anu tuwu i rarata ope-ope.
12 I Pue Ala mampokaasi komi ai mampelisimo komi mewali tauNa anu magali. Etumo mpane sangangaa mombetulungi komi, sangangaa malompe rarami, mengkaiwoi komi, nipakaalusu pangkeniakami, mpane manoa komi ai tetida komi mantodisa. 13 Sangangaa sabara komi i singka rangami, inee nipairara rangami anu masala si komi. Ewa i Pue moampuni salata, kita mbui sangangaa moampuni rangata anu masala si kita. 14 Anu paraluu mpii iamo: sangangaa mombepokaasi komi, lawi kamaasi etu ina mampoposintuwu komi, ai baria ria kamakurami. 15 I Pue Ala morondemo komi ai mampopewalimo komi sambua woto, bona tuwu komi i rara nu kalene rara anu lako si Kerisitu. Ai sangangaa niuli liliu maisi kalompena si Pue Ala. 16 Patudu ni Kerisitu anu buke pewati, sangangaa meari mpii i rarami. Ai sangangaa mombepatudu komi ai mombekambaroka komi i sukana kamatopami. Nipoduluamode dulua petoia, ai dulua petoia ntanina anu nakiraka komi nu Inosa Magali. Poduluamode komi manguli maisi kalompena si Pue Ala lako i rarami mpii. 17 Apa ngkida anu nibabei ba anu nipololita, sangangaa nibabei ai nipololita i rara sanga ni Pue Yesu. Mpane niuli maisi kalompena si Pue Ala Tuamata kono i apa anu Nababei ni Yesu si komi.
Patudu kono i tau anu santombia
18 Komi towawine anu mosambokomo, mengkoru komi i tomoanemi, etumo anu sintoto i tau anu meula si Pue. 19 Mpane komi tomoane anu mosambokomo, sangangaa nipokaasi towawinemi. Inee komi mangkasara si sira.
20 Komi anakoi, sangangaa nipeulai ope-ope parenta nu tomanami, lawi etu anu mopakatono i Pue Ala. 21 Mpane komi tuama, inee nipakadaa rara nu anami bona ntena makoi rarara.
22 Poka-poka anu mewali batua, nipeulai liliu ope-ope parenta nu tuami anu i dunia ei. Inee nipeulai sawaara nakeningka nipenokana ngkida raita ai ratoia nu tau. Nipeulai sawaara lako i kabula nu rarami, ewa pengkorumi si Pue. 23 Bago apa ngkida anu ratuduka komi, nipobago lako i rarami mpuu. Nipobago bago etu ewa mobago si Pue, ai baria wule i manusia. 24 Mpane nipairara lolita ei: i Pue ina mokiraka komi saromi mangula apa anu Nadandi i ope-ope tau anu Napoana. I Kerisitu iamo Puemi, mpane komi iamo batuaNa. 25 Ima ngkida anu mobabei anu madaa, ina mansumba mbui surungina anu madaa, lawi i Pue baria mampopontani tau.