Kolose 2

1 Kupenoka bona niinsani adiwa kamantimina pobagoku i ope-ope tau anu baria mani manginsani aku, tepesua komi anu i kota Kolose ai sira anu i kota Laodikia. 2 Tunggaiaku ei, bona tepakalene komi ai mombepokaasi komi, duduuna maroso posintuwumi. Peundeaku, bona tongawa si komi tunggaia ni Pue Ala anu tewunikai ni banimpia, mpane baria bata-bata rarami; tunggaiaNa etu bona niinsani i Kerisitu. 3 Lawi i Kerisitu etu, anu mopatongawa sinangka katopa ai kamapande ni Pue Ala anu ni banimpia tewunikai mani. 4 Ope-ope ei, kuulika komi bona ntena komi rapakanawu nu tau anu mokikirai komi ai pololitara anu mamomi raepe. 5 Lawi nauda karao aku lako si komi, agaiana i raraku ria mpuu aku simbela-mbela ai komi. Matono mpuu aku mangepe posintuwumi ai pepotuumi si Kerisitu.

Babeiata sangangaa sintoto ai pepotuuta

6 Poka-poka, nakeningka nidokona i Yesu Kerisitu mewali Pueta, etumo mpane sangangaa mosintuwu komi ai Ia. 7 Mewali, sangangaa nipakaroso ai nipatetida rarami si Ia. Nipakaroso pepotuumi, ewa anu roomo rapatuduka komi. Mpane niuli liliu maisi kalompena si Pue Ala.

8 Mainga-inga komi, bona ntena ria tau anu mokikirai komi ai patudu anu baria mobundu, anu wule mepakanawu. Patudu aretu baria lako si Kerisitu, agaiana lako i pesumbaa pekiri nu manusia ngkida ai lako i kuasa anu madaa, anu makuasa i dunia. 9 Nakenimposintuwuta ai i Kerisitu anu mewalimo manusia, tasumba ope-ope kuasa ai pangkeniaka ni Pue Ala anu baria ria kamakurana. 10 Mewali, ane mosintuwu komi ai i Kerisitu, bariamo ria kamakurami, lawi ope-ope anu ria si Kerisitu ria mbui si komi. I Kerisitumo anu melumbu kuasaNa mpane lako i ope-ope kuasa madaa anu makuasa ai anu meparenta.

11 Nakenimposintuwumi ai i Kerisitu, ratindi komi. Karatindimi etu, baria petindi anu nababei nu manusia, agaiana petindi anu nababei ni Kerisitu i rarami. Lempona, Napawia komi lako i kuasa dosa. 12 Ni tempomi rariu i rara sanga ni Kerisitu, komi ewa tau anu mamate ai anu rapaiwu simbela-mbela ai i Kerisitu, lawi nipawiamo katuwumi ai babeiami anu ni banimpia. Mpane i karariumi etu, komi mewali ewa tau anu rapatuwu mpesola simbela-mbela ai Ia, lawi mansumba komi katuwu anu bou nakenimposintuwumi ai i Yesu, ai i pepotuumi i kuasa ni Pue Ala anu mopatuwu mpesola i Yesu lako i kamate.

13 Ni banimpia, mamate pepotuumi lawi madosa komi ai baria komi ratindi. Nauda ni banimpia mamate pepotuumi, agaiana ei-ei nakenimposintuwumi ai i Kerisitu, Napatuwu mpesola komi simbela-mbela ai Ia, ai moampuni ope-ope dosata. 14 Mewali i ka Naparisina sura inda ai atura-atura pesuku anu mosalai ai mepararai ai sukua anu mantimi, etu Naparisi i karapakuna sura etu i kau anu rapopombesape. 15 Kamate ni Kerisitu i kau anu rapopombesape, i Pue Ala monangi ope-ope kuasa anu madaa anu meparenta ai makuasa, bona kamanangira raita i sumalele dunia.

Inee kita mangula ada anu mombekonoi ngkida ai wotota anu baria mepuu lako si Yesu

16 Poka-poka, inee nipogeaka tau mosasalai komi kono i pangkoni ba i panginu, ba kono i eo-eo mabose agama, ba i posusa wula bou, ba kono i palia i eo penombaa. 17 Lawi ope-opena etu, wule kasimbelaana ngkida ai apa anu ina dongka, anu katongawaana ope-opena etu kamonsona, iamo i Kerisitu. 18 Mewali inee nipatumbeika penangimi nasomboki nu tau anu naoaka mengkaiwoi ai menomba i malaeka, ai mampempemabose ai pampatongawa-pampatongawa anu naita. Tau etu mampemabose mpane pekirina wule mampekiri dunia ei ngkida. 19 Tau aretu bariamo sira mangula patudu anu mepuu lako si Kerisitu. I Kerisitu etu anu mewali Woo. I rara nu petadulakoi ni Kerisitu, ope-ope woto rakadipuraka ai napasambua nu lesoka, ai matuwu sintoto ai peundea ni Pue Ala.

20 Mewali mamatemo komi simbela-mbela ai i Kerisitu, ai rapawiamo komi lako i kuasa-kuasa anu madaa anu mokuasai dunia ei. Mangkiada komi mpane tuwu ewa tau anu nakuasai mani nu dunia ei? Mangkiada mpane matundu komi i atura-atura anu ewa ei: 21 “Inee nipatoro ei!” “Inee nikoni etu!” “Inee nipetui ei ai etu!” 22 Atura anu ewa etu baria mangkeni katuwu anu malompe si kita, lawi atura anu ewa etu, wule mampololita kono i pangkoni ai i anu-anu, anu pensani ope; sampalai ngkida rapake mpane kasopoana ratende. Atura etu mensuwu lako i parenta ai patudu nu manusia. 23 Naudapae raita nu tau atura etu raimbara malompe lawi tau anu mangula atura etu moagama sira, mengkaiwoi sira, mpane mampopesiasi sira wotora mangula ada agamara. Agaiana atura etu baria mobundu, lawi tau anu mangula atura etu mangula ngkida sira peundea nu rarara anu madaa.