Sura ni Suro Paulu anu napakatuka jumaa i kota
Kolose
1
1 Sura ei anu lako si aku i Paulu, anu naongko ni Pue Ala mewali suro ni Yesu Kerisitu mangula peundeaNa, ai lako si Timotiu, pokata sampepepotuu. 2 Kipakatu si komi pokaki sampepepotuu i Kolose, anu mewali tau ni Pue Ala ai anu mepotuu liliu si Kerisitu. Kisarumaka i Pue Ala Tuamata ina mokiraka komi pewati ai kalompe nu katuwu.Pekakae manguli maisi kalompena si Pue Ala
3 Bela-belana kipekakaeka komi, kiuli liliu maisi kalompena si Pue Ala, Tuama nu Pueta i Yesu Kerisitu, 4 lawi kiepemo bambari adiwa pepotuumi si Yesu Kerisitu ai kamaasimi i ope-ope tauNa. 5 Maroso pepotuumi ai asimi, lawi nisarumaka mpuumo apa anu Napatimamaka komi ni Pue Ala i suruga, anu niepemimo i rara Bambari Malompe anu rapadongkaka komi. 6 Ngkora Magali etu, tebambarimo i sumalele dunia duduuna kalalaua mawori tau anu mepotuu si Pue Yesu, mpane mobabei apa anu malompe. Simbela ngkida ai anu mewali si komi poka-poka. I pangepemi Ngkora Magali etu, duduuna manginsani komi kamonsona kabula rara ni Pue Ala. 7 Ngkora Magali etu niepe lako si Epafras rangaki sampopobago anu kipokaasi. I Epafras etu, iamo tudua ni Kerisitu anu tetida liliu mobago motulungi komi. 8 Iamo anu mopadongkaka kami adiwa pombepokaasimi sadua ai sadua nakenimpenini nu Inosa Magali.
I Paulu mampekakaeka sira toKolose
9 Mewali poka-poka, awetu kiepe bambari kono i pepotuumi, kipekakaeka liliu komi. Mekakae kami si Pue Ala, kiperade bona Inosa Magali mokiraka komi kamatopa bona niinsani mpii ope-ope peundeaNa, 10 bona babeiami ina sintoto ai peundea ni Pue, ai bona ope-ope babeiami ina mopakatono raraNa. Ane ewa etu katuwumi, ina nipobago sinangka bago anu malompe, ai ina kalalaua tetambaida panginsanimi i Pue Ala i rara nu katuwumi. 11 Merade kami si Pue Ala bona Napakaroso rarami ai ope-ope kuasaNa mangula karosoNa anu mabose mpii, bona tetida ai manoa liliu komi, i sinangkana anu morumpa komi. 12 Mekakae kami bona matono liliu rarami manguli maisi kalompena i Tuamata, lawi Iamo anu mampopewali komi anaNa, duduuna sintoto komi mansumba kirami simbela-mbela ai ope-ope tauNa i rara nu peparentaNa anu mabaa.
13 Napawiamo kita lako i kuasa anu madedi, mpane Napopewalimo kita tauNa i rara peparenta nu AnaNa anu Napokaasi. 14 AnaNa etu anu mewali pasuru nu wotota, bona teampuni dosata.
I Yesu anu melumbu kabose nu katuwuNa lako i sinangkana
15 I Kerisitu iamo lense anu mampatongawa i Pue Ala, anu baria taita. I Kerisitu iamo anu torapowutu, i wongko lako i sinangkana anu rababei. 16 Lawi mampoliungi Ia, i Pue Ala mampopewali sinangkana anu ria, malompe anu i suruga awetu mbui anu i dunia, malompe anu raita awetu mbui anu baria raita, tepesua ope-ope anu makuasa ai anu meparenta. Sinangkana anu Napopewali mampoliungi i Kerisitu, tunggaiaNa bona ope-opena etu motoia Ia. 17 Lako baria mani sinangkana ria, aminamo ria i Yesu. Mpane ope-ope anu ria, Nakadipuraka ai kuasaNa.
18 Kita anu mepotuu si Kerisitu rapandiri ewa woto, mpane i Kerisitu iamo woo. Ewa woo anu moparentai woto, ewa etumo i Kerisitu moparentai ope-ope jumaa anu mepotuu si Ia. Mpane Ia anu mokiraka kita katuwu anu bou, lawi Iamo anu Torapowutu, anu rapatuwu mpesola lako i kamate. Etumo mpane Iamo anu tepaiwongko mpii lako i sinangka-nangkana anu ria. 19 Lawi i Pue Ala mopakanoto bona ope-ope anu ria si Ia ria mbui i AnaNa, etumo mpane baria ria kamakura ni Yesu Kerisitu. 20 I Pue Ala mosusu AnaNa bona mamate i kau anu rapopombesape, bona ope-ope anu ria mosintuwu mpesola ai i Pue Ala, malompe anu i dunia awetu mbui anu i suruga.
21 Ni banimpia poka, karao komi lako si Pue Ala. Nipoiwali Ia ai babeia ai pekirimi anu madaa. 22 Agaiana ei-ei, AnaNa mewalimo manusia mpane mamate, bona mopasintuwu komi ai i Pue Ala, mpane Napakagali komi duduuna bariamo ria kamasalami ba kamakurami i petotokiNa. 23 Etu ina mewali: ane mepotuu liliumo komi, tetida komi, mpane inee sira nipogeaka tau mopakanawu komi. Nipakaroso peulami i patudu anu niepemo. Inee nipawia pesarumakami i apa anu nadandika komi ni Pue Ala i rara Ngkora Magali. Ngkora Magali etu, rabambarimo i sumalele dunia. Mpane aku mbui, mewali aku tudua ni Pue anu mopadongka Ngkora Magali etu.
I Paulu mampololita pobagona mopadongka Ngkora Magali
24 Ei-ei, matono raraku lawi ria mani kapari anu sangangaa morumpa aku nakenimpobagoku si Kerisitu, ai kapari anu kusumba ei-ei, kusumba nakenimpobagoku motulungi ope-ope tau anu mepotuu si Kerisitu. Pantodisa anu kusumba etu, mopapulo pantodisa anu napolumakoimo ni Kerisitu i wotoNa, iamo jumaa. 25 I Pue Ala moongko aku mewali batua nu ope-ope tau anu mepotuu si Ia, sangangaa kupadongka ope-ope NgkoraNa si komi. 26 Iamo tunggaia ni Pue Ala anu masae mpiimo Nawunikai i ope-ope tau, agaiana ei-ei rapatongawamo i ope-ope tau anu mewali sira tauNa. 27 I Pue Ala ina mampopainsanika sira, adiwa kalompena ai peawana anu tewunikai etu i olo nu ope-ope manusia. TunggaiaNa etu, iamo i Kerisitu ria i rara nu katuwumi, bona manoto kaina mansumbami katuwu anu meawa simbela-mbela ai i Pue Ala.
28 Mewali, kibambari i ope-ope tau kono si Kerisitu. Kipopaingaka ai kipatudu sira ope-ope ai sinangka katopa. Tunggaiaki iamo bona ope-ope tau, pensani rakeni si Pue Ala, ewa tau anu manginao i rara mpepotuuna, lawi mosintuwumo ai i Kerisitu. 29 Etumo mpane kupari-pari ai sinangka rosoku, mobago ai mampepekiri liliu aku sintoto ai roso ai kuasaNa anu mobago i rara nu wotoku.