Sura ni Suro Paulu anu mpolinguruna napakatuka jumaa i kota
Tesalonika
Pepuua lolita
Kota Tesalonika iamo pomesoa poparenta propinsi Makedonia i kadatua Roma. Banimpia, i Paulu lau i Tesalonika mobambari Ngkora Magali, duduuna ria sira tau i se etu anu mepotuu si Pue Yesu (Suro 17:1-4). Agaiana baria mani masae lako ni se etu, ria sira toYahudi anu mokasinai i Paulu. ToYahudi aretu moewa pepatudu ni Paulu anu napadongkaka tau anu baria toYahudi. Nakenimpeewara, i Paulu lambu lako i Tesalonika lau i Berea (17:5-10) mpane lako i se etu, lau ia i kota Korintu. Nakeningkabilana i toTesalonika, i Paulu motudu i Timotiu lau mosondaki sira, mewali i Timotiu mopadongka si ia i rara nu surana adiwa karosona pepotuura (1Tes 3:1-6). Roo awetu, i Paulu mouki sura ei.
I rara nu sura ei, i Paulu mopakaroso pepotuu nu toTesalonika bona tetida sira i rara nu kaparira. Matono mpuu rarana mangepe bambari anu mampololita, adiwa karosona pepotuura, kamaasira i rangara. Napopaingaaka sira kono i katuwuna saduduana i tempona simbela-mbela ai sira. Nasonoi pampekunera kono i kadongka mpesola ni Kerisitu. Pampekunera ewa ei: Ane mamate sadua topepotuu si Pue Ala lako baria mani dongka mpesola i Pue Yesu, ba pensani tau etu mansumba katuwu malompe anu baria mokasopoa? Ai impia i Pue Yesu ina dongka mpesola? I Paulu mopatudu mbui sira bona mobago liliu sira mangkadelo pangkonira, ai bona roo-roo rarara mampegia kadongkaNa mpesola i Kerisitu anu mewali pesarumakaara.
Isi nu Sura
1. Pepuua lolita (1:1)
2. I Paulu manguli maisi kalompena si Pue Ala nakenimpepotuu nu toTesalonika (1:2–3:13)
3. I Paulu mokiraka sira lolita bona mobabei sira apa anu sintoto i tau anu meula si Pue Yesu (4:1-12)
4. I Paulu mopatuduka sira apa anu ina mewali i eo kadongkaNa mpesola i Pue Yesu (4:13–5:11)
5. I Paulu mokiraka sira lolita bona mosintuwu sira (5:12-22)
6. Tabea ai lolita kasopoana (5:23-28)