1 Tesalonika 4

I Paulu mokiraka sira lolita bona babeiara mangula peundea ni Pue Ala

1 Mewali poka-poka, kiperade bona nipeulai ope-ope parenta anu niepemo lako si kami, bona babeiami mangula peundea ni Pue Ala. Kamonsona, ei-ei malompemo babeiami. Agaiana nakenimpobago nu kuasa anu nakiraka kami ni Pue Yesu, kiperade ai kipari-parika komi bona nitambai mbui kalompena babeiami. 2 Niinsanimo pepatudu anu rapatuduka komi, anu kipadongkakamo komi ai kuasa ni Pue Yesu. 3 Ei peundea ni Pue Ala, bona tuwu kita i rara nu kamagali, nikaraosi babeia anu merikati. 4 Komi tomoane, sangangaa mosintuwu komi ai towawinemi mangula dala anu malompe i petotoki ni Pue Ala, ai i petotoki nu manusia. 5 Inee komi nakeni nu peundea rarami anu madaa, ewa anu saweweina mewali i tau anu baria sira manginsani i Pue Ala. 6 I babeia nu tomoane ai towawine, inee komi mobabei sala i tau ntanina pelumbanamo pokami sampepepotuumi. Ni banimpia kipakanotokamo komi pesuku ni Pue Ala i tau anu mobabei ewa etu. 7 Lawi tunggaia ni Pue Ala moronde kita, baria kita Naronde bona mobabei anu merikati, agaiana Narondeda kita bona tuwu i rara nu kamagali. 8 Etumo mpane ane ria tau anu baria madota modoko patudu ei, baria manusia anu nasapuaka, agaiana i Pue Alada anu nasapuaka, anu mokiraka kita Inosa Magali.

9 Kaliliuana poka-poka, ria patudu anu manguli: sangangaa mampokaasi kita pokata sampepepotuuta. Kamonsona bariamo paraluu kiukika komi patudu etu, lawi i Pue Ala mopatudumo komi bona mombepokaasi komi sadua ai sadua. 10 Kamonsona, maasimo komi i ope-ope pokami sampepepotuumi i Makedonia. Agaiana kiperade mpii poka-poka, bona babeiami etu kalalaua tetambai kalompena. 11 Nipari-pari mosintuwu ai rangami. Nipopolumako lompe bagomi saduduami, inee nipesuangi urusia nu rangami. Ai nikadelo pangkonimi, ewa anu kipatudukamo komi ni banimpia. 12 Ane awetu nibabei, bariamo komi ina merade-rade i rangami. Mpane tau anu baria sira mepotuu si Pue Yesu, ina moadai komi.

I Paulu mopatuduka sira kono i kadongka mpesola ni Pue Yesu

13 Poka-poka, tunggaia nu raraki bona niinsani mpii apa anu ina mewali i rangata anu mamate, bona ntena masusa mpii rarami ewa tau sira anu baria ria pesarumakara si Pue Ala. 14 Mepotuumo kita si Pue Yesu anu mamate mpane tuwu mpesola. Mewali ope-ope tau anu mamate anu mepotuu si Ia, ina tuwu mpesola mbui sira. Ane dongka mpesola i Pue Yesu, i Pue Ala ina mangkeni mpesola tau aretu, simbela-mbela ai Ia.

15 Eimo pepatudu anu kipatudukamo komi anu kidoko lako si Pue Yesu: Ane dongka mpesola i Pue, kita anu tuwu mani, baria kita ina mampeilodongi rangata anu mamatemo. 16 Lawi ane dongka mai i Pue Yesu lako i suruga, ina taepe peronde nu tadulako malaeka ai pomomoni nu tatamburu ni Pue Ala. Ai i tempo etu, ina tuwu mpesola sira ope-ope tomate anu mepotuu si Kerisitu. 17 Roo awetu, kita anu tuwu mani ina Naore simbela-mbela ai sira, lau i rara gawu mampomberumpaka i Pue Yesu i wongko langi. Ai ina meari kita simbela-mbela ai i Pue duduuna i kasae-saeana. 18 Mewali poka-poka, lako i bambari ei, sangangaa mombepakalene mporara kita sadua ai sadua.