I Paulu mampopaingaka sira kono i kadongkana mpesola i Pue Yesu
5
1 Poka-poka, baria paraluu kiukika komi kaimpiana mpuu eo kadongkana mpesola i Pue. 2 Lawi niinsani: eo kadongka mpesola ni Pue, ina dongka ewa topanangka i tongo mbengi. 3 Tongo nu tau anu baria sira mepotuu si Pue Ala manguli, “Malompe mpuu katuwuta, baria ria kaekata.” I tempo etumo, ina dongka kapari anu mabose anu ungangkidamo morumpa sira, ewa pantodisa nu sadua towawine anu ina moana. Baria mpuu ria dalara mokaraosi pesuku ni Pue Ala.4 Agaiana komi, poka-poka, niinsani i Pue Ala, ai bariamo komi ria i rara kadediana. Mewali, ane dongka eo kadongka mpesola ni Pue Yesu, baria komi ina tingkara ewa tau anu nakadongkai nu topanangka. 5 Komi ope-ope iamo anu tuwu i rara nu kamabaa. Lempona, mobabei komi apa anu malompe ewa anu rababei nu tau i kamabaana; baria kita mobabei daa ewa anu rababei nu tau i rara kamadedi, ba anu tuwu i rara kamadedi.
6 Mewali, inee kita malera ewa tau anu baria mani mepotuu si Pue Ala. Mainga-inga kita, ai sangangaa tapakanoto pekirita. 7 Lawi tau anu ria i rara nu kamadedi, maturu ngkida sira ai malangu-langu, ai baria manoto pekirira. 8 Agaiana kita ei, tuwu kita i rara nu kamabaa. Etumo mpane sangangaa tapakanoto pekirita. Sangangaa tapakaroso mpuu pepotuuta si Pue Ala ai kamaasita i rangata, bona maroso kita ewa sadua surudado anu mebadu besi. Sangangaa tapakaroso pesarumakata i ka Nakirakata ni Pue Ala katesorema, ewa sadua surudado anu mesongko besi. 9 I Pue Ala mampelisi kita, baria bona mansumba kita karumpuNa. Agaiana Napelisida kita bona mansumba katesorema, lawi i Pue Yesu Kerisitu mosompomo dosata. 10 I Yesu Kerisitu mamate mopasuru kita, bona ane dongka luwu Ia, ina tuwu kita simbela-mbela ai Ia. Nauda kita mamate ba tuwu mani i tempo etu.
11 Etumo mpane poka-poka, sangangaa mombepatudu komi ai mombepakaroso mporara komi ewa anu nibabei ei-ei.
Patudu kasopoana ai tabea
12 Poka-poka, kiperade bona nibila sira tau anu mobago mantimi i rara bago ni Pue i olomi, lawi sira anu napelisi ni Pue bona monini komi ai mopatudu komi. 13 Nibila sira, nipengkorui sira, ai nipokaasi sira nakenimpobagora. Mosintuwu komi sadua ai sadua.
14 Poka-poka, kiperade mbui bona nikiraka sira lolita i rangami anu malose mobago. Nipakaroso rara nu tau anu ria i rara nu kaeka. Nitulungi tau anu paraluu nitulungi. Nipakaroso sira anu malede pepotuura. Sangangaa sabara komi i ope-ope tau. 15 Ane ria anu mobabei daa si kita, inee tasurungi. Aginamo tababei liliu anu malompe i rangata ai i ope-ope tau.
16-18 Nakenimposintuwuta ai i Yesu Kerisitu, sangangaa matono liliu kita, mekakae liliu kita ai manguli liliu mbui kita maisi kalompena si Pue Ala, nauda ba apa anu mewali, lawi etumo peundea ni Pue Ala si kita.
19 Inee nisomboki pobago nu Inosa Magali. 20 I rara pampekirimi, inee komi mopaiwoi Inosa Magali anu rapadongka nu suroNa. 21 Niparesa lompe ope-ope lolita bona niinsani ba lako si Pue Ala mpuu, ba baria. Nipatoromo apa anu malompe. 22 Nikaraosi ope-ope babeia anu madaa.
23 Mekakae kami si Pue Ala anu mokiraka kita kalompe nu katuwu, kiuli, “Pue Ala! Kiperade bona Nupakanoto babeia nu toTesalonika, duduuna magali katuwura. Nuporangai sira i rara nu katuwura, malompe rarara, inosara ai wotora, bona ntena ria kamasalara i kadongkaNa mpesola Pueki i Yesu Kerisitu.” 24 Ia anu moronde komi, iamo i Pue Ala anu baria sambela mopalengi kita. Lawi batena Napabukei dandiNa.
25 Poka-poka, kiperade bona nipekakaeka mbui kami.
26 Nipadongka tabeaki ai kamaasiki i ope-ope pokata sampepepotuuta.
27 Ai kuasa anu nakiraka aku ni Pue Yesu, kuulika komi bona sura ei rabasa i lio nu ope-ope poka-pokata sampepepotuuta, anu ria sira i se etu.
28 Pueta i Yesu Kerisitu mowati komi ope-ope.