1 Tesalonika 3

I Paulu motudu i Timotiu lau i Tesalonika

1-2 Kasopoana, bariamo kibuku motaha kamabilaki. Etumo mpane kiuli, aginamo mepegia kami i kota Atena, ai pokata i Timotiu kitudu lau si komi pokaki i Tesalonika. I Timotiu etu, rangaki i rara bago ni Pue Ala, lawi ia mbui mopadongka Bambari Malompe kono si Kerisitu. Mewali kitudumo i Timotiu lau si komi, kiulika, “Iko ngkimo lau mosondaki sira poka-pokata i Tesalonika, ai nupakaroso pepotuura, 3 bona ntena ria sadua anu mousuli lako i pepotuuna nakeningkamapari anu morumpa kita. Lawi niinsani mboto poka-poka, kapari anu morumpa kita ei mangula tunggaia ni Pue Ala. 4 Tongoki mani simbela-mbela ai komi ni banimpia, kiuli amimo kaina rapopesiasita nu tau. Ai ei-ei tongawamo pewalina. 5 Etumo mpane kutudu i Timotiu lau si komi, bona kuinsani adiwa pepotuumi, lawi bariamo kubuku motaha kamabilaku. Ai maeka aku, ntena komi nakelo Datu nu Seta duduuna napakanawu komi, ai bariamo mobundu bagoki mobambari Bambari Malompe si komi.”

I Timotiu mesola mangkeni bambari lako i Tesalonika

6 Mewali ei-ei, i Timotiu mesolamo i se ei, ai napadongkamo si kami bambari anu mopakatono raraki, nauli, “ToTesalonika aretu, maroso mpuu pepotuura ai kamaasira. Rakaendora liliu babeiata anu malompe si sira. Adiwa ka tapenokana mampomberumpaka sira, awetu mbui karapenokara mampomberumpaka kita.” 7 Mewali poka-poka, i rara nu kapariki ai pantodisaki, awetu kiepe bambari anu nakeni ni Timotiu, tepakalene raraki mangepe karosona pepotuumi. 8 Mewali, matono mpii raraki ai malompe kiepe, asala maroso pepotuumi si Pue Yesu.

9 Maruminsi katonoki nakeningka komina, poka-poka. Mewali, apa anu pensani kisurungika i Pue Ala, lako i ope-ope katono anu Nakiraka kami ei? Baria ria ntanina, batena ngkida kiuli maisi kalompena i rara mpekakaeki si Pue Ala Tuamata. 10 Wengi-wengina ai eo-eona, merade kami si Pue Ala lako i raraki bona pensani mbui komi kisondaki, bona kipasondoi apa anu makura mani i pepotuumi.

I Paulu mampekakaeka toTesalonika

11 I rara mpekakaeki kiuli, “Pue Ala Tuamaki! Pueki i Pue Yesu! Kiperade bona Nubungkasika kami dala bona kibuku mampomberumpaka sira poka-pokaki i Tesalonika. 12 Kiperade bona kalalaua tetambai asira, duduuna mombepokaasi mpuu sira sadua ai sadua, ai mampokaasi mbui sira ope-ope tau, ewa kamaasiki si sira. 13 Pue, kiperade bona Nupakaroso rarara, bona manoto sira ai baria ria kamasalara ai magali sira i lioMu, ane dongka mpesola i Pue Yesu i ope-ope tauNa anu magali. Amin.”