I Paulu motuntu kono i pobagona i Tesalonika
2
1 Niinsani mboto poka-poka, baria mbero-mbero woweki mosondaki komi i boeami. 2 Lako baria mani kami dongka i boeami, rapopesiasi kami ai rakaisii lolita kami i kota Pilipi. Niinsani amimo lolitakana poka-poka! Ai nauda kami raewa nu tau wori i boeami, i Pue Ala mopakaroso raraki bona baria kami maeka mopaliliu pobagoki si komi, mopadongka Bambari Malompe anu lako si Pue Ala.3 Baria komi kironde mampeulai patudu anu baria makono. Baria mbui ria tunggaia nu raraki anu madaa, ai baria kami mampenoka mopakanawu ba ima ngkida. 4 Baria mbui kami mololita bona mopakatono ngkida rara nu tau, agaiana mopadongka kami apa anu mopakatono rara ni Pue Ala, lawi Ia anu moparesa raraki, ai anu mopakanoto ka kamina anu sintoto mobambari Bambari Malompe. 5 Bona niinsani poka-poka, baria kami mopadongka apa anu mamomi i nguduki. Baria kiwunikai tunggaiaki anu madaa bona kisumba ba apa-apa lako si komi. I Pue Ala sabiki! 6 Baria mbui kami mampopetoia si komi ba i tau ntanina. Kamonsona, baria kami masala ane merade kami ba apa-apa si komi poka-poka, lawi kami ei suro ni Kerisitu mpuu kami. 7 Agaiana baria turu raraki mobabei ewa etu. I tempoki simbela-mbela ai komi, maalusu pangkeniakaki, ewa sadua tina anu mokadipuraka anana. 8 Ewa etumo kami, i rara kamaasiki si komi baria wule mokiraka komi Ngkora ni Pue Ala, agaiana ewa etu mbui katuwuki saduduaki ai komi, lawi kipokaasi komi. 9 Poka-poka, manoto nikaendo mpuu adiwa kawoweki mobago ni banimpia. Mabaa ba madedi mangkadelo liliu kami pangkoniki, bona ntena komi kipakapari tongoki mobambari Bambari Malompe anu lako si Pue Ala.
10 Niinsani kamanotona babeiaki si komi anu mepotuu si Pue Yesu. Manoto babeiaki, baria ria kamasalaki. Komi anu mewali sabiki simbela-mbela ai i Pue Ala. 11 Niinsanimo pekadipurakaki si komi sadua ai sadua, ewa sadua uma anu mokadipuraka anana. Kipakaroso rarami ai kikiraka komi patudu, 12 ai kiperade mpii, bona babeiami mangula peundea ni Pue Ala anu moronde komi, i rara peparentaNa ai peawaNa.
13 Ria mani sampangka anu molike raraki manguli liliu maisi kalompena si Pue Ala. Ngkora ni Pue anu niepe lako si kami, baria nidoko ewa lolita anu lako i manusia ngkida. Agaiana nidokoda i kamonso-monsona bambari etu lako si Pue Ala. Ai ei-ei, Ngkora ni Pue Ala etu mokale liliu i rarami, lawi mepotuumo komi si Pue Yesu. 14 Kiinsani etu poka-poka, lawi apa anu mewali i topepotuu si Kerisitu i tana Yudea, mewali mbui si komi. Ewa i poka-pokata sampepepotuuta i tana Yudea rapopesiasi sira nu singka toYahudira, komi mbui rapopesiasi nu pokami sira. 15 Ni banimpia toYahudi aretu, mampopate sira nabi-nabi, ai i tempo ei-ei mampopate sira i Pue Yesu duduuna kami mbui rapopesiasira. Baria sira napokatono ni Pue Ala, ai mampombeiwalika sira ope-ope tau. 16 Lawi rasombokira liliu kami bona ntena mobambari Bambari Malompe i tau anu baria sira toYahudi, anu pensani mosore sira lako i suku dosara. Mewali nakeningka ratambaira liliu babeiara anu madaa, melumbu mpuumo dosara, etumo mpane mansumba sira karumpu ni Pue Ala.
I Paulu mampenoka mosondaki mbuimo toTesalonika
17 Poka-poka, lako i pogaata anu sangka ei, mabila mpuu kami si komi. Nauda kita baria mombeita, ria liliu komi i raraki. Nakeningkabilaki, kikadelo mpuu dala bona lau kami mensonda si komi. 18 Riamo tunggaiaki lau mosondaki komi. Aku i Paulu, basangkia mbelamo kutunggai lau si komi, agaiana Datu nu Seta mosomboki liliu aku. 19 Kipenoka mpuu mosondaki komi, lawi ane dongka luwu Pueta i Pue Yesu mpane mogulu kita i lioNa, komimo anu mewali wua nu pobagoki anu kipokatono. I tempo etu, ina mabose mpii katono nu raraki nakeningka komina. 20 Batena komi anu kipomabose, ai anu kipokatono!