Sura ni Suro Paulu anu mpolinguruna napakatuka jumaa i kota
Tesalonika
1
1 Sura ei lako si kami: i Paulu, i Silas ai i Timotiu. Kipakatu i poka-pokaki sampepepotuuki i Tesalonika anu menomba si Pue Ala Tuamata ai si Pue Yesu Kerisitu! Mekakae kami si Pue Ala bona Nawati komi i sukana kabula nu raraNa ai Nakiraka komi kalompe nu katuwu.I Paulu manguli maisi kalompena si Pue Ala nakenimpepotuu nu toTesalonika
2 Poka-poka, sangangaa manguli kami maisi kalompena si Pue Ala, nakeningka komina. 3 Ane mekakae kami si Pue Ala Tuamata, kikaendo liliu pobagomi si Pue nakenimpepotuumi, kikaendo liliu petulungimi i rangami nakeningkamaasimi ai kikaendo liliu katetidami i rara nu kapari nakenimpesarumakami i kadongkaNa mpesola i Yesu Kerisitu Pueta. 4 Kiinsani poka-poka, i Pue Ala mampokakaia komi ai komimo anu tepelisi Napopewali tauNa. 5 Kiinsani etu, lawi tempoki mobambari Bambari Malompe si komi, baria wule lolita ngkida anu kipadongka. Agaiana lolita ei kipadongka i rara nu kuasa lako si Pue Ala ai Inosa Magali. Ai kipotuu mpuu kamonsona Bambari Malompe etu. Nakeningka niinsani adiwa babeiaki i tempoki mani simbela-mbela ai komi.
6 Ai komi poka-poka, awetu niepe Bambari Malompe etu, nipeulaimo babeiaki ai babeia ni Pue Yesu. Lawi nauda maruminsi karapopesiasimi, matono liliu rarami modoko Bambari Malompe. Kamatonomi etu nakiraka komi nu Inosa Magali. 7 Mewali, ei-ei babeiami rapeulai nu ope-ope poka-pokami sampepepotuumi i tana Makedonia ai i Akaya. 8-9 Lawi mepuu lako si komi, Ngkora ni Pue rabambari i sumalele Makedonia ai i Akaya. I raoa lako i se etu, pepotuumi si Pue Ala imba-imba ngkida rapololita. Mewali, i ope-ope boea anu kikalaungi, tumpu boea i se etu manginsani adiwa ka nidokoki. Bariamo kami paraluu mopadongka ba apa-apa, lawi tau aretu raeperamo bambari anu manguli adiwa ka nipawiana menomba i anitu, katebaliki nu rarami ai pengkorumi si Pue Ala anu manoto ai anu tuwu liliu. 10 Tau aretu mampololita mbui sira, adiwa ka nipegiana kadongkaNa Ana ni Pue Ala lako i suruga. Iamo i Yesu anu napatuwu mpesola ni Pue Ala lako i kamate. I Yesumo anu mosore kita lako i karumpu ni Pue Ala, anu ina morumpa tau anu baria sira mepotuu si Ia.