4
1 Mewali poka anu kupokaasi ai anu kukabilai: nipakaroso pepotuumi si Pue. Komimo anu kupomabose ai anu kupokatono rara.Patudu anu kasopoana
2 Pokaku Euodia ai pokaku Sintike! Kuperade bona sintuwu komi ewa anu sintoto i tau anu mepotuu si Pue. 3 Mpane kuperade si iko, Sunsugos, rangaku anu tetida, nutulungi sira towawine anu rodua aretu, bona inee sira mosisala. Tongoku mani simbela-mbela ai komi, madota sira mamporangai aku mopadongka Bambari Malompe simbela-mbela ai i Klemens ai rangaku anu sampopobago ntanina. Sangara ope-ope, ria teuki i rara Sura Ngkatuwu.
4 Poka-poka, sangangaa matono liliu komi nakenimposintuwumi ai i Pue. Sambela mani kuuli: sangangaa matono komi!
5 Kusarumaka ope-ope tau ina mangita kalompe nu rarami i rara pangkeniakami. Nikaendo, bariamo masae ina dongka i Pue! 6 Inee karao rarami. Inee komi mampokaeka ba apa ngkida. I pangka-pangkana mekakae liliu komi, merade komi si Pue Ala apa anu niparaluu, niuli ai popadongkami maisi kalompena si Ia. 7 Mewali kalene rara lako si Pue Ala anu baria pensani nasumba mpekiri nu manusia, ina mokampai rarami ai pekirimi anu mosintuwumo ai i Yesu Kerisitu.
8 Kasopoana poka, kuperade bona nipairara liliu sinangkana anu malompe ai anu sintoto ratoia. Apa anu mamonso, apa anu sintoto, apa anu manoto, apa anu magali, apa anu merae, ai apa anu teadai, etumo anu sangangaa nipairara. 9 Apa anu nipegurui lako si aku, malompe patuduku anu niepe ai anu nidoko, awetu mbui babeiaku anu niita, etumo anu sangangaa nibabei. Ane ewa etu nibabei, i Pue Ala puu nu kalene rara ina mamporangai komi.
I Paulu manguli maisi kalompena i toPilipi
10 Matono mpuu raraku poka-poka, ai motoia aku i Pue, lawi nauda masaemo kita mogaa, batena nipakatuka aku petulungimi. Baria kuuli kabariakumo nikaendo ni banimpia. Nikaendo liliu aku, agaiana ni tempo etu baria mani komi mampaka motulungi aku. 11 Tunggaiaku manguli ewa etu baria nakeningkamakuraku, lawi kupari-parimo bona kupobiasa mamposondoka apa anu ria si aku. 12 Pensani aku tuwu i anu-anu, anu saudi ngkida, pensani mbui aku tuwu i anu-anu, anu maisi. Nauda ba apa anu morumpa aku, kupakatono liliu raraku malompe i tempo mabosu, malompe i tempo oro, nakariangi ba baria nakariangi. 13 Mewali kubuku mampombelioka sinangka anu merumpa, lawi i Kerisitu anu mokiraka aku Kuasa mopakaroso raraku. 14 Agaiana nauda ewa etu, malompe mpuu rarami motulungi aku tongoku i rara kapari ei.
15 Pokaku toPilipi, niinsani mpuu saduduami ni banimpia ka kupepuuna mopadongka Bambari Malompe si komi, kalambuku lako i tana Makedonia, baria ria jumaa ntanina anu motulungi aku. Batena ngkida komi anu motulungi aku ni tempo etu. 16 Ai baria etu ngkida, agaiana kamakuraku ni tempoku mani i kota Tesalonika, basangkia mbelamo nipakatuka aku mai apa anu kuparaluu. 17 Tunggaiaku manguli ewa etu, baria wule kupenoka modoko pokirami, agaiana anu kupenoka si komi iamo bona kalalaua maisi babeiami anu malompe, duduuna i Pue Ala mosurungi kalompemi. 18 Mewali bona niinsani: ope-ope anu nipakatu, kusumbamo lako si Epafroditus. Pakatumi etu baria wule sondo, agaiana melabi lako i apa anu kuparaluu. Kabula rarami etu ewa anu-anu, anu mawongi anu nipopenomba si Pue Ala. Popenombami etu Naunde mpuu, ai matono raraNa modoko. 19 I Pue Ala anu kupenombai, Iamo anu ina moparia sinangka anu niparaluu, mangula kapebuku ai peawaNa mampoliungi Yesu Kerisitu. 20 Tetoiamo i Pue Ala Tuamata duduuna kasae-saeana. Amin.
Tabea anu kasopoana
21 Padongka tabeaku i ope-ope tau anu napelisi ni Pue Ala anu ria i se etu. Nidoko mbui tabea lako i pokami sampepepotuu anu ria sira simbela-mbela ai aku i se ei. 22 Ope-ope tau ni Pue Ala i kota ei, pelumbunamo sira anu ria i tombi ni Kaisar, mopakatu tabea si komi. 23 Pueta i Yesu Kerisitu mowati komi ope-ope.