Inee kita mampemabose nakeningkalompe nu babeiata ba peulata i atura agama
3
1 Mewali poka-poka, sangangaa matono komi, lawi mosintuwu komi ai i Pue.Baria kupomapari mosolaki apa anu kuuki ni banimpia, lawi etu malompe i katesoremami. 2 Mainga-inga komi i tau anu mangkeni patudu anu madaa. Lawi babeiara merikati ewa babeia nu dike. Rapenokara mopari-pari tau sira bona ratindi. 3 Kamonsona kita ei anu modokomo petindi anu mamonso, baria sira. Lawi menomba kita si Pue Ala mangula penini nu InosaNa, ai tapomabose posintuwuta ai i Yesu Kerisitu. Baria kita mesarumaka i ada anu tongawa kamanotona i raoana ngkida bona mewali kita manoto i petotoki ni Pue Ala.
4 Kamonsona, ane kuunde, pensani mbui aku mesarumaka i ada etu. Ane ria tau anu manguli maruminsi pangulara ada anu tongawa i raoana ngkida kalompena, pelumbunamo aku! 5 Lawi awetu walu eomo tinuwuku, ratindimo aku mangula Atura ni Musa. Lawi toIbrania mpuu aku. Aku, pemulea nu toSaraeli lako i pemulea ni Benyami. Lako baria mani aku mepotuu si Pue Yesu, kupeulai asa Atura ni Musa mangula pepatudu nu toParisi. 6 Ni tempo etu kupeulai mpuu agama Yahudi, duduuna kupari-pari mampopesiasi jumaa anu mepotuu si Yesu. Kupeulaimo sinangka parenta anu teuki i rara Atura ni Musa, baria ria tau anu pensani mansumba kamasalaku. 7 Ni banimpia ope-ope etu kuimba pewati si aku. Agaiana ei-ei kuuli anu mepakarugi ngkida, lawi i Kerisitu ngkida pesarumakaaku.
8 Mewali, ei-ei kuinsani: sinangkana etu baria mobundu si aku, lawi ria anu melumbu kalompena, iamo ka kuinsaninamo i Yesu Kerisitu Pueta. Etumo mpane kupawiamo ope-opena etu. Ope-opena etu kuimba ngkida anu mopakarugi peulaku si Kerisitu, 9 ai posintuwuku ai Ia. Bariamo kupari-pari saduduaku mewali manoto i lio ni Pue Ala ai babeiaku saduduaku nakeningkamatunduku i Atura ni Musa. Agaiana i Pue Ala anu mopakanoto kamanotoku nakenimpepotuuku si Kerisitu. Nakeningkabula rara ni Pue Ala mampopewali aku manoto i petotokiNa. 10 Kupenoka manginsani i Kerisitu i rara nu katuwuku, bona mansumba aku kuasa ewa kuasa ni Pue Ala anu Napake mopatuwu mpesola i Yesu lako i kamate. Kupenoka mansumba kapari ai kamate, ewa anu Nasumba ni Yesu, 11 lawi maruminsi mpii ka kupotuuna, kaina rapatuwuku mpesola lako i kamate.
I Paulu mopari-pari meula si Kerisitu
12 Poka-poka, baria kuuli ka kuinsanina mpuumo i Kerisitu duduuna magali aku ai bariamo ria dosaku. Baria kowo! Agaiana kupari-pari bona mewali aku simbela ai Ia, lawi ewa etumo tunggaia ni Yesu Kerisitu anu moronde aku mewali tauNa. 13 Pokaku ope-ope, kamonsona baria mani aku magali. Agaiana ria sampangka anu kubabei: malipamo raraku ope-ope anu kutalikuri, ai kupari-pari monontosi apa anu i lioku. 14 Etumo mpane kupari-pari melangka liliu lau i tunggaiaku anu kasopoana bona mansumba hadia, iamo katuwu i suruga; etumo tunggaia ni Pue Ala moronde kita mampoliungi i Yesu Kerisitu.
15 Mewali, sangangaa ewa etu mbui pampekirita, kita anu manginaomo i rara mpepotuuta si Kerisitu. Agaiana ane ria i olomi anu ntanina pampekirina, i Pue Ala anu ina mopakanotoka komi patudu anu mamonso. 16 Anu paraluu mpii iamo sangangaa tapari-pari mampeulai peundea ni Pue Ala sintoto ai apa anu tainsanimo.
Mainga-inga i tau anu madaa babeiara
17 Pokaku ope-ope, kuperade bona nipairara ai nipeulai babeiaku. Kikirakamo komi pandiri anu malompe, sangangaa nipeulai pandiri nu tau anu mangula babeiaki. 18 Lawi apa anu paka kuulika komi, etu mbui anu kuulika komi ei-ei i rara nu potumangiku: mawori sira tau anu mopangaku ka sirana tau anu mepotuu si Kerisitu, agaiana madaa babeiara ai mopakarugi lempo nu kamate ni Kerisitu i kau anu rapopombesape. 19 Tau anu ewa etu, batera ina mansumba karopu. Menomba sira i peundea nu wotora saduduara. Mampomabose sira babeiara anu mepakaea. Mopailodo sira katuwura i dunia ei. 20 Agaiana kita eimo tumpu suruga. Ai lako si ndete, tapegia mpuu kamai nu Topesoremata i Yesu Kerisitu. 21 Ane mai Ia luwu, Ia ina mobaliki wotota anu malede ei bona simbela ai wotoNa anu meawa mpii mangula kuasaNa anu melumbu lako i ope-ope kuasa anu ntanina. Ai kuasaNa etu, ina mampopengkoru sinangkana si Ia.