Mosintuwu komi ai mengkaiwoi komi mangula pandiri ni Yesu
2
1 Mewali poka, maroso rarami nakenimposintuwumi ai i Kerisitu. Malene rarami lawi napokaasi komi ni Kerisitu. Naporangai liliu komi nu Inosa Magali. Mombepokaasi komi sadua ai sadua. 2 Etumo mpane kuperade bona nipakabuke mpii katono raraku, ai posintuwumi sadua ai sadua i rara pombepokaasimi, i kasampempekirimi, ai i rarana popasambuami tunggaiami. 3 Inee nipailodo kalompe nu wotomi saduduami, inee komi mampemabose. Aginamo sadua-sadua kita mengkaiwoi, ai sangangaa taimba rangata melumbu lako si kita. 4 Inee wule mampekiri kita wotota saduduata, sangangaa tapekiri mbui katuwu nu rangata.5 Pampekirita sangangaa ewa pampekiri ni Yesu Kerisitu.
6 Naudapae katuwu ni Kerisitu simbela ai i Pue Ala,
agaiana katuwuNa anu simbela ai i Pue Ala etu, baria Naimba mewali sambua pempatoroaNa.
7 Agaiana Napawia sinangkana etu,
mpane tuwu Ia ewa batua.
Mewali Ia ewa manusia,
mpane katuwuNa simbela ai katuwu nu manusia.
8 Ni tempoNa tuwu ewa manusia i wongko dunia ei,
mengkaiwoi Ia mangula parenta ni Pue Ala,
duduuna mamate rapaku i kau anu rapopombesape.
9 Etumo mpane i Pue Ala mampomabose i Kerisitu i pomesoa anu meawa,
mpane Nakiraka kuasa anu melumbu lako i ope-ope kuasa anu ria,
10 bona ope-ope anu tuwu mengkoru si Yesu,
malompe isi nu suruga,
malompe isi nu dunia,
awetu mbui anu i pearia nu tomate;
ope-ope sira ina molingkudu menomba si Ia,
11 mpane mopangaku: i Yesu Kerisitu iamo Pue,
duduuna i Pue Ala Tuamata rapomabose.
I Pue Ala mampopokale rarata bona mampeulai kita peundeaNa
12 Mewali poka-poka anu kupokaasi, kuinsani peulami i parentaku tongoku mani ria simbela-mbela ai komi. Pelumbunamo ei-ei i tempoku karao lako si komi. Nasoremamo komi ni Pue Ala, mewali sangangaa nipari-pari liliu bona kalompe nu katuwumi tepabukei mpii. Nibabeimode etu i kabukena pebilami ai kaekami si Pue Ala. 13 Lawi i Pue Ala anu mampopokale rarami, mpane niunde mangula peundeaNa mpane Nakiraka komi karoso mampeulai peundeaNa.
14 I pangka-pangkana anu nibabei, inee komi modeade ba mombesonoi, 15 bona tongawa i ope-ope tau ka komina ana ni Pue Ala, anu baria ria kamasalami, anu magali katuwumi ai anu baria ria tunggaiami anu madaa. Ewa betue anu mewangka i rara nu kadediana, ewa etu mbui komi anu meari i olo nu tau anu motengko babeiara ai anu madaa rarara, 16 lawi nipeulai Bambari Malompe anu moparia katuwu. Mewali poka-poka, ane ewa etu liliu babeiami, ina matono raraku i kadongka mpesola ni Kerisitu, lawi babeiami etu anu mopakanoto kabariana mbero-mbero ope-ope bagoku i olomi, agaiana ria mpuu wuana.
17 Ane aku rapopate, ai raaku rabubu i wongko nu popenombami si Pue Ala, etu mewali tanda pepotuumi si Ia. Ane rapana sangangaa mamate aku nakeningka komina, batena matono aku simbela-mbela ai komi. 18 Kusarumaka mbui bona ina matono komi simbela-mbela ai aku.
I Paulu motoia i Timotiu ai i Epafroditus nakenimpobagora si Pue
19 Mewali kupotuu i rara mpetulungi ni Pue Yesu, peundeaku bona maliga motudu i Timotiu lau mosondaki komi, bona ane mesola ia mai, ina malene aku mangepe bambarimi. 20 I olo nu tau anu ria sira i se ei, batena ngkida i Timotiu anu sampepekiri ai aku, lawi iamo anu mampenoka bona komi mansumba lompe ngkatuwu. 21 Anu ntanina sira, mampekiri ngkida sira wotora saduduara, baria sira mampekiri peundea ni Yesu Kerisitu. 22 Komi saduduami mangitamo katongawaana i Timotiu mobundu, lawi ia mobago simbela-mbela ai aku mopadongka Bambari Malompe. Mpane i Timotiu ei kuimba ewa anaku i rara pobagoki. 23 Mewali, awetu kuinsani adiwa karabotusina kara-karaku luwu, ina kutudu ia lau mosondaki komi. 24 Ai kupotuu nakenimpetulungi ni Pue, bariamo masae ina lau mbui aku mosondaki komi.
25 Ane pokata i Epafroditus, anu mamporangaimo aku i rara mpopari-pariku mampobago bago ni Pue, anu nitudu mai modurei aku, aginamo kutudu mpesola lau si komi. 26 Lawi mabila mpuumo ia si komi ope-ope, ai mapari rarana lawi niepemo kamaduana. 27 Maruminsi kamaduana, kemamate ia. Agaiana maosamo ia lawi napokaasi ni Pue Ala. Baria wule ia anu napokaasi ni Pue Ala, aku mbui anu Napokaasi, lawi ane mamate ia, ina tetambai kawiorana raraku. 28 Etumo puuna mpane ina kutudu mesola maliga lau si komi, bona ane momberumpa komi ai ia, ina malene komi, mpane raraku ei ina malene. 29 Mewali, nidokomode ia i katono rarami ewa nibabei i ope-ope pokami anu sampepepotuu. Nibila mbui ope-ope tau anu simbela ai pangkeniakana. 30 Nakenimpobagona si Kerisitu, ina mangkeni ia i kamate. Baria mpuu ia mampekiri wotona saduduana, lawi mampenoka motulungi aku i se ei. Ia mopasuru komi, lawi baria komi mampaka motulungi aku.