Pilipi 1

Sura ni Suro Paulu anu napakatuka jumaa i kota

Pilipi

1 Sura ei anu lako si kami i Paulu ai i Timotiu, suro ni Yesu Kerisitu, kipakatuka komi pokaki anu napelisi ni Pue Ala i kota Pilipi, ai i tau anu mampopolumako bago ni Pue i olomi, malompe tadulakomi, awetu mbui diaken. 2 Mekakae aku si Pue Ala Tuamata ai si Pue Yesu Kerisitu bona mokiraka komi pewati ai kalompe nu katuwu.

I Paulu mampekakaeka jumaa

3 Poka-poka, bela-belana kukaendo komi, kuuli maisi kalompena si Pue Ala. 4 Mpane i rara nu pekakaeku, matono mpuu raraku bela-belana aku mampekakaeka komi ope-ope. 5 Kuuli maisi kalompena si Pue Ala lawi lako ni mpolinguruna mangepemo komi Bambari Malompe duduuna ei-ei, nidurei liliu aku i rara nu pobagoku mopadongka Bambari Malompe anu lako si Pue Ala. 6 Kamonsona i Pue Alada anu mampepuu bago anu malompe etu si komi. Kupotuu ka i Pue Alana anu mopaliliu bagoNa etu, duduuna Napasopo i eo kadongka mpesola ni Yesu Kerisitu. 7 Sintoto mpuu pampekiriku ewa etu si komi ope-ope, lawi komi poka-poka magompi liliu komi i raraku. Lawi komi mbui simbela-mbela ai aku modoko pewati anu nakira ni Pue Ala, malompe tongoku ratarunggu awetu mbui tempoku baria ratarunggu, bona morosongi kamonsona Bambari Malompe etu i tau sira. 8 I Pue Ala manginsani kamonsona pololitaku ei: i rara nu kamaasi ni Yesu Kerisitu, maruminsi mpuu ka kukabilaimi.

9 Mewali, eimo pekakaeku si Pue Ala, bona kalalaua tetambai liliu kamaasimi si Pue Ala ai i singka rangami, ai tetambai mbui kamatopami manginsani apa anu mamonso, duduuna niinsani mampopontani apa anu manoto ai apa anu masala. 10 Etumo mpane, niinsani mampelisi dala anu malompe, bona magali katuwumi duduuna bariamo ria kamasalami i eo kadongka mpesola ni Kerisitu. 11 Katuwumi ina buke ai babeia anu manoto, anu wule pensani napopowua ni Yesu Kerisitu saduduaNa. Mpane i Pue Ala ina rapopeawa ai ratoia.

Nakeningka ratarunggu ni Paulu, mawori tau mangepe Bambari Malompe

12 Mewali poka-poka bona niinsani, nakeningka ratarungguku kalalaua mawori tau mangepe ai mepotuu i Bambari Malompe. 13 Lawi surudado anu mokampai tombi nu datu ai ope-ope tau i se ei, manginsani puuna mpane aku ratarunggu, iamo nakenimpeulaku si Kerisitu. 14 Ewa etu mbui, tepakaroso pepotuu nu tau anu mepotuu si Kerisitu i se ei, lawi mangita sira adiwa i Pue motulungi aku i karatarungguku, duduuna bariamo sira maeka, kalalaua pebaida sira mopadongka Ngkora ni Pue Ala.

15 Ria sira anu mangkeni bambari kono si Kerisitu, nakeningkasina nu rarara ai rapenokara mamposisalaka aku. Agaiana ria mbui sira anu mangkeni bambari etu nakeningkabula nu rarara. 16 Sira aretu mopadongka bambari kono si Kerisitu, nakeningkamaasira si aku ai si Pue Ala, lawi rainsanira ka akuna anu naongko ni Pue Ala mewali suroNa, anu morosongi kamonsona Bambari Malompe i ope-ope tau. 17 Agaiana tau anu masina aretu, mopadongka sira bambari kono si Kerisitu lako i rarara anu madaa, lawi raundera mopakabose sangara saduduara. Tunggaiara bona motambai kapariku i rara nu tarunggu.

18 Agaiana nauda ewa etu, baria sira kupairara. Lawi nauda ba adiwa tunggaiara, malompe ba baria malompe, bambari kono si Kerisitu batena rabambari liliu. Etu anu kupokatono. Ai batena matono liliu aku, 19 lawi kuinsani nakenimpekakaemi ai nakenimpetulungi nu Inosa Magali anu lako si Yesu Kerisitu, batena rapawia aku lako i tarunggu. 20 Peundeaku ai pesarumakaku, bona baria aku maea mampopolumako bagoku anu napakanotokamo ni Pue Ala si aku. Kusarumaka ina pebai aku mopadongka liliu posabikiku, pelumbunamo ei-ei, bona kupakabose sanga ni Kerisitu, malompe i katuwuku, awetu mbui i kamateku.

21 Lawi tunggaia nu katuwuku, bona mopakabose i Kerisitu. Ai ane mamate aku, morasi mpuu aku. 22 Agaiana ane tuwu mani aku i dunia ei, pensani mani aku mampopolumako bago anu mobundu. Mewali, baria kuinsani umba anu kupelisi. 23 Anu rompangka etu mombedii mani i raraku. Kupenoka mopalengi dunia ei mpane lau aku meari simbela-mbela ai i Kerisitu, lawi etu anu malompe mpii. 24 Agaiana ane tuwu mani aku i dunia ei, maisi pobunduana si komi poka-poka, lawi niparaluu mani aku. 25 Etu anu manoto i raraku. Etumo mpane kuuli, batena tuwu mani aku, ai ina kudoa mani tempo lau mosondaki komi ai motulungi komi bona tetambai karosona pepotuumi si Pue Yesu ai tetambai mbui kamatonomi mepotuu si Ia. 26 Mewali, ane dongka aku si komi luwu, ina tetambai kamatonomi ai petoiami si Yesu Kerisitu nakeningka rapawiaku lako i tarunggu.

Babeiata sangangaa sintoto ai Ngkora Magali

27 Mewali, nauda ba apa anu mewali si aku, babeiami sangangaa sintoto ewa tau anu mangula Bambari Malompe kono si Kerisitu. Sangangaa nibabei ewa etu, bona ane kupomberumpaka mani komi ba bariamo, ina kuinsani karosona posintuwumi, ai pepotuumi sintoto ai Bambari Malompe. 28 Inee mpuu komi maeka i tau anu moewa komi. Nakeningkaetunamo anu mamponotoka sira, kaina nasukuna sira ni Pue Ala, mpane komi poka-poka manotomo kaina nasoremami ni Pue Ala. 29 Lawi i Pue Ala mokirakamo komi pewati, baria wule pewati mepotuu komi si Kerisitu, agaiana ria mbui pewati mantodisa komi nakeningka i Kerisituna. 30 Mewali i tempo ei, komi mbui simbela-mbela ai aku i rara nu kapari anu simbela; iamo anu niitami kupari-pari ni banimpia, ai kupari-pari mani dongka ei-ei, ewa anu niepemo ei-ei.