AIBIRANIA
Mantû ma baarûa îno
Mwandîki wa baarûa îno atiiyîkeene n'ûû, îndî athoomi bamwe bathûgaanagia bakauga i mûtûmwa Paûrû aamîandîkire.
Itûmi bia kwandîka i biîrî. Kîa mbere, i kwonania bûra Kîrîstû arî ûmûnene, na bûra aûyûrangiirie *Kîrîîkanîro Gîîkûrû. Gîtûmi kîa biîrî, i kwîra athoomi bamenyeere batikaume wîtîgioni bwao bûra beetîgîîtie Kîrîstû. Îndî tika mwandîki akuuga kûrî we wa bara aandîkîrîte aumîîte wîtîgioni. Augîîte baarûa yake i ntûmwa ya gwîkîra antû wîru (thooma 13:22) bakaraga baririkeene mawîrane ma Ngai kîrî bara barî baake, na bakaraga barî na wîrîgîîro bwa kwîgua barî na ngwatanîro n'we gûkûrûkîîra kîrî Kîrîstû ûra arî îgûrû.
Mwandîki agweteete maandîko kuuma Kîrîîkanîroni Gîîkûrû. Mûno mûno, aarîîrîîtie mantû ma *athînjîri ba Ngai na ngûgî îra baarutaga ya kûrutîra Ngai igongwana. Mwandîki noonanîîtie atî Kîrîîkanîro Gîîkûrû igîkuuga kûrî “Kîrîîkanîro Kîîyerû.” Oonanîîtie kwîruta kûra Kîrîstû eerutire aarûtha kwenda kwa Ngai mwanka aûragwa arî kîgongwana, kîgongwana gîku igîkûrûkîîte kîa nyamû ira ciarutagwa îgiita rîa Kîrîîkanîro Gîîkûrû. Kîgongwana gîa Kîrîstû kîtheragia antû bara bamwîtîgagia bakathira meeyia ndeeni yao (thooma 10:5-10).
Mwandîki wa baarûa îno agweteete mantû ma Kîrîîkanîro Gîîkûrû akîringithanagia na Akîrîstû ba ntugû ino, akîonanagia Kîrîstû n'ûû, kûra agweteetwe Kîrîîkanîroni Gîîkûrû (thooma 1:5, 8-12), na kûra aarîîtie arî we wengwa (thooma 2:12-13; 10:5-10). Icuncîîni bira bingî, na mûno mûno, ta Gîcu. 11, mwandîki oonanîîtie Kîrîîkanîro Gîîkûrû kîeyanîîte rûgono rwa antû ba Ngai na atwonia bûra baamwîtîgîîtie bûgana.
Gwookubî baarûa îno îkarî ûûgû:
Mwana wa Ngai n'ûmûnene (1:1-4)
Yiesû n'we mûnene kîrî araîka (1:5-14)
Wonokio bûûnene (2:1-18)
Yiesû n'we mûnene kîrî Musa na Njosua (3:1-4:13)
Yiesû i mûthînjîri ûra mûnene wa Ngai (4:14-7:28)
Yiesû aareeta kîrîîkanîro kîîyerû (8:1-9:22)
Yiesû eerutire arî kîgongwana rîmwe na rîa mûthia (9:23-10:31)
Ngerekano cia antû baarî na wîtîgio bûûnene kîrî Ngai (11:1-40)
Mîgambo ya mûthia ya gwîkîra athoomi wîru (12:1-13:19)
Îromba rîa mwandîki na nkeethi (13:20-25)