PIREMONI
Nkeethi
1
1 I niû Paûrû ngûkwandîkîra baarûa îno ndî nceera n'ûntû bwa Kîrîstû Yiesû. Ndîkwandîkîra tûrî amwe na mûruayia Timotheo, woû Firemoni mwendwa wetû na mûruti ngûgî îmwe naati, 2 mwarayia Apia, Arikipas ûmwe wa njûûrî yetû na antû bonthe ba kanica bara barîîkanaga agu mûciî waku.3 Ngai Baaba wetû na Mwathani Yiesû Kîrîstû baroobwaa ûtugi na ûkiri.
Nkaatho n'ûntû bwa wendo na wîtîgio bwa Firemoni
4 Rîra nkûririkanaga marombaani maakwa rîonthe incookagîria Ngai wakwa nkaatho 5 n'ûntû imbîgagua bûra wîtîgio bwaku bûgana kîrî Mwathani Yiesû, na wendo bwaku kîrî antû bonthe ba Ngai. 6 Îromba rîakwa n'atî ngwatanîro îra tûrî n'yo wîtîgioni bwetû îkongeera gûciûkîrwa gwa ûntû bwega bunthe bûra tûrî nabu ndeeni ya Kîrîstû. 7 Wendo bwaku, mûruayia, i bûtûmîîte nkena mûno na bwambîkîra wîru mûno ndaririkana bûra ûbooreereetie nkoro cia antû ba Ngai.
Paûrû akîûrîria Onesimas eetîgîîrua gûcooka
8 Na kinya ûkeegua n'ûntû bwa Kîrîstû ndî na ûcamba bwa gûkwîra ûrûthe bûra ûbatîîrue ûrûtha, 9 n'ûntû bwa wendo ndîona i kaaba nkûûrîîtie kwa wendi bwaku ûrûthe bûra nkwenda. Kaîrî ririkana niû Paûrû ndî mûkûrû na îîndî ndî nceera n'ûntû bwa Kîrîstû Yiesû. 10 Mantû mara nkwenda gûkûûria i mantû ma Onesimas ûra aatuîkire mwana wakwa mantûûni ma wîtîgio ndî gûkû nceera. 11 Mbereeni atiraarî na gîtûmi kîrî woû. Îndî îîndî arî na gîtûmi mûno kîrî woû na niû.
12 I mbendeete Onesimas mûno, îndî ndamwîra acooke gwaku. 13 Nkîenda gûkara n'we agînteethagîîria bantû aaku îîndî ndî nceera n'ûntû bwa ntheto îmbega, 14 îndî ingî gûtirî bu naani nkwenda kwîthuurîra ûtaambîîte kûmbîtîgîîria. Ntienda gûkwîra nwa mwanka ûnteethie n'ûntû i woû wengwa ûbatîîrue wîgua nûkwenda gûnteethia ûtagûkinyîîrua. 15 Waûmba kwîgua Onesimas araumîîte gwaku kagiita gaku gaakai, kaingo acooka bûtûûrania bûtakîathûkana kaîrî. 16 Aticookeete arî ta nkombo akî, acookeete arî ûmwega nkûrûki ya nkombo. I mûruanyûkwe mwendwa. Ûkaaya kwîgua inkûmwona arî mûruayia ûmwega ûûgû rî, î woû ûkaamwona arî ûmwega ata arî nkombo yaku na arî mûruanyûkwe ndeeni ya Mwathani?
17 Kwoogu ûkaaya kwîgua na mma ûnthûkagia tûrî kîmwe naawe, ndeenda ûmwîtîgîîria acooka gwaku ta bûra ûnthûkia mbûyîîte gwaku ndî niû. 18 Na waya kwîgua ka kûrî ûntû aakûrûthîra, kana n'îrandû rîaku arî narîo, ngakûrîa rîo ndî niû. 19 Ndîandîka mîgambo îno na njara ciakwa ningwa, i niû Paûrû nkaarîa! (Îndî ntikwenda gûkwîra wana woû ûrî na îrandû rîakwa, ta rîo mwoyo waku.) 20 Kwoogu, mûruayia, ndîenda ûndûthîra ûntû bwega ndeeni ya Mwathani. Îkîra nkoro yakwa wîru ndeeni ya Kîrîstû.
21 Ndîkwandîkîra ngîtîgagia ûkaarûtha ûgu ndakwîra. Na inkûmenya ûkaarûtha kinya nkûrûki. 22 Na bûngî nabu, ingûkûûria kwa wendi bwaku ûnthuuranîra bantû a gûkara, n'ûntû inkwîrîgîîra Ngai akaambotithia mbîgue ndî amwe naabi kaîrî, kûringana na maromba meenu.
Nkeethi cia mûthia
23 Wana Epaburas tûrî n'we gûkû nceera n'ûntû bwa Kîrîstû Yiesû. Thûkia nkeethi ciake. 24 Kinya bara bangî tûrutaga nabo ngûgî: Maariko, Aristakas, Ndemas na Ruka bauga ûkeethue.
25 Ûtugi bwa Mwathani Yiesû Kîrîstû bûrookara naabi.