AIBIRANIA
Mwana wa Ngai
1
1 Tene Ngai aatûmîîre iroria magiita maingî na njîra inyingî kwaria na biûyûûyû. 2 Îndî ntugûûni ino cia kwingia mûbango wake, Ngai atûmîrîte Mwana wake kwaria naati. Ngai aûmbire nthîgûrû gûkûrûkîîra kîrî Mwana wake, na amûthuura akaathûkia bionthe birî rûgai rwake. 3 Mwana wa Ngai oonanagia mwago wa Îthe na amûtuatîîtie kûrû. N'we atûmaga bionthe bithi na mbere kwîgua birî oogo kwa inya ya kiugo gîake. Nyuma ya kwîruta atûthambia meeyia meetû, eetiirie îgûrû aakara nthî rûteere rwa ûrîo rwa Ngai ûra arî mûnene mûno.Mwana wa Ngai n'we mûnene kîrî araîka
4 Kwoogu i ta kwonania Mwana wa Ngai n'we mûnene mûno kîrî araîka, n'ûntû wana kinya riîtwa rîra Ngai aamwîtire rîrî gîtîîyo nkûrûki ya rîao. 5 Gûtirî rîo Ngai eera mûraîka,
“Woû ûrî mwana wakwa.
Îmunthî ngûtuîka abaagu.”
Na kaîrî Ngai augire,
“Ûkeegua ndî îthe,
n'we eegue arî mwana wakwa.”
6 Na kaîrî rîra Ngai agaatûma Mwana wake wa mbere nthîgûrû, augîîte,
“Araîka bonthe ba Ngai ibamûgonge.”
7 Îgûrû rîa araîka, *Maandîko Maatheru maugîîte,
“Ngai atuîkithagia araîka baake ruuo,
na aruti ngûgî baake ndîrîmbî cia mwanki.”
8 Îndî îgûrû rîa Mwana, Ngai augîîte,
“Wathani bwaku, woû Ngai, bûtikooro bûthira rî kana rî.
Wathanaga ûgîtûmagîra ûmma.
9 Wendeete wagîru, ûtiendeete ûthûûku.
Na i kîo n'ûntû Ngai, Ngai waku, akûthuurîîte,a
na akwa gîkeno nkûrûki ya bara bangî.”
10 Na kaîrî Maandîko Maatheru maugîîte,
“Mwathani, i woû waûmbire nthîgûrû kîambîrîriani,
na îgûrû i yûmba rîa njara ciaku.
11 Cio ikeenyangua, îndî woû ûgaatûûra.
Ikaathira cionthe ta nguo,
12 wikûnje, ûthûkie ingî.
Îndî woû ûtigarûkaga.
Ûgaatûûra tene na tene.”
13 Îndî gûtirî rîo Ngai eera mûraîka,
“Kara nthî rûteere rwakwa rwa ûrîo,
mwanka ntuîkithie anthû baaku
ûkinyo bwa magûrû maaku.”
14 Kwoogu araîka i ba ûû? Bo n'irundu bira Ngai atûmaga birî aruti ngûgî, biteethia bara akaa rûgai rwa wonokio.