Wonokio bûûnene
2
1 Gîku i kîo gîtûmaga wîgua nwa mwanka tûrûmîîre mantû mara tweerirwe, kaingo tûtabîtia njîra. 2 Mantû ma *watho mara Ngai aariirie agîtûmagîra araîka Kîrîmaani gîa Sinai imaayire kwonekana maarî ma mma. Ûra wonthe ataathîkagîra watho aakaanûkagua bûra kwaagîrîte. 3 Kwoogu n'ata tûtakîewa îkaanûkia twarega gwîtîgîra wonokio bûbû bûûnene, bûra bûgweteetwe nthetooni îmbega? Wonokio bûbû bwagwetirwe mbere i Mwathani we wengwa, bwacooka bwonanua i bwa mma kîrî tiû i bara baamwîgiirue akîaria. 4 Na Ngai naakûûyîîre na iriga, magegania, biama mwanya mwanya, na biewa bia Kîrundu Ûmûtheru bira eeyaga antû bara eendaga.Yiesû n'we atûreetaga wonokioni
5 Ngai ataathuura araîka batuîka aathani ba nthîgûrû îngî înjerû îra îkeegua îrî oogo, îra tûkwarîîria. 6 Kûrî bantû *Maandîko Maatheru maugîîte,
“Muntû îîndî n'ûû wakûmûthûgaanîria,
muntûa îîndî n'ûû wakûmûmenyeera?
7 Wamûtuîkithiirie ûmûniini kîrî araîka kwa îgiita rîîkai,b
wamwaa mwago na gîtîîyo.
Wamûtuîkithiirie mwathi wa bionthe bira waûmbire,
8 wamwere watho bwa kwathaga bionthe.”
Ngai aamwere watho bwa kwathaga bionthe, gûtirî kîo aatiga. Îndî kagiitaani gaka tûrî îîndî tûtionaga taka arî na watho bwa kwathaga bionthe. 9 Tûmwonaga arî Yiesû ûra “aatuîkithiirue ûmûniini kîrî araîka kwa îgiita rîîkai,”c arî na mwago na gîtîîyo kuumania na gîkuû kîra aakuire bantû a muntû wonthe n'ûntû bwa ûtugi bwa Ngai.
10 Yiesû n'we oonokanagia. Na kwoogu ikwagîrîte Ngai ûra aûmbire into bionthe, ûra abiigîîte oogo, atûma Yiesû eegua arî na mûkarîre ûtarî na mabîtia na njîra ya kûnyamaarua. Aarûthire ûgu kaingo antû baingî batuîka aana baake na batûûrania amwe n'we mwagooni wake. 11 Yiesû n'we atheragia antû bakauma meeyiani maao, na bara atheragia i ba îthe ûmwe n'we. Na gîku i kîo gîtûmi kîra gîtûmaga eegua rîtarî îgi kûbeeta aruagina na aaragina. 12 Eeraga Ngai,
“Ngakûmenyithania kîrî aruayia na aarayia,
nkainaga ndwîmbo cia gûgûkumia biîthîranooni.”
13 Kaîrî auga,
“Nkamwîtîgia.”
Na kaîrî augîîte,
“I niû ûyû amwe na aana bara Ngai athuurîîte
beegua barî amwe naani.”
14 Na n'ûntû aana baba n'antû baûmbîîtwe na nyama na nthakame, Yiesû wana we aakarire tabo mûûmbîreeni. Na gîtûmi gîa kûrûtha ûgu i kaingo na njîra ya gûkua gwake athiria Nkoma ûra arî inya ya gîkuû. 15 Kwoogu naûmbire kûthaûra bara baatwîre barî nkombo cia ûguaya bwa gîkuû mûtûûrîreeni wao unthe. 16 Igûkwoneka t'araîka Yiesû aayire gûteethia. Aayire gûteethia bara barî ba rûciaro rwa Îburaîmu.d 17 Kwoogu kwarî nwa atuîkire ta aruagina na aaragina na njîra cionthe, kaingo atuîka mûthînjîri ûra mûnene mwîtîgua kîrî Ngai, mûthînjîri arî kîao, aruta kîgongwana gîa kûthiria meeyia ma antû. 18 Na n'ûntû aranyamaarua na aragerua, nateethagia bara bageragua.