Gîtûmi gîa kûûmîîria îgiita rîa kînyamaara
12
1 Na kwoogu n'ûntû tûrî na gîkundi kîînene ûgu, kîra gîtûthiûrûkîîte gîa akûûyî ba wîtîgio, ga tuugieni rwîro rûra tûbatîîrue tûthi na mbere na kuugia tûrî na kûûmîîria. Na kaingo tûûmba kuugia, nwa mwanka tûtigane na kîra kîonthe gîtûrigagîîria na wîyia bûra bûtûkooragia. 2 Tûraitheeni Yiesû ûra aanjîîrie wîtîgio bwetû. N'we agaatûkinyia mûthia waabu. Naûmîîrie gîkuû kîra aakuire mûtharabaani, na eetîgîra aagîa îgi rîa gîkuû gîku ta gûtarî bu bwarî oogo, n'ûntû bwa gûkena kûra Ngai aamûkeneetie. Îîndî akari rûteere rwa Ngai rwa ûrîo rwa gîtî kîa ûnene. 3 Thûgaanîriani bûra gwakarîkire kîrî Yiesû, bûra aûmîîrie aanyamaarua n'antû ba meeyia bara baamûkararagia. Bwarûtha ûgu bûtiîgua bûkînogerwa nkorooni cienu kana bûthira wîru.4 Kûrûani kûra bûrûaga na meeyia bûtikûrî gûkinyia a kûruta mîoyo yenu. 5 Ka bûriganîrîtue i mîgambo ya kûbwîkîra wîru îra Ngai aaragia naabi ta aana baake?
“Mwana wakwa, ûtikaathûkie ta ûntû bûûthû
Ngai akwonia kûra ûbîtagîria.
Ûtigaakue nkoro akûthetia.
6 N'ûntû ûra Mwathani eendeete
n'we oonagia kûra abîtagîria.
Eeyaga îkaanûkia ûra wonthe
athûkagia arî mwana wake.”
7 Ûmîîriani rîra Ngai abwonia kûra bûbîtagîria, n'ûntû eegagua akîbûthûkia ta aana baake. Ga kûrî mwana atoonagua n'îthe kûra abîtagîria? 8 Ûkeegua bûtoonagua kûra bûbîtagîria, ta bûra aana bonthe boonagua, ûtiîgua bûrî aana ba mma, bwîgua bûrî ta aana bara baciaragîrwa mîciî bagakûra batarî beethe. 9 Twinthe tûreegua tûrî na babaaba gûkû nthîgûrû na itwabatîîyaga. Kwoogu anga tûtibatîîrue twînenkanîra kîrî wathani bwa Baaba wa mîoyo yetû, kaingo tûtûûra mwoyo? 10 Babaaba beetû baatwonagia kûra twabîtagîria gwa kagiita gaakai, kûringana na bûra boonaga bûrî bwega mûno. Îndî Ngai atwonagia kûra tûbîtagîria n'ûntû bwa ûteethio bwetû twingwa, kaingo twîgua tûrî na ûtheru ta bwake. 11 Rîra wîgagua tûkîonua kûra tûbîtagîria, tûtikenaga. Wîgagua tûkîîgua ûrûrû na tûtikenaga. Îndî nyumaani bara beegagua booneete baita kuumania na kwoneerua kûra babîtagîria, i boonaga maumithio ma wagîru na ûkiri.
12 Îgîani inya nkûrûki kûra bûtiraarî na ya kûgana. 13 Îthiini na mbere na njîra îra îbatîîrue kaingo ûra arî kîonje ataremwa kûthi, aûmbe kûgwata inya.
Athîkagîraani kayû ka Ngai
14 Cûûgiani mûno bûtûûranagieni na ûkiri na wa kîra muntû. Geriani na njîra cionthe gûtûûra bûrî baatheru, n'ûntû bwarega kûrûtha ûgu bûtiona Mwathani. 15 Îmenyeereeni gûtikeegue kûrî we atakîewa ûtugi bwa Ngai. Raithaani bwone gûtirî we arî na marûrû aaya gûtûma antû baingî bagîe thîînaani, beeyia. 16 Nwa mwanka bwone gûtirî we akûruta ngûgî cia ûmaramari, kana atatîîyaga Ngai ta Esaû ûra eendiirie ûrikithaathi bwake bwa mwana wa mbere na irio bia îrîa rîmwe. 17 I bwiyî nyumaani neendire kwewa kîthaarimo n'îthe, îndî îthe amûregeera. Atikîona bûra akîrûtha agarûrania bûra aarî akûrûtha amwe na kwîgua neendaga athaarimwa mûno mwanka aarîra.
18 Biû bûtaakinya Kîrîmaani gîa Sinai kîra kîûmba gûtongeka na njara, kîrî na mwanki ûgwakana, kîrumeene mwindu, kîrî na kîbuubani, 19 kayû ga karumbeeta na kayû ga kwaria. Rîra Aisiraeri beegiirue kayû kaaria, beerekanire bauga batikwenda kwîgua mûgambo ûngî. 20 Bataûmîîria watho bwa Ngai bûra augîîte, “Kinya nyamû yatongithia kîrîma, nîûragwe na maiga wa n'yo.” 21 Na wana Musa we wengwa naamakîîte mûno i bûra oonire mwanka auga, “Inkwinaina n'ûguaya.”
22 Îndî biû i bûkinyîîte Kîrîmaani gîa Sayuuni na Njerusaremu îngî înjerû ya îgûrû, taûni ya Ngai ûra atûûraga mwoyo. I bûkinyîîte kûra kûrî araîka ngiri itatarîka, 23 na kûrî kîîthîrano kîînene, kîrî na gîkeno, kîûthûrano kîa bara barî ta biîmbere bia Ngai bara mariîtwa maao maandîkîîtwe gûku îgûrû. I bûkinyîîte kîrî Ngai ûra arî mûgambithania wa bonthe, na kîrî irundu bia antû baagîru bara bathereetue. 24 I bûkinyîîte kîrî Yiesû, mwîguithania wa kîrîîkanîro kîîyerû gatîgatî ka Ngai na antû baake. Na i bûkinyîîte kîrî nthakame îra yamincagwa n'ûntû bwa meeyia, îra îtweyaga wîrîgîîro bwa mantû meega nkûrûki ya nthakame ya Abeeri.
25 Îîmenyeereni bûtikaarege kwathîkîra kayû ka Ngai rîra akwaria. Aisiraeri bara baaregire kwathîka bakwîgua kayû gaake akîaria arî gûkû nthîgûrû batoona wega. I thîîna îgana ata tûkoona twarega kûmwathîkîra akîaria arî îgûrû? 26 Kagiitaani kara, kayû gaake ikainainiirie nthîgûrû. Îndî îîndî augîîte, “Nkainainia nthîgûrû kaîrî, na ti nthîgûrû yonka îndî n'amwe na îgûrû rîene.” 27 Mûgambo ûyu, “kaîrî,” ûrîonania kîra kîonthe kîaûmbirwe gîkainainua na kîrutarutwe oogo, kaingo bira bitainiinîka bitigwa.