Kînogoko gîa antû ba Ngai
4
1 Ngai natwete wîrane atî twaûmba kûthi bantû ara atûthuuranîrîte a kûnogoka. Kwoogu twîmenyeereeni gûtikeegue kûrî na wacietû atakîthi noogo. 2 Tûtûmîîrîîtue ntheto îno mbega atî Ngai natûthuuranîrîte kînogoko, ta bûra yatûmîîrue kîrî bara Musa aatongoreerie bauma Miisiri. Îndî gûtirî bu yabateethia nabu n'ûntû bataamîtîgîra barî na wîtîgio. 3 Tiû bara tûmîîtîgîîtie twaûmba kûthi bantû agu a kûnogoka. Îndî îgûrû rîa antû babu, Ngai augîîte,“Nkûthûûra ndathiîtia ndauga,
‘Batikooro bakinya kûra mbathuuranîrîte
kûrî kînogoko kîao.’ ”
Ngai naugire ûgu wana wegua kînogoko gîku kîathuuranîîrwe kuuma wo rîra nthîgûrû yaûmbirwe. 4 Bantû ana *Maandîkooni Maatheru kwîrîîtwe, “Ntugû ya mûgwanja Ngai aanogoka akûthiria ngûgî ciake cionthe.” 5 I ntûma kwandîkîîtwe,
“Batikooro bakinya kûra mbathuuranîrîte
kûrî kînogoko kîao.”
6 Kwoogu bantû ara Ngai athuuranîrîte kînogoko arî woogo antû bathi. Îndî bara beegiirue ntheto îno mbega bataakinya noogo n'ûntû bwa kûrega kwathîka kwao.
7 I rîo Ngai aabangire ntugû îngî îgwîtwa “îmunthî.” Aamenyithaniirie yoo na Ndaundi nyuma ya kagiita kaaraaya, rîra augire,
“Bweegua Ngai akîaria naabi îmunthî, bûtikaûmie biongo.”
8 Ûkaaya kwîgua Njosua aratongoria Aisiraeri baakinya kînogokooni gîku, ûtiîgua Ngai akîgweta bantû angî nyumaani. 9 Kwoogu kûrî na *Sabatû ya mwanya ya kûnogoka kîrî antû ba Ngai. 10 Athii kînogokooni kîra Ngai athuuranîrîte bakaanogoka baathiria ngûgî yao, ta bûra Ngai aanogokire akûthiria yake. 11 Kwoogu tûcûûgieni na njîra cionthe tûthi kînogokooni gîku, kaingo gûteegua kûrî we atakîthi noogo n'ûntû bwa kûrûtha ta bûra bara baaregire kwathîka baarûthire.
12 Kiugo kîa Ngai i ta gîntû kîrî mwoyo na kîrî inya. Ûûgî bwakîo i nkûrûki ya bwa rûûyiû rûûgî mbarî cionthe. Gîtûtemaga gîgakinyîîra mwoyo na nkoro gîkoonania bûra mawîrirîîria na mathûgaania ma nkoro cietû makari, ta bûra rûûyiû rûûmba gûtema mîîndî rûgakinyîîra ûthuumo. 13 Gûtirî kîûmbe kîîbithîra kiugo. Mantû monthe imaagwûre na i bûûrîîni marî kîrî we. N'we twinthe tûkeera mantû mara twarorûtha.
Kîrîstû mûthînjîri ûra mûnene wa Ngai
14 N'ûntû tûrî na mûthînjîri ûra mûnene mûno wa Ngai, ta we Yiesû Mwana wa Ngai, ûra aathiire îgûrû, tûbatîîrue tûrika wîtîgioni bûra twîtîgîîtie. 15 Mûthînjîri wetû ûra mûnene namenyaga kûra tûremagîîrwa n'ûntû aragerua na njîra cionthe ta bûra tûgeragua, îndî ateeyia. 16 Kwoogu itwîgue tûrî na ûcamba tûthengeere gîtî kîa ûnene kîa Ngai ûra eeyanaga ûtugi kaingo atwîgua kîao na atwa ûtugi bwa gûtûteethia rîra tûrî thîînaani.