Yiesû ooria muntû ntugû ya Sabatû
3
1 Ntugû îngî Yiesû aathi *sinagoogiini kaîrî. Gûku sinagoogiini i kwarî na muntû oonjeete njara. 2 Kûrî antû baarî gûku baaraithîîte boona kana Yiesû akooria muntû ûyu ntugû ya *Sabatû, boona ûntû bwa kûmûthitangîra. 3 Yiesû eera muntû ûyu oonjeete njara, “Ncû ûrûngame aaga mbere.” 4 Yiesû aûria antû, “*Watho bwîtîgîîrîîtie muntû arûtha bwega kana i bûûthûûku ntugû ya Sabatû? I kwonokia mwoyo kana i gûcuûraga?” Gûtirî muntû aaria. 5 Yiesû aathiûrûûkia meetho athûûri i bo na akîîgagua arî na kîîthikîîro nkorooni n'ûntû bwa kûûmia biongo kwao. Eera muntû ûyu oonjeete njara, “Tambûrûkia njara yaku.” Muntû ûyu aatambûrûkia njara, na akûmîtambûrûkia yabua.6 Afarisai na antû ba kîama kîa Eronde bakwona ûgu bauma nja warîo. Baabanga mûbango wa kûûraga Yiesû.
Yiesû ooria antû baingî rûteere rwa îria
7 Yiesû akuuma gûku aathi na arutwa baake bwa îria. Antû baingî mûno bamûthingata. Baarî antû kuuma Gariiri, Njundea, 8 Njerusaremu, Indumea, rûgongo rûra rûngî rwa muuro wa Njorondani, na akubî na taûni ya Turo na ya Sindoni. Antû babu baayîîte kîrî Yiesû n'ûntû bwa mantû mara beegîîtue arûthîîte. 9 N'ûntû bwa antû kwingîa, Yiesû eera arutwa baake bamûreetere îtarû atûmîre kaingo atainyîkwa. 10 Yiesû eethîranîîrwe kwa wingî ûgu i bara baarî baayie bakîgeria kûmûtongithia, n'ûntû i boonire ooria antû baingî.
11 Irundu biithûûku biamwonaga bikagwîthia bara baarî nabio agu mbere yake, bikauga na inya, “I woû Mwana wa Ngai!” 12 Îndî Yiesû naabikaanagia mûno kûmuumbûra kîrî antû, biuga aarî ûû.
Yiesû aataara atûmwa îkûmi na baîrî
13-14 Kagiita kamwe Yiesû aatwa kîrîmaani, eeta antû îkûmi na baîrî bara eendaga bamûteetheeria barî atûmwa baake. Aabathuurire bathiyanagia n'we na abatûmaga kûthi gûtûmîîria, 15 abaa inya ya kwîngatia irundu biithûûku bikauma kîrî antû.
16 Baarî Simioni ûra Yiesû eetire Petûrû, 17 Njakubu na mûruagina Njoana, aana ba Sabendi bara Yiesû eetire Mboaneriges kana “Aana ba nkwa,” 18 Enderea, Firibû, Bathoromayo, Mathayo, Tooma, Njakubu wa Arufayo, Thandayo, Simioni Mûkaanani, 19 na Njundas Mûcikariota ûra aakunyanîîre Yiesû amûgwatithia.
Yiesû eerwa eengatagia irundu biithûûku na inya ya Beeriseburi
20 Kagiita kamwe Yiesû akûthûngîra nyomba, kîrîndî gîa antû kaîrî kîamwîthîranîra aaga mwanya wa kwîgaagûra barî na arutwa baake. 21 Antû ba mûciî wao bakwîgua ûgu bamûûyîra bakîthûgaanagia naumîîte nkoma.
22 Aarimû bamwe ba watho ba kuuma Njerusaremu bauga, “I Beeriseburi, mûnene wa irundu biithûûku, amûgwete. N'we amwete inya ya kwîngatia irundu biithûûku.”
23 Yiesû abeeta. Aatûmîra ngerekano abaûria, “N'ata Saitaani îîbingatangia îrî yo?” 24 Abeera, “Ûnene bûkaathûkana bûtitûûra. 25 Na antû ba mûciî ûmwe bakaathûkana mûciî ûyu ûtitûûra. 26 Kwoogu wana Saitaani akaathûkana wengwa agatua kwîrwa atiûmba gûtûûra, neethiria wengwa.
27 “Gûtirî muntû abunjia nyomba ya muntû arî na inya amûtuunya into, nwanga akaamba kûmûthaîka. Rîru i rîo aûmba kûmûtunya into biake.
28 “Na mma ga nkûbwîra, antû nwa barekerwe meeyia maao monthe na mantû maathûûku monthe mara baaria îgûrû rîa Ngai. 29 Îndî muntû akaaria mantû maathûûku îgûrû rîa Kîrundu Ûmûtheru atirekerwa, n'ûntû meeyia mamu i ma tene na tene.”
30 Yiesû augire ûgu n'ûntû bwa bûra antû baugaga arî na kîrundu kîîthûûku.
Bagina na aruagina ba Yiesû ba mma
31 Gina na aruagina ba Yiesû baaya baarûngama ome ya nyomba înu Yiesû aarî. Baatûmana beetîrwa we. 32 I kwarî na antû baingî baakari nthî bacerereete Yiesû. Bamwîra, “Nyûkwe na aruanyûkwe barî ome na i bakwenda gûkwona.”