Yiesû Mwathi wa Sabatû
12
1 Kagiitaani wa gaku ntugû îmwe ya *Sabatû, Yiesû akûrûkîîrîîte gûntû kwarî na mînda ya ngano, arutwa baake beegua yûûra mûno. Baanjîîria kuuna ngano bagiikithaga na njara bakarîa. 2 *Afarisai bakwona ûgu baûria Yiesû “I kî n'ûntû arutwa baaku bakuuna ngano bakîrîîyaga na batibuîrîîte barûtha ûgu ntugû ya Sabatû?”3 Yiesû abaûria, “Ka bûtaathooma bûra Ndaundi na bara baarî n'we baarûthire beegua yûûra? 4 Aathiire Nyomba ya Ngai arî na bara baarî n'we baarîa mîgaate îra mîtheru na i bwiyî mîgaate înu itikîrûmwa i muntû ûngî tatiga *athînjîri ba Ngai bonka. 5 Kana ka bûtathoomeete mabuku ma *watho bwîgua bûra *athînjîri babîtagia ntugû ya Sabatû baathi Nyomba ya Ngai na batitaragîrwa marî meeyia. 6 Îndî ga nkûbwîra, kûrî bu bûrî aaga bûnene nkûrûki ya Nyomba ya Ngai. 7 Tookeegua i bwamenyaga bûra ntheto îno ya Ngai yuugaga atî, ‘Mbendaga antû beeganua kîao nkûrûki ya baruta kîgongwana,’ bûtikîgiitîra îgamba muntû ataarî na mabîtia. 8 Kwoogu Mwana wa Muntû n'we Mwathi wa Sabatû.”
Yiesû ooria muntû ntugû ya Sabatû
9 Yiesû auma agu aathi bantû angî aathûngîra *sinagoogiini. 10 I kwarî na muntû oonjeete njara gûku sinagoogiini. *Afarisai bara baarî gûku bagîcûa ûntû bwa kûthitangîra Yiesû, bamûûria, “*Watho i bwîtîgîîrîîtie muntû oorania ntugû ya Sabatû?”
11 Yiesû abaûria, “N'ûû wacienu ataruta ng'ondu yake mûthûrûriini ntugû ya Sabatû? 12 Muntû n'we arî gîtûmi nkûrûki ya ng'ondu. Tibu? Kwoogu watho ibûgwîtîgîîria muntû arûtha mantû meega ntugû ya Sabatû.” 13 Yiesû eera muntû ûyu oonjeete njara, “Tambûrûkia njara yaku.” Muntû ûyu akûmîtambûrûkia yabua yakara ta îra îngî.
14 Afarisai bakuuma gûku sinagoogiini baabanga kûûraga Yiesû.
Mûruti ngûgî ûmûthuure i Ngai
15 Yiesû akûmenya mûbango ûra baarî na uu auma agu aathi. Antû baingî mûno bamûthingata, Yiesû abooria bonthe. 16 Îndî abakaania abeera batikauge n'we ûû. 17 Ntheto ira ciariirue i kîroria Isaya ciaûyûra, rîra augire,
18 “Ûyû i mûruti ngûgî wakwa ûra nthuurîîte,
ûra mbendeete, na nankenagia.
Nkamwîkîra Kîrundu wakwa, na agaatûmîîria antû batarî Ayaundi,
abamenyithie mantû ma kûgiitîrwa îgamba.
19 Atiithetania na antû, kana aringa gîtuma,
kana arûtha mûceemanio aarîria antû.
20 Atiitigithania rûthanje rûnyang'inyûku,
atioria taa îra îrî akubî kwora.
Akaathi na mbere kûruta ngûgî mwanka ûmma bûcinde ûthûûku,
21 na antû bara batarî Ayaundi beerîgagîîre riîtwa rîake.”
Yiesû eerwa eengatagia irundu biithûûku na inya ya Beeriseburi
22 Antû baareetera Yiesû muntû arî na kîrundu kîîthûûku. Muntû ûyu atoonaga na ataaragia. Yiesû amworia aatua kwaria na kwona. 23 Antû bonthe baarigara. Baatua kûûrania, “Waûmba kwîgua ûyû n'we Mwana wa Ndaundi?”
24 *Afarisai bakwîgua mantû mamu bauga, “I Beeriseburi, mûnene wa irundu biithûûku amweyaga inya ya kwîngatia irundu biithûûku, na t'ûngî.”
25 Yiesû akûmenya bûra bwarî mathûgaaniani maao, abeera, “Ûnene bûkaathûkana bûtitûûra. Na antû ba taûni îmwe kana ba mûciî ûmwe bakaathûkana, taûni înu kana mûciî ûyu ûtitûûra. 26 Ûkeegua Saitaani arîîngatia Saitaani n'eegua aathûkeene. Kwoogu n'ata ûnene bwake bûûmba gûtûûra? 27 Ûkaaya kwîgua mbîngatagia irundu biithûûku ngîtûmagîra inya ya Beeriseburi rî, antû beenu batûmagîra inya ya ûû kûbiîngatia? Bûra barûthaga i bu bûgaatûma bûmenya bûra bûkuuga. 28 Îndî ûkaaya kwîgua mbîngatagia irundu biithûûku ngîtûmagîra inya ya Kîrundu wa Ngai, i mma ûnene bwa Ngai i bûbûkinyîîrîîte.
29 “Î rîo rî, n'ata muntû abunjia nyomba ya muntû arî na inya akathûkia into biake na taka? Nwanga akaamba akamûthaîka na îkanda, rîru i rîo athûngîra nyomba akamûtunya into.
30 “Ûra atagwatanagîra naani i mûnthû wakwa. Na ûra ateethîranagia nkîîthîrania nanyagaaragia.
31 “Na ka mbwîreeni, antû bakaarekerwa meeyia monthe na mantû maathûûku monthe mara baaria îgûrû rîa Ngai. Îndî ûra akaaria mantû maathûûku îgûrû rîa Kîrundu Ûmûtheru atiirekerwa. 32 Muntû wonthe ûra akaaria mantû maathûûku îgûrû rîa Mwana wa Muntû akaarekerwa. Îndî ûra akaaria mantû maathûûku îgûrû rîa Kîrundu Ûmûtheru atiirekerwa îgiitaani rîrî na îgiitaani rîra rîkaaya.”
Mûtî ûmenyekanaga na maciaro ma uu
33 “Mûtî ûrî ûmwega ûciaraga matunda meega na mûtî ûrî ûmûthûûku ûciaraga maciaro maathûûku. 34 Biû rûciaro rwa njoka! N'ata bûûmba kwaria mantû meega na bûrî antû baathûûku? Kanyua kaaragia mantû mara maûyûri nkoro. 35 Muntû ûmwega aaragia mantû meega mara maumaga nkorooni yake. Na muntû ûmûthûûku aaragia mantû maathûûku mara maumaga nkorooni yake. 36 Îndî ka mbwîreeni, kiugo kîonthe gîtaagîrîte kîra antû baaragia bagaatarîrwa kîo ntugû ya kûgiitîrwa îgamba. 37 Wa muntû akaagiitîrwa îgamba bwega kana bûûthûûku kûringana na mîgambo yake.”
Afarisai bakîenda Yiesû aringa kîama
38 *Afarisai bamwe na aarimû ba watho beera Yiesû, “Mwarimû, tûrîenda ûringa kîama twona.”
39 Yiesû eegua ûgu auga, “I rûciaro rûûthûûku rwa aregi Ngai rûkwenda kwona kîama. Gûtirî kîama kîngî bûkoona tatiga kîra gîa kîroria Njona. 40 Wa ta Njona bûra aakarire nda ya îkûyû ntugû ithatû mûthenya na ûtugû, wana Mwana wa Muntû agaakara nthîgûrû ndeeni ntugû ithatû. 41 Na rîra antû ba taûni ya Ninebe bakaariûkua ntugû ya antû kûgiitîrwa îgamba bakaabûtuîra i bwîyîîtie n'ûntû bo i beeririre Njona akûbatûmîîria, na îîndî ûra arî aaga n'we mûnene kîrî Njona. 42 Na mûnene ûra wa mûka wa nthîgûrû îra yeetagwa Seba aariûkua ntugû ya antû kûgiitîrwa îgamba akaabûtuîra i bwîyîîtie n'ûntû we aumire wo kûraaya kûûru aathi kwîgua ûûme bwa mûnene Soromoni bûra aarutanaga, na îîndî ûra arî aaga n'we mûnene kîrî Soromoni.”
Gûcookerwa n'irundu biithûûku
43 Yiesû auga, “Kîrundu kîîthûûku kîauma kîrî muntû, kîthiiyaga kîriûngîîte gîgakûrûkîîra gûntû na gûntû gûtarî rûûyî gîgîcûa bantû gîkara. Kîaga kîîbîîraga, 44 ‘Gancooke nyomba yakwa îra nkûrû, kûra ndaumire.’ Gîacooka kîîthagîra gûtarî we arî ku, nyomba îrî întheru, na îkari bwega. 45 Kîona ûgu, kîthiiyaga gîkagîîra irundu bingî mûgwanja biithûûku nkûrûki yakîo bikaaya bikathûngîra muntû ûyu bigakara ku. Rîra gûkaraga ûgu, muntû ûyu athûûkaga agakûrûkîîria bûra aakari mbereeni. Ûgu i ta bu gûgaakara kîrî rûciaro rûrû rûûthûûku.”
Bagina na aruagina ba Yiesû ba mma
46 Yiesû athiîte na mbere woogu na kwarîria kîrîndî, gina na aruagina baaya. Baarûngama ome ya nyomba înu aarî bakîendaga kwaria n'we. [ 47 Muntû ûmwe eera Yiesû, “Nyûkwe na aruanyûkwe barî nja na i bakwenda kwaria naawe.”]a