Yiesû ooria muntû aarî kîonje
2
1 Nyuma ya ntugû inkai, Yiesû aacooka Kaperinaumu kaîrî. Antû bakûmenya naarî gûku, 2 beethîrana kwa wingî mûno mûrangooni wa nyomba înu Yiesû aarî kwaga kinya webero. Yiesû akîbatûmagîîria kiugo, 3 antû bana baaya bakamatîîte muntû aarî kîonje bamûnintîîte kîrî Yiesû. 4 N'ûntû bwa antû kwingîa, bataûmba gûkinyithia kîonje gîku ara Yiesû aarî. Baatwa baaromora rûûgûrû rwa nyomba înu batarithîîrîîtie ara Yiesû aarî. Bakûromora, beendamîîria kîonje gîku oogo wa kîrî mamaamîrooni. 5 Yiesû akwona bûra antû babu beetîgîîtie bûgana, eera kîonje gîku, “Ûkûrekerwa meeyia maaku, aba.”6 Aarimû bamwe ba watho baakari agu bakwîgua ûgu, baatua kûthûgaania na nkoro beebûûria, 7 “N'ata muntû ûyû akwenda kwonania? Nakwîthûkia taka arî Ngai? Anga ti Ngai wenka aûmba kûrekera muntû meeyia?”
8 Yiesû aamenya bûra baathûgaanagia. Abaûria, “I mbi n'ûntû bûkûthûgaania ûgu? 9 I bûrîkû bûûthû? I kwîra kîonje gîkî, ‘Ûkûrekerwa meeyia maaku,’ kana i gûkîîra ‘Ûkîîra ûkamate mamaamîro maaku ûthi’? 10 Kaingo bûmenya Mwana wa Muntû arî na watho bwa kûrekera antû meeyia maao gûkû nthîgûrû, inkûbwonia.” Yiesû eera kîonje gîku, 11 “Ûkîîra ûkamate mamaamîro maaku wînûke.”
12 Nthûti weenu kîonje gîku gîaûkîîra bacûûbîîte, gîakamata mamaamîro kîenûka. Antû bakwona ûgu baarigara mûno. Baakumia Ngai bakiugaga, “Tûtoona ûûgû kaîrî!”
Rawi eetwa i Yiesû
13 Yiesû aacooka rûteere rwa îria rîa Gariiri kaîrî. Kîrîndî gîa antû kîathi kîrî we, Yiesû abarutana. 14 Akuuma agu, Yiesû oona muntû eetagwa Rawi akîrûngithagia ûgooti, akari nthî ara aakaraga. Îthe eetagwa Arufayo. Yiesû amwîra, “Nthingata!” Rawi aûkîîra amûthingata.
15 Nyumaani Rawi eeta Yiesû na arutwa baake gwake. Arûngithia ûgooti baingî na eeyia baaya bathingatîîte Yiesû, baanjîîria kûrîyanîra n'we. 16 *Afarisai bamwe baarî aarimû ba watho bakwona Yiesû akîrûtha ûgu, baûria arutwa baake, “I kî gîgûtûma arîyanîra na arûngithia ûgooti na eeyia?”
17 Yiesû akwîgua aarimû babu ba watho bakîûria ûgu, abacookeria abeera, “Tika antû batarî baayie beendaga ndagitaarî. Bara baayie i bo beendaga kûragûrîrwa. Ntaaya gwîta bara baagîru, ndaayire gwîta bara eeyia kaingo beerira.”
Gûtîîrîra kûrîa irio n'ûntû bwa maromba
18 Kagiita kamwe athingati ba Njoana Mûbaatithania na ba *Afarisai i baatîîrîrîte kûrîa irio. Antû bamwe baathi kîrî Yiesû bamûûria, “I kî n'ûntû arutwa ba Njoana Mûbaatithania na ba Afarisai bo batîîragîra kûrîa irio n'ûntû bwa maromba, îndî baaku batitîîragîra?”
19 Yiesû abaûria, “Bwaûmba kwîrîgîîra antû bara beete wikiini barega kûrîa ntugû îra mûgûrani arî na wiki? Batitîîrîra kûrîa ntugû înu mûgûrani arî na wiki. 20 Îndî rîra kagiita gagaakinya mûgûrani arutwe kîrî bo, rîru i rîo baûmba gûtîîrîra.
21 “Gûtirî muntû eekagîra nguo înkûrû kîraka na gîtaame gîtarî gîkûrû ataambîîte gûkîbûûra, n'ûntû nguo yabûûrwa gîtaame gîku igîkaamîkuuyia îgendeerie. 22 Na kaîrî, gûtirî we eekagîra ndibei yaimbia îthatwani rîîkûrû, n'ûntû n'îgaatûûmûra îthatwa rîru yûûre mana na îthatwa rîene. Ndibei yaimbia îîkagîrwa îthatwani rîtarî rîkûrû.”
Yiesû Mwathi wa Sabatû
23 Ntugû îmwe ya *Sabatû Yiesû na arutwa baake i baakûrûkîîrîîte mîndaani. Bathiîte woogu, arutwa baake baanjîîria kûûrûûra ngano barîa. 24 *Afarisai bakwona bakîrûtha ûgu, beera Yiesû, “I mbi n'ûntû bakûrûtha bûra bûtabatîîrue kûrûthwa ntugû ya Sabatû?”
25 Yiesû abeera, “Ka bûtaathooma bûra Ndaundi aarûthire akwîgua yûûra barî na bara baarî nabo? 26 Aathiire Nyomba ya Ngai kagiita kara Abiathari aarî mûthînjîri wa Ngai ûra mûnene, aarîa mîgaate îra mîtheru na aarûmia bara baarî nabo, na i bwiyî mîgaate înu itikîrûmwa i muntû ûngî tatiga athînjîri ba Ngai.” 27 Yiesû abeera, “Ntugû ya Sabatû îrî oogo n'ûntû bwa muntû, îndî muntû atirî oogo n'ûntû bwa ntugû ya Sabatû. 28 Kwoogu Mwana wa Muntû n'we Mwathi wa Sabatû.”