Arutwa ba mbere ba Yiesû
5
1 Îgiita rîmwe Yiesû arûngi rûteere rwa Îria rîa Ngenesareeti, kîrîndî kîamwinyîka kîthikîîrîîtie ntheto ya Ngai. 2 Yiesû oona matarû maîrî rûteere rwa îria matarî na antû. Eene mo baarî ategi ba makûyû. I baarî bakuuma baathi kûthambia neeti ciao. 3 Yiesû aathûngîra îtarûûni rîa muntû eetagwa Simioni amwîra arîtindîke riume rûgombeeni rwa îria rîthiyange ndiani. Aakara nthî îtarûûni rîru, aanjîîria kûrutana antû arî ku.4 Akûthiria kwaria, eera Simioni, “Iranga îtarû ndiani, bûgere neeti cienu bûgwate makûyû.”
5 Simioni amûcookeria amwîra, “Mwathani, tûramategire ûtugû bunthe na gûtirî rîo tûragwata. Îndî n'ûntû ûkuuga, ka ngere neeti rûûyîîni.” 6 Simioni na bara bangî baarî nabo, baarûtha ûgu Yiesû aabeerire. Bakûrûtha ûgu, baagwata makûyû maingî mûno, mwanka neeti cienda gûtuîkanga. 7 Baanjîîria kûûnya ategi bara baarî îtarûûni rîra rîngî baaya kûbagwatia kûruûra neeti. Babu bangî baaya. Baagwatania baûyûria matarû marî maîrî mwanka meenda kûriama rûûyîîni n'ûrito.
8 Simioni Petûrû akwona ûgu, aaturîria Yiesû maru amwîra, “Tigana naani Mwathani n'ûntû ndî mwîyia!” 9 Simioni na bara bangî baarî nabo baarigara i makûyû mamu baagwete maingî ûgu. 10 Wana kinya aana ba Sabendi bara beetagwa Njakubu na Njoana, bara baarutanagîria ngûgî na Simioni baarigara n'ûntû bûbu.
Yiesû eera Simioni, “Ûtigaakuthûke. Kuuma îîndî ûgaatua gûtegaga antû ûkîbareetaga kîrî niû.”
11 Simioni na bara bangî baumîria matarû maao rûgombeeni, baatiganîria into biao bionthe baathingata Yiesû.
Yiesû ooria muntû aayîîtue mûtigiri
12 Îgiita rîmwe, Yiesû naarî taûni yarî na muntû aayîîtue mûtigiri. Muntû ûyu akwona Yiesû aaya kîrî we. Amûturîria maru ûthiû bwake bûtongithîîtie nthîgûrû, amwereka amwîra, “Mwathani, wegua wenda kûmboria, mboria nthere.”
13 Yiesû aatambûrûkia njara yake amûringithia. Amwîra, “Inkwenda, thera!” Nthûti îmwe muntû ûyu oora mûtigiri. 14 Yiesû amwîra, “Ûtikeere muntû. Îndî îthi wonwe i mûthînjîri wa Ngai, ûrute kîewa kîra Musa augire kîrutagwe kîrî ûkûûyî kîrî antû.”
15 Amwe na ûgu, nkuma ya Yiesû yatamba nthîgûrû yonthe. Kîrîndî kingî gîa antû gîatua kûûya kûmûthikîîria gîkîorua. 16 Îndî Yiesû eebathûraga akathi bantû gûtarî antû kûrombera noogo.
Yiesû ooria muntû aarî kîonje
17 Ntugû îmwe Yiesû akîrutanaga, *Afarisai na aarimû bamwe ba watho ibaarî agu. Baumîîte bwa taûni cia Gariiri, Njundea na Njerusaremu. Yiesû naarî na inya ya kworia aayie. 18 Antû bamwe baaya bakamatîîte kîonje na mamaamîro mara kîamaamagîra, bakîreeteete kîrî Yiesû. Antû babu bagûceria a gûgîkûrûkîîria bakiira ara Yiesû aarî bakîmaamia mbere yake, 19 baaga n'ûntû bwa antû kwingîa. Baatwa rûûgûrû rwa nyomba baaromora, bakîîndamîîria oogo kîrî mamaamîrooni ma kîo mwanka gatîgatî ga antû, ara Yiesû aarî.
20 Yiesû akwona bûra antû babu beetîgîîtie bûgana, eera kîonje gîku, “Ûkûrekerwa meeyia maaku, aba.”
21 Aarimû ba watho na Afarisai baatua kûthûgaania na nkoro bakeebûûria, “Muntû ûyû nakwîthûkia taka arî Ngai! Anga ti Ngai wenka aûmba kûrekera muntû meeyia?”
22 Yiesû aamenya bûra baathûgaanagia. Abaûria, “I mbi n'ûntû bûkûthûgaania ûgu? 23 I bûrîkû bûûthû? I kuuga, ‘Ûkûrekerwa meeyia maaku,’ kana i kuuga ‘Ûkîîra ûthi’? 24 Kaingo bûmenya Mwana wa Muntû arî na watho bwa kûrekera antû meeyia maao gûkû nthîgûrû, inkûbwonia.” Yiesû eera kîonje gîku, “Ûkîîra ûkamate matandîko maaku wînûke.” 25 Nthûti weenu kîonje gîku gîaûkîîra bacûûbîîte, gîakamata mamaamîro ma kîo mara gîakamatîîtwe namo, kîenûka gîgîkumagia Ngai.
26 Antû bonthe bakwona ûgu, baarigara mûno. Baakumia Ngai bamakîîte mûno bauga, “Tûkwona mantû ma kûrigaria îmunthî.”
Rawi eetwa i Yiesû
27 Nyuma yoogu Yiesû aumagarûka. Athiîte oona muntû eetagwa Rawi akari nthî ara aakaraga, akîrûngithagia ûgooti. Amwîra, “Nthingata!” 28 Rawi aûkîîra aatiganîria into biake bionthe amûthingata.
29 Rawi aathuuranîra Yiesû kîatho kîînene mûno mûciî wake. Ageni bamwe bara baarî oogo, baarî arûngithia ûgooti na antû bangî. Yiesû aakaranîîrîîte nabo bonthe meethaani îmwe bakîrîîyaga. 30 *Afarisai bamwe na aarimû bamwe ba watho bakwona ûgu, baanung'una kîrî arutwa baake, bakîûragia, “I kî gîgûtûma bûrîyanîra na bûnyunyanîra na arûngithia ûgooti na eeyia?”
31 Yiesû abacookeria abeera, “Tika antû batarî baayie beendaga ndagitaarî. Bara baayie i bo beendaga kûragûrîrwa. 32 Ntaaya gwîta antû bara baagîru. Ndaayire gwîta bara eeyia kaingo beerira.”
Gûtîîrîra kûrîa irio n'ûntû bwa maromba
33 Baûria Yiesû, “I kî n'ûntû arutwa ba Njoana na ba *Afarisai bo batîîragîra kûrîa irio n'ûntû bwa maromba, îndî baaku barîîyaga na bakanyua?”
34 Yiesû abaûria, “Bwaûmba kwîrîgîîra antû bara beete wikiini barega kûrîa ntugû îra mûgûrani arî na wiki? 35 Îndî rîra kagiita gagaakinya mûgûrani arutwe kîrî bo, rîru i rîo baûmba gûtîîrîra.”
36 Yiesû abaa ngerekano auga, “Gûtirî muntû eekagîra nguo înkûrû kîraka na gîtaame gîtarî gîkûrû ataambîîte gûkîbûûra, n'ûntû nguo yabûûrwa, gîtaame gîku igîkaamîkuuyia. 37 Na kaîrî, gûtirî we eekagîra ndibei yaimbia îthatwani rîîkûrû, n'ûntû n'îgaatûûmûra îthatwa rîru yûûre mana na îthatwa rîene. 38 Ndibei yaimbia îîkagîrwa îthatwani rîtarî rîkûrû. 39 Gûtirî we anyunyaga ndibei înkûrû eendaga kûnyua ndibei yaimbia n'ûntû augaga ‘Ndibei înkûrû n'yo îrî mûrîo.’ ”