Yiesû aagerua
4
1 Yiesû akiuma bwa muuro wa Njorondani aumire aûyûrîîtwe i Kîrundu Ûmûtheru. Kîrundu amwira rwanda. 2 Yiesû aagerua i Nkoma bantû a ntugû mîrongo îna atakûrîa nwa mbi. Akûthiria ntugû inu cionthe, Yiesû aatua kwîgua yûûra. 3 Nkoma amwîra, “Ûkaaya kwîgua ûrî Mwana wa Ngai, uga iiga rîrî rîtuîke mûgaate.”4 Yiesû amûcookeria amwîra, “Kwandîkîîtwe *Maandîkooni Maatheru, ‘Mûgaate unka ûtiûmba gûtûûria muntû mwoyo.’ ”
5 Nkoma aira Yiesû bantû angî aûkîîru. Amwonia moonene monthe ma nthîgûrû nthûti îmwe. 6 Amwîra, “Ngakwa watho bwa kwathanaga gûkû kunthe na mwago wa ku unthe ngakwa. Nnenkeretwe moonene mama monthe mpa muntû woora nkeenda. 7 Mama monthe ngakwa mo wegua ûkangonga.”
8 Yiesû amûcookeria amwîra, “Kwandîkîîtwe Maandîkooni Maatheru, ‘Ûtikaagonge kana ûtûmîkîra ûngî tatiga Mwathani Ngai waku wenka.’ ”
9 Kaîrî Nkoma aira Yiesû taûni îra ntheru ya Njerusaremu, amwira kûra îgûrû kathûmbîri ka Nyomba ya Ngai. Amwîra, “Wegua ûrî Mwana wa Ngai, teebarûkie kuuma aaga, 10 n'ûntû kwandîkîîtwe Maandîkooni Maatheru, ‘Ngai akeera araîka baake bakûmenyeere.’ 11 Na kaîrî kwandîkîîtwe, ‘Ngai eerîîte araîka baake bakwambîîrie na njara ciao kaingo ûtathuumûrua nwa mbayo ciaku i maiga.’ ”
12 Yiesû amûcookeria amwîra, “Kwandîkîîtwe Maandîkooni Maatheru, ‘Ûtikaagerie Mwathani Ngai waku.’ ”
13 Nkoma akûmûgeria na njîra cionthe, aathi, aarekana n'we kwa îgiita.
Yiesû aanjîîria gûtûmîîria Gariiri
14 Yiesû aacooka Gariiri arî na inya ya Kîrundu Ûmûtheru. Nkuma yake yatamba nteere cionthe. 15 Aarutanaga *masinagoogiini agakumua n'antû bonthe.
Yiesû aaregwa Nasareethi
16 Yiesû aathi Nasareethi, naara aakûrîrîîte. Ntugû ya *Sabatû îgûkinya, wa ta wîthîre aathi *sinagoogiini. Aarûngama kûthooma *Maandîko Maatheru. 17 Aanenkerwa îbuku rîa kîroria Isaya. Aagwûria ara kwandîkîîtwe,
18 “Kîrundu wa Mwathani arî amwe naani,
n'ûntû Mwathani n'anthuurîîte ntûmîîria
ntheto îmbega kîrî nkîa.
Aantûmire mbîîra agwate i baathaûre,
na mbîîra ntûngi igaatua kwona,
nthaûra bara bakûnyamaarua.
19 Na mbugîîria kîrî antû,
‘Kagiita gagûkinya,
Mwathani akoonokia antû baake.’ ”
20 Yiesû aakûnja îbuku aanenkera mûruti ngûgî wa sinagoogi, aakara nthî. Antû bonthe bara baarî sinagoogiini înu nwa meetho baamwete. 21 Yiesû abeera, “Îmunthî Maandîko mama makûûyûra, wa ta bûra maathoomwa bûkîîgagua na matû meenu.”
22 Antû bamwona arî muntû wa kûrigaria n'ûntû bwa mantû meega mara aabarîîrie. Baanjîîria kûûrania, “Anga we ti mwana wa Njosebu?”
23 Yiesû abeera, “Ntirî na nkanja inkûmenya bûrîenda kûmbîîra njuno îra yuugaga, ‘Ndagitaarî îborie wengwa,’ kana bûmbîîre ndûthe mantû mara bwîgagua i ndaarûthire Kaperinaumu, gûkû nthîgûrû yenu. 24 Na mma ga nkûbwîra, kîroria gîtitîîyagwa kwao. 25 Na ga nkûbwîra ûmma, îgiita rîa Eriya i kwarî na eekûrû baingî ba ntigwa nthîgûrû ya Isiraeri, rîra mbura yakarîîte îtaura mîanka îthatû na nucu kwagîa yûûra nthîgûrû yonthe. 26 Eriya ataatûmwa Isiraeri athi gûteethia nwa îmwe yacio. Aatûmirwe kîrî ntigwa îngî ya gataûni geetagwa Sarefathi, akubî na taûni ya Sindoni. 27 I kwarî na antû baingî baarî na mûtigiri nthîgûrû ya Isiraeri îgiita rîa kîroria Erisa. Na gûtirî îndî gûtirî nwa ûmwe wao oorua, tatiga Naamani Mûsîîria.”
28 Antû babu baarî sinagoogiini bakwîgua ûgu baathûûra mûno. 29 Baûka bamwîngatia taûni yao. Bamûkinyia katheng'eng'aani ga kîrîma kîra taûni înu yakîîtwe babangîîte kûmwarûkia. 30 Îndî Yiesû aabuuranîîria gatîgatî ka bo, aathi.
Yiesû ooria muntû aarî na kîrundu kîîthûûku
31 Yiesû aathi bwa taûni ya Kaperinaumu îra yarî bwa gîteere kîa Gariiri. Ntugû ya *Sabatû aanjîîria kûrutana antû. 32 Antû bonthe bara baamûthikîîrîîtie baarigara mûno n'ûrutani bwake, n'ûntû aarutanaga na watho kuuma kîrî Ngai.
33 Gûku *sinagoogiini i kwarî na muntû aarî na kîrundu kîîthûûku. Muntû ûyu augîîria na inya auga, 34 “N'ata ûkwenda naati Yiesû Mûnasareethi? Ka ûûyîîte gûtûthiria kana? Imbiyî woû ûrî ûû. Ûrî Ûra Mûtheru kuuma kîrî Ngai.”
35 Yiesû aagondokera kîrundu gîku akîîra, “Kira na uma kîrî muntû ûyû!” Kîrundu gîku kîagwîthia muntû ûyu nthî mbere ya antû, kîauma na gîtaamûguraria.
36 Antû bonthe bara baarî agu baarigara mûno. Baanjîîria kûûrania, “I bûrîkû bûbû! Î muntû ûyû arî na watho na inya ya kwîra irundu biithûûku biume kîrî antû na bikauma.” 37 Nkuma ya Yiesû yatamba gûntû gûku kunthe.
Yiesû ooria mûthoni wa Simioni na antû bangî baingî mûno
38 Yiesû auma *sinagoogiini aathi mûciî kwa ba Simioni. Mûthoni wa Simioni wa mûka naayîîtue kûbîîyanîra mwîrî. Antû baanjîîria kwîra Yiesû mantû ma kwayua gwake. 39 Yiesû aathi kîrî we aagondokera kûbîîyanîra gûku aabîîyanîrîte, oora. Aûkîîra warîru aanjîîria kûbagaagûra.
40 Kîûgoro riûa rîathûa, bonthe bara antû baao baayîîtue mbayua mwanya mwanya, baareetera Yiesû bo kaingo abooria. Yiesû aigîîra wa kîra ûmwe wao njara, bonthe boora. 41 Yiesû eengatia irundu biithûûku bira antû baingî baarî nabio, biauma bigîkayaga na inya bikauga, “Woû ûrî Mwana wa Ngai!” Yiesû aabigondokagîra na akagiria biaria n'ûntû ibiaiyî we aarî Kîrîstû.
Yiesû agîtûmîîria sinagoogiini
42 Rûûni rûkîîrî mûno Yiesû auma taûni înu ya Kaperinaumu, aathi gûntû gûtaarî na antû. Antû baanjîîria kûmûceria. Bakûmwona baacûûgia kûmûrigîîria atikaathi abatiga. 43 Yiesû abeera, “Nwa mwanka nthi taûni ira ingî wanacio ngatûmîîrie ntheto îmbega cia ûnene bwa Ngai, n'ûntû ûgu i bu ndaatûmire mbûya kûrûtha.” 44 Kwoogu Yiesû aathi agîtûmagîîria *masinagoogiini mara maarî gîteere gîku kîa Njundea.