Yiesû aagerua
4
1 Kuuma agu Yiesû aathûkua i Kîrundu Ûmûtheru amwira rwanda kaingo agerua i Nkoma. 2 Akûthiria ntugû mîrongo îna, mûthenya na ûtugû atarûma gîntû, Yiesû aatua kwîgua yûûra. 3 Nkoma aathi amwîra, “Ûkaaya kwîgua ûrî Mwana wa Ngai, uga maiga mama matuîke mîgaate.”4 Yiesû amwîra, “Kwandîkîîtwe *Maandîkooni Maatheru, ‘Mûgaate unka ûtiûmba gûtûûria muntû mwoyo, îndî kiugo kîonthe kîra kiumaga kanyuani ka Ngai kîamûtûûria.’ ”
5 Kaîrî Nkoma aira Yiesû taûni îra ntheru ya Njerusaremu. Amwira kûra îgûrû kathûmbîri ka Nyomba ya Ngai. 6 Amwîra, “Wegua ûrî Mwana wa Ngai, teebarûkie n'ûntû kwandîkîîtwe Maandîkooni Maatheru, ‘Ngai eerîîte araîka baake bakwambîîrie na njara ciao kaingo ûtathuumûrua nwa mbayo ciaku i maiga.’ ”
7 Yiesû aacookeria Nkoma amwîra, “Maandîko Maatheru kaîrî maugîîte ûûgû, ‘Ûtikaagerie Mwathani Ngai waku.’ ”
8 Kaîrî Nkoma aira Yiesû kûra îgûrû kîrîmaani kîîraaya mûno. Amwonia moonene monthe ma nthîgûrû na mwago wa mo. 9 Amwîra, “Ngakwa mama monthe wegua ûgaaturia maru ûngonge.”
10 Agûkinyia agu Yiesû amwîra, “Tigana naani, Saitaani, n'ûntû kwandîkîîtwe Maandîkooni Maatheru, ‘Ûtikaagonge kana ûtûmîkîra ûngî, tatiga Mwathani Ngai waku wenka.’ ” 11 Nkoma aatigana n'we. Araîka baaya baapa Yiesû ûteethio.
Yiesû aacooka Gariiri
12 Yiesû akwîgua Njoana akûthaîkwa nceera, aacooka gîteere kîa Gariiri. 13 Aumire Nasareethi aathi gûtûûra taûni ya Kaperinaumu rûteere rwa îria rîa Gariiri, mwankaani wa mûgongo wa Saburoni na wa Nabutarî. 14 Ûroria bûra Isaya aaroriirie bwaûyûra, bûra buugîîte,
15 “Nthîgûrû ya Saburoni na ya Nabutarî,
na bara batûûraga rûteere rwa ûmotho
rwa muuro wa Njorondani ûtarîîte bwa îria,
Gariiri nthîgûrû ya mîgongo îngî îtarî Ayaundi,
16 antû bara batûîre mwinduuni,
i booneete werû bûûnene.
Bara batûûraga kûra gûkari taka kûrumeene mwindu
n'ûntû bwa ûguaya bwa gîkuû, werû bûkûbamûrîkîra!”
17 Kuuma îgiita rîru, Yiesû aanjîîria gûtûmîîria akiugaga, “Îîrireeni meeyia meenu n'ûntû ûnene bwa îgûrû bûkûthengeera.”
Arutwa ba mbere ba Yiesû
18 Yiesû atambîîte na rûteere rwa îria rîa Gariiri oona ategi ba makûyû baîrî bakîamba neeti ciao bagwata makûyû. Baarî Simioni, ûra kaîrî eetagwa Petûrû, na mûruagina Enderea. 19 Yiesû abeera, “Nthingataani mbûtuîkithie ategi ba antû.” 20 Bamûthingata warîru baatiga neeti ciao naagu.
21 Yiesû akûthiyathiyanga mbere, eethîra antû bangî baîrî. Wana bo baarî muntû na mûruagina. Baarî Njakubu na Njoana. Îthe eetagwa Sabendi. Baarî îtarûûni na îthe bagîtumaga neeti ciao. Yiesû abeeta. 22 Warîru baatiga îthe na neeti ciao bamûthingata.
Yiesû aarutana na ooria aayie
23 Yiesû aariûnga Gariiri yonthe akîrutanaga antû *masinagoogiini na agîtûmagîîria mantû ma ûnene bwa îgûrû. Kinya nooragia antû ndwari cia mîthemba yonthe na mbayua cionthe ira beegagua barî nacio. 24 Nkuma yake yatamba nthîgûrû ya Aramu yonthe. Antû bamûreetera aayie bonthe ba mîthemba yonthe, na bara bonthe baathîînaga na njîra ingî inyingî. Kûrî baarî na irundu biithûûku, bangî nkurî, na bangî bonju mîîrî. Yiesû abooria. 25 Kîrîndî kingî mûno kuuma Gariiri, Ndikaporis, Njerusaremu, Njundea, na kinya rûgongo rûra rûngî rwa muuro wa Njorondani kîathingata Yiesû.