Ntûmîîri ya Njoana Mûbaatithania
3
1 Mwankaani wa îkûmi na îtaano mûnene ûra eetagwa Tiberias Kaisaarî wa akîathanaga, Pontio Piraatû n'we aarî ngabana wa Njundea. Eronde aarûngamîîrîîte gîteere kîa Gariiri. Na mûruagina ûra eetagwa Firibû nwe aarûngamîîrîîte gîteere gîa Îturea na gîa Turakonitis. Rûcania nwe aarûngamîîrîîte gîteere gîa Abirini. 2 Anas barî na Kayafas i bo baarî *athînjîri bara banene ba Ngai. Îgiitaani rîru Njoana wa Sakaria arî rwanda eewa kiugo kîa Ngai. 3 Njoana aariûnga gûntû kûra kunthe kwarî akubî na muuro wa Njorondani agîtûmagîîria akîîraga antû beerire meeyia maao ababaatithie, Ngai abarekere mo. 4 Kîroria Isaya aandîkîîte îbukuuni rîake auga,“Kayû ka muntû igagûtûmîîria rwanda gakiugaga,
‘Theriani njîra ya Mwathani,
rûngariani kûra agaakûrûkîîra!
5 Kaguuru konthe gakaathikwa kaganaanîrie,
irîma na tûrîma bikaaganaanîrua,
bibuanaane na tambararî.
Njîra îra nkîîgamu îkaarûngarua,
tûyîra tûra tûthûûku tûkaaganaanîrua.
6 Antû bonthe bakoona
bûra Ngai akoonokania.’ ”
7 Kîrîndî gîa antû i kîayîîte kûbaatithua i Njoana. Njoana abeera, “Rûciaro rûrû rwa njoka! N'ûû aabweniirie abwîra bwakuthûka mûthûûro wa Ngai ûra ûûyîîte? 8 Rûthagaani mantû mara makoonanagia na mma bûkwîrira meeyia meenu. Bûtikaathûgaanieni bûgaateethua i kuuga, ‘Tiû tûrî ba rûrîîyo rwa Îburaîmu,’ n'ûntû, ga nkûbwîra, Ngai nwa atuîkithie kinya maiga ta mama aana ba Îburaîmu! 9 Kathoka karî akubî gûkûûra mîtî na mîri mîene. Na mûtî unthe ûra ûtaciaraga rûciaro rwega ûgaakûûrwa ûgerwe mwankiini.”
10 Kîrîndî kîamûûria, “N'ata tûbatîîrue tûrûtha?”
11 Njoana abacookeria abeera, “Ûra arî na caati ciîrî nanenkere muntû ûra atarî n'yo îmwe. Na ûra arî na irio narûmie ûra atarî nabio.”
12 Arûngithia ûgooti bamwe bakûûya kîrî Njoana ababaatithia, bamûûria, “Mwarimû, n'ata tûbatîîrue tûrûtha?”
13 Njoana abeera, “Bûtigeetagieni ûgooti nkûrûki ya bûra bûbatîîrue bûrûngithia.”
14 Acikaarî nabo baûria Njoana, “N'ata naati tûbatîîrue tûrûtha?”
Njoana abeera, “Bûtigaatuunye muntû into biake na inya kana bûmûthitangîra mana. Ganagîrwani i mûcaara ûra bûgwataga.”
15 Antû ibeerîgagîîra mantû maanene matuîkîka. Baanjîîria kwîbûûria na nkoro kana waûmba kwîgua Njoana n'we aarî *Kîrîstû. 16 Njoana abacookeria abeera, “Niû ndîbûbaatithia na rûûyî. Îndî ûra aayîîte nyuma yakwa arî îgweta nkûrûki yakwa. Niû ningwa ntiagîrîte ûntû kinya mmûtharia ndigi cia iraatû biake. We akaabûbaatithia na Kîrundu Ûmûtheru na mwanki. 17 Nagwete ncûûgi na njara akîendaga kûthi rwaraani acûûga ngano ciake aiga îkûmbîîni, abîîthia maûngû na mwanki ûtakîora.”
18 Njoana naatûmagîîria antû mantû mangî maingî ma kûbeekîra wîru. 19 Aakaania mûnene Eronde amwîra atige gûkara na Erondia, mwekûrû wa mûruagina, na atige mantû mangî maathûûku mara aarûthaga. 20 Kûthûûkia mantû nkûrûki Eronde aagwatithia Njoana, na aaruta watho auga aingîrwe nceera.
Yiesû aabaatithua
21 Yiesû wana we aabaatithiirue antû bara bangî bonthe bakîbaatithua. Yiesû akîromba, îgûrû rîarugûka. 22 Kîrundu Ûmûtheru amwîndamîîra akari ta îcea. Kayû kauma îgûrû kauga, “Woû ûrî Mwana wakwa ûra mbendeete. Nûnkenagia mûno.”
Rûrîîyo rwa Yiesû Kîrîstû
23 Yiesû aanjîîria kûrutana arî na ûkûrû ta bwa mîanka mîrongo îthatû, aarî mwana wa Njosebu wa Eri (kûringana na bûra antû baathûgaanagia).
24 Eri aarî wa Mathati,
Mathati aarî wa Rawi,
na Rawi aarî wa Mereki.
Mereki aarî wa Yanai,
Yanai aarî wa Njosebu,
25 na Njosebu aarî wa Matathia.
Matathia aarî wa Amosi,
Amosi aarî wa Naumu,
na Naumu aarî wa Esiri.
Esiri aarî wa Nagai,
26 Nagai aarî wa Maathi,
na Maathi aarî wa Matathia.
Matathia aarî wa Semeini,
Semeini aarî wa Njoseki, na
Njoseki aarî wa Njunda.
27 Njunda aarî wa Yaanani,
Yaanani aarî wa Resa, na
Resa aarî wa Serubaberi.
Serubaberi aarî wa Searitieri,
Searitieri aarî wa Neri,
28 na Neri aarî wa Mereki.
Mereki aarî wa Andi,
Andi aarî wa Kosamu,
na Kosamu aarî wa Erimondamu.
Erimondamu aarî wa Eri,
29 Eri aarî wa Njosua,
na Njosua aarî wa Eriasari.
Eriasari aarî wa Njorimu,
Njorimu aarî wa Mathati,
na Mathati aarî wa Rawi.
30 Rawi aarî wa Simioni,
Simioni aarî wa Njunda,
na Njunda aarî wa Njosebu.
Njosebu aarî wa Njonamu,
Njonamu aarî wa Eriakimu,
31 na Eriakimu aarî wa Merea.
Merea aarî wa Mena,
Mena aarî wa Matatha,
na Matatha aarî wa Nathani.
Nathani aarî wa Ndaundi,
32 Ndaundi aarî wa Njesii,
na Njesii aarî wa Obendi.
Obendi aarî wa Mboasi,
Mboasi aarî wa Sarumoni,
na Sarumoni aarî wa Naasoni.
Aminandabu aarî wa Andimini,
na Andimini aarî wa Arini.
Arini aarî wa Esironi,
Esironi aarî wa Peresi,
na Peresi aarî wa Njunda.
34 Njunda aarî wa Njakubu,
Njakubu aarî wa Isaka,
na Isaka aarî wa Îburaîmu.
Îburaîmu aarî wa Tera,
Tera aarî wa Naori,
Serugi aarî wa Reu,
Reu aarî wa Peregi,
na Peregi aarî wa Eberi.
Eberi aarî wa Sera,
36 Sera aarî wa Kainani,
na Kainani aarî wa Aripakisandi.
Aripakisandi aarî wa Semu,
Semu aarî wa Nuu.
Nuu aarî wa Rameki,
37 Rameki aarî wa Methusera,
na Methusera aarî wa Enoki.
Enoki aarî wa Njarendi,
Njarendi aarî wa Maarareri,
na Maarareri aarî wa Kainani.
38 Kainani aarî wa Enos,
Enos aarî wa Sethi,
Sethi aarî wa Andamu,
na Andamu aarî wa Ngai.