MATHAYO
Rûrîîyo rwa Yiesû Kîrîstû
1
1 Rûrû i ru rûrîîyo rwa Yiesû Kîrîstû wa mûciî wa Ndaundi, wa rûciaro rwa Îburaîmu.2 Îburaîmu aarî îthe wa Isaka. Isaka aarî îthe wa Njakubu, na Njakubu aarî îthe wa Njunda na aruagina. 3 Njunda aarî îthe wa Peresi na Sera (gina wao eetagwa Tamari). Peresi aarî îthe wa Esironi, na Esironi aarî îthe wa Aramu. 4 Aramu aarî îthe wa Aminandabu, na Aminandabu aarî îthe wa Naasoni. Naasoni aarî îthe wa Sarimoni, 5 na Sarimoni aarî îthe wa Mboasi, (gina eetagwa Raabu). Mboasi aarî îthe wa Obendi (gina eetagwa Ruuthu). Obendi aarî îthe wa Njesii. 6 Njesii aarî îthe wa mûnene Ndaundi.
Ndaundi baaciara Soromoni barî na mûka wa muntû eetagwa Uria. 7 Soromoni aatuîka îthe wa Reoboamu, na Reoboamu aatuîka îthe wa Abiya. Abiya aarî îthe wa Asa, 8 na Asa aarî îthe wa Njeosafati, na Njeosafati aarî îthe wa Njoramu. Njoramu aarî îthe wa Usia. 9 Usia aarî îthe wa Njothamu, na Njothamu aarî îthe wa Aasi. Na Aasi aarî îthe wa Esekia, 10 na Esekia aarî îthe wa Manase, îthe wa Amoni. Amoni aarî îthe wa Njosia. 11 Njosia aaciara Njekonia na aruagina warîra Aisiraeri barî akubî kûthaamîrua Mbabironi.
12 Barî Mbabironi, Njekonia aaciara Searitieri, îthe wa Serubaberi. 13 Serubaberi aarî îthe wa Abiûndi, na Abiûndi aarî îthe wa Eriakimu ûra aarî îthe wa Asori. 14 Asori aarî îthe wa Sandoki ûra aarî îthe wa Akimû, îthe wa Eriundi. 15 Eriundi aarî îthe wa Eriasari ûra aarî îthe wa Mathani, îthe wa Njakubu. 16 Njakubu aarî îthe wa Njosebu, mûrûme wa Maria gina wa Yiesû Kîrîstû.
17 Kwoogu cionthe ciarî nciarwa îkûmi na inya, kuuma kîrî Îburaîmu mwanka kîrî Ndaundi. Na kuuma kîrî Ndaundi mwanka rîra baathaamîîrue Mbabironi, wanacio ciarî nciarwa îkûmi na inya. Na kuuma bakûthaamîrua Mbabironi mwanka rîra Kîrîstû aaciarirwe, wanacio ciarî nciarwa îkûmi na inya.
Gûciarwa kwa Yiesû Kîrîstû
18 Gûciarwa kwa Yiesû Kîrîstû gwakari ûûgû. Gina, Maria, agîkeethagua i Njosebu mbere ya bagûrana ooneka akamatîîte nda ya Kîrundu Ûmûtheru. 19 N'ûntû Njosebu aarî muntû ûmwagîru aathûgaania gûtiga Maria na witho n'ûntû ateendaga kûmwira îgi. 20 Njosebu wa akîthûgaanagîria mantû mamu, aaroota Mûraîka wa Mwathani akîaragia n'we akîmwîraga, “Njosebu wa mûciî wa Ndaundi, ûtikeegue ûguaya bwa kûthûkia Maria arî mwekûrû waku, n'ûntû nda înu arî n'yo n'ya Kîrundu Ûmûtheru. 21 Agaaciara kaana ga kaîyî ûgeete Yiesû,a n'ûntû n'we akoonokia antû baume meeyiani.”
22 Mantû mamu monthe maakarire ûgu kaingo mantû mara maariirue i Mwathani gûkûrûkîîra kanyuani ga kîroria maûyûra, rîra augire, 23 “Mwana wa mwarî akaagîa nda aciare kaana ga kaîyî geetwe Imanueri.” (Riîtwa rîru rîgîtaûrwa i ta kuuga “Ngai arî amwe naati”.) 24 Rîra Njosebu aûkire torooni, aarûtha wa bûra Mûraîka wa Mwathani aamwîrîîte. Aathûkia Maria arî mwekûrû wake. 25 Njosebu ataamaama na mwekûrû wake mwanka aamba aaciara kaana ga kaîyî, ageeta Yiesû.