Antû baûme baathi kûgonga Yiesû
2
1 Yiesû aaciarîîrwe taûni ya Bethireemu gîteere kîa Njundea, îgiita rîra Eronde aarî mûnene. Antû bamwe baûgîa baaya Njerusaremu baumîîte bwa mbarî ya uumîîro bwa riûa. 2 Baûrithîria, “Arîkû ûra aciarîîtwe atuîka mûnene wa Ayaundi? Twaya kûmûgonga n'ûntû itwonire nthata yumîîte bwa mbarî ya uumîîro bwa riûa îkîonanagia gûciarwa gwake.”3 Rîra mûnene Eronde aakinyîîrwe i mantû mamu eegua aatangîka mathûgaaniani maake. Na t'we wenka i Njerusaremu akubî yonthe. 4 Eeta *athînjîri bara banene ba Ngai na aarimû ba watho bonthe amwe, abaûria i nakû kweerirwe Kîrîstû agaaciarwa. 5 Bamwîra, “I taûni ya Bethireemu gîteereeni kîa Njundea, n'ûntû ûûgû i bu kwandîkîîtwe i kîroria,
6 ‘Woû, Bethireemu nthîgûrû ya Njunda,
naka na woû ûtirî mûkai kîrî atongoria ba Njunda,
n'ûntû ûkauma mûtongoria ûra akaatha
antû baakwa ba Isiraeri.’ ”
7 Mûnene Eronde eeta antû babu baûgî kayûri, abaûria rîra rîongwa nthata înu yonekire. 8 Abatûma Bethireemu abeera, “Îthiini bûcûnkûûne mantû ma kaana gaku. Bwakoona bûcookeere aaga bûkîîmmenyithia kaingo na niû nthi gûkagonga.”
9 Bakûrîîkia kwîgua bûra mûnene aabeerire, bauma agu baathi bûra baathiîte. Bakuuma, nthata îra booneete îrî bwa mbarî ya uumîîro bwa riûa yabatongoreeria kaîrî baathi mwanka yarûngama ara kaana kaarî. 10 Bakwona yarûngama baakena mûno. 11 Baathûngîra nyomba boona kaana kagwetwe i gina, Maria. Baaturia maru bakagonga, baarugûra biondo biao bakanenkera biewa bia thaabu, macoco, na manemane.b 12 Ngai abakaania kîrootooni abeera, “Bûtigaacookeere kwa mûnene Eronde kaîrî.” Kwoogu bakîînûka baacookire na njîra îngî.
Kaana kaathi kwithwa Miisiri
13 Ageni bakûthi, Njosebu aaroota Mûraîka wa Mwathani akîmwîraga, “Ûka ûthûkie kaana ûgakuthûkie amwe na gina, bûthi Miisiri bûkare noogo mwanka rîra ngaakwîra n'ûntû Eronde nagûcûa kaana gaka akaûraga.”
14 Njosebu agûûka aathûkia kaana na gina baathi bwa Miisiri. 15 Baakara noogo mwanka rîra Eronde aakuire, kaingo bûra Mwathani augire gûkûrûkîîra kanyuani ga kîroria bûûyûra. Augire, “I ndeetire mwana wakwa kuuma nthîgûrû ya Miisiri.”
Kûûragwa gwa twana
16 Mûnene Eronde aathûûra mûno akûmenya antû babu baûgî ibaamweneerie. Aatûma acikaarî, abaa watho bwa kûûraga twana twa twîyî tunthe tûra twakinyithîîtie mîanka îîrî kwîndama, tûra twarî Bethireemu na ntûûra ira ciarî akubî n'yo wa ta bûra aamenyithîîtue n'antû babu. 17 Mantû mara kîroria Njeremia aariirie maûyûra. Augire,
18 “Mbu n'îkwîguîka Rama,
kîrîro na kîîthikîîro kîînene,
Raeri akîrîrîra aana baake,
aarema gûkirakirîka,
n'ûntû batirî mwoyo.”
Gûcooka kuuma Miisiri
19 Eronde agûkua, Njosebu barî naagu Miisiri aaroota Mûraîka wa Mwathani akîmwîraga, 20 “Ûka ûthûkie kaana na gina bûcooke nthîgûrû ya Isiraeri n'ûntû bara bareendaga kûûraga mwana i baakuû.” 21 Njosebu aûka aathûkia mwana na gina baacooka Isiraeri. 22 Njosebu akwîgua Arikeraus, mwana wa Eronde, n'we aathanaga Njundea îthe agûkua, aakuthûka kûthi noogo. Ngai amûkaania kîrootooni athi bûngî, aathi bwa gîteere kîa Gariiri 23 taûni ya Nasareethi aatûûra noogo. Na i kaingo ntheto ira ciariirue i kîroria ciûyûra. Kîroria kîaugire, “Ageetagwa Mûnasareethi.”