NDANIERI
Mantû ma îbuku rîrî
Kûrî mantû maingî mara moonanagia Ndanieri nwe mwandîki wa îbuku rîrî; kinya ûkeegua kûrî na ndwaria ciingî ciaimbia i kwonania îbuku rîrî rîandîkirwe nyuma ya îgiita rîra kîîwîthîre kîonanagia.
Kwa wîthîrwe rîandîkirwe îgiita rîîkai mbere ya gûkua kwa Ndanieri arî Mbabironi na kagiita gaakai nyuma ya Sairas mûnene wa Pasia gûcinda na kûgwata taûni mwanka wa 539 MKA.
Arî muntû ûmwîthî, Ndanieri amwe na antû bara bangî ba Njundea ibairirwe Mbabironi naara aarutaga ngûgî gîkarooni kîa mûnene na aaneneua na mpwî n'ûntû bwa wîtîgio bwake bûûnene, mîtugo yake îmîega na kîewa gîake kuuma kîrî Ngai gîa gûtaûra irooto. Ûnene bwa Mbabironi bûkîgwa mwankaani wa 539 MKA, Ndanieri aarî mûtongoria ûra mûnene wa thirikaarî na n'amenyeere kaanya gaku arî ruungu rwa wathani bwa mûnene wa Pasia, ûra nyumaani eetîgîîrie Ayaundi gûcooka nthîgûrû yao mwankaani wa 538 MKA.
Îbuku rîrî, rîrî na icuncî biîrî: Kîa mbere i gîcuncî kîa rûgono rwa mantû mangî mwanya mwanya mathingateene makîonanagia mantû mara Ndanieri na acoore baake bathatû baakûrûkîîre barî Mbabironi kagiita ka wathani bwa Nebukandinesa, Mberisasa na Ndariasi (Gîcu. 1-6). Kagiitaani gaka konthe Ndanieri na acoore baake i boonaniirie wîtîgio bûûnene kîrî Ngai, na Ngai abaa ûûmbani bûûnene. 2. Kîa biîrî i kîa ûroria kîra kîrî na bioneki bithatû na ûroria bûûraaya bûra bworoteete mantû ma mûthiro wa nthîgûrû (Gîcu. 7-12).
Ndanieri oonanîîtie ûnene bwa Ngai îgûrû rîa mantû mara magûkarîka na bûra atûmagîra antû na mîgongo mûbangooni wake. Mîgongo îrî inya îîyaga na îgakûrûka, îndî Ngai n'atûûraga na nwabu agaatûûra kinya rîra mesia agaacinda ûthûûku bûra bûrî nthîgûrû na oonokie bara bamwîtîgîîtie.
Gwookubî îbuku rîrî rîkari ûûgû:
Ndanieri na acoore baake (1:1-6:28)
Kîoneki kîa nyamû inya (7:1-28)
Kîoneki gîa ntûrûme na mbûri (8:1-9:27)
Kîoneki kîa mûtûmwa kuuma îgûrû (10:1-11:45)
Kîoneki kîa îgiita rîa mûthia (12:1-13)