Kîoneki kîa Ndanieri gîa ntûrûme na nthenge
8
1 Mwankaani wa îthatû wa wathani bwa mûnene Mberisasa, niû Ndanieri indoonire kîoneki kîa biîrî. 2 Ndeeni ya kîoneki gîkî i ndeebonire ndî Susa mûciî mûnene wa gîteere kîa Eramu, na ndaarî îgombeeni rîa muuro wa Urai. 3 Ndaûkîîria meetho ndoona ntûrûme îrî na ngoci ciîrî îrûngi îgombeeni rîa muuro. Ngoci inu ciîrî ciarî indaaya îndî rûmwe i rwarî rûûraaya kîrî rûra rûngî kinya ûkeegua rwaumire nyumaani. 4 Ndoona ntûrûme înu îgîtûngana mbarî ya ûthwîro bwa riûa, bwa îgûrû, na bwa iti. Gûtirî nyamû îkîûmba kûmîrigîîria kana gûtuunyûkia kîra îgwete. Yarûthaga bûra îkwenda na yaagîa na inya mûno.5 Wa ndaithîîte, ndoona nthenge yauma bwa ûthwîro bwa riûa, îkeranîîtie nthîgûrû yonthe îthiîrîîte îgûrû îtagûtonga nthî. Nthenge îno n'yarî na rûgoci rûûnene gatîgatî ka meetho. 6 Yaaya yeerekerete ntûrûme îra yarî na ngoci ciîrî îra ndaambîîte kwona îgombeeni rîa muuro, na yamîerekera îrî na mûthûûro ûmûnene. 7 Ndoona yatûnga ntûrûme naaî mûno na yamîkûûra ngoci ira ciayo irî ciîrî. Ntûrûme îtaarî na inya ya gwîteethia, na nthenge yamîgwithia nthî na yamîkinyanga na gûtirî we waûmba gûtuunyûkia ntûrûme kuuma kîrî inya ya nthenge înu. 8 Rîru nthenge yathi mbere kwongeereka inya nkûrûki. Îndî rîra yaakinyiirie kathûmbîri ka inya yayo, rûgoci rwayo rûra rûnene rwaunîka na ngoci inya inene ciaumîîra ara rwarî na ciakûra cierekereete bwa mbarî inya cia nthî.
9 Na kagoci kaniini kaumîîra rûgociini rûmwe rwa inu inya, gaakûra karî na inya îînene keerekerete bwa naiti, uumîîro bwa riûa, na bwa nthî îra nthongi mûno. 10 Gaakûra mwanka geetia îgûrû ara kaanjîîrie ndûa na njûûrî ya îgûrû na kaarûkia nthî bamwe baao ta nthata na gaikinyangîra nthî. 11 Kagoci kaang'entera kinya mûnene wa njûûrî ya îgûrû na njîra ya kûthiria ûruti bwa kîgongwana kîra aarutagîrwa ntugû cionthe na kwînyangia kinya Nyomba ya Mwathani. 12 Na n'ûntû bwa ûthûûku kwingîa, njûûrî ya îgûrû amwe na igongwana bia kîra ntugû bieyanwa njaraani ciake, ûmma bwaringwa nthî na kagoci kaathi mbere kûûmbana mantûûni mara kaarûthaga. 13 Rîru ndeegua ûmwe ûmûtheru akîaria, na ûngî n'we ûmûtheru eera ûyu wa mbere, “I mwanka rî kîoneki gîkî gîkoneetie kîgongwana gîa kîra ntugû, amwe na ûthûûku bûbû, na kweyanwa kwa njûûrî ya îgûrû amwe na gûkinyangîrwa nthî kwa Nyomba ya Ngai gîgaakara oogo?” 14 Na amûcookeria amwîra, “Gîkaathûkia ma ûgoro na rûkîîrî ngiri ciîrî na magana mathatû, na kuuma agu Nyomba ya Ngai îgaacookanîîrua kaîrî.”
Mûraîka Ngaburieri aataûra kîoneki
15 Rîra niû Ndanieri, ndoonire kioneki i ndaageriirie gûkîerewa. Warîo, mbere yakwa kwarûngama ûra wonekaga akari ta muntû, 16 na ndeegua kayû ka muntû kuuma muurooni wa Urai geetana, “Ngaburieri, tetheeria muntû ûyu kwerewa kîoneki gîkî.” 17 Kwoogu aayanga akubî ara ndaarûûngi, akûnthengeera ndaamakire na ndaawa nthî na ûthiû. Îndî ambîîra. “Woû muntû, erewa ata rî, kîoneki gîkî i kîa îgiita rîa mûthia.”
18 Akîaragia naani woogu ndaagwatwa i toro înene ndagwa nthî na ûthiû, îndî Ngaburieri andingithia na ambûkîîria ndaarûngama. 19 Ambîîra, “Thikîîria na ngakwîra mantû mara magaatuîkîka îgiita rîra rîbangîîtwe rîa mûthia. Bûra wona bûgaatuîkîka îgiita rîa mûthia. 20 Ntûrûme îra wonire îrî na ngoci ciîrî, babu n'anene ba Mendia na Pasia. 21 Nthenge n'ûnene bwa Ngiriki, na rûgoci rûra rûrî gatîgatî ka meetho maayo i mûnene waayo wa mbere. 22 Ngoci inya ira ciaumire rûgoci rûra rûkuunwa, i moonene mana mara makaumîîra kuuma nthî îno îgaûkeene îndî matiîthîrwa marî na inya ta îra ya mbere.
23 “Mûthiani wa wathani bwao, rîra ûthûûku bûkeethîrwa bûkwingîa mûno, gûkaumîîra mûnene ûmwe arî na inya, ûmûthûûku na arî na ûbereera. 24 Akaagîa na inya ûtongoriani na akaarûtha wînyangia bwa kûmakania na aûmbane mantûûni mara akaarûthaga. Akaathiria aathani bara barî inya amwe na antû ba Ngai. 25 Agîtûmagîra njîra cia ûbereera agaatûma ûrongo bwingîa ruungu rwake, na ageekumia mûno. Akaathiria antû baingî batakûmenya na aûkîîre arûe na mûnene wa anene. Îndî akaathirua, na ti inya ya muntû îkaamûthiria. 26 Nakîo kîoneki kîa ma ûgoro na ma rûkîîrî i kîa mma. Îndî woû Ndanieri kira na mantû mama n'ûntû makaathûkia ntugû indaaya mbere matuîkîka.”
27 Kwoogu, niû Ndanieri, ndeegua ndaathirania cwe i mantû mamu na ndaamaama ndî mwayie ntugû inyiingî. Ndacooka ndaûkîîra ndaathi ngûgîîni ciakwa cia ûnene, îndî i ndaarî ûmwinyîîrie i kîoneki gîku na ntaamenyaga bûra gîkuuga.