Ndanieri aroombera antû baake
9
1 Mwankaani wa mbere wa wathani bwa mûnene Ndariasi mwana wa Asuerusu ûra aaciarîrîîtwe Mendia, na ûra aatuîkire mûnene wa Ambabironi, 2 ndeeni ya mwanka wa mbere wa wathani bwake, niû Ndanieri, i ndeereirwe kuumania na mabuku kûringana na kiugo kîa Mwathani kîra aete kîroria Njeremia atî kûgwa kwa Njerusaremu gûkaathiria mîanka mîrongo mûgwanja.3 Naani ndaagarûkîra Mwathani ngîceria îcookio gûkûrûkîîra maromba na ndaatîîrîra kûrîa irio na ndeekîra makunia ndaakara muuni. 4 Ndaaromba Mwathani Ngai wakwa na ndeerira meeyia nkiugaga,
“Îî Mwathani, ûrî Ngai ûmûnene na wa kûmakania, ûra waigaga kîrîîkanîro na ûrî wendo bûûnene kîrî bara bakwendeete na bamenyagîîra maathana maaku. 5 Itwîyîîtie na twarûtha mabîtia, twarûtha naaî, twaûmia biongo na twarûkîra maathana na mawatho maaku. 6 I twaregire kûthikîîria aruti ngûgî baaku iroria, bara baariirie riîtwani rîaku kîrî anene, atongoria na ba baaba beetû na antû bonthe ba nthî.”
7 “Mwathani, ûrî ûmwagîru, îndî tiû tûûyûrîîtwe n'îgi. Mantû mama i ma mma kîrî tiû tûrî Njundea, na Njerusaremu na Aisiraeri bonthe, bara barî akubî na bara wanyagaariirie nthî cia kûraaya n'ûntû bwa kûrega wîtîgîka wetû kîrî woû. 8 Îî Mwathani îgi rîrî îgûrû rîetû, anene, atongoria, na ba baaba beetû n'ûntû itûkwîyîrîîtie. 9 Woû Mwathani, Ngai wetû gûûyûrîîtwe i kîao na kûrekanîra kinya ûkeegua i tûkûûmîrîîtie biongo, 10 na tûtiathîkîrîte kayû ka Mwathani Ngai wetû na njîra ya kûthingata mawatho mara aatwere gûkûrûkîîra aruti ngûgî baake iroria.”
11 Aisiraeri bonthe i babîtîîtie bauna watho bwaku baagarûka na baarega kwathîkîra kayû gaaku. Kwoogu îîndî irumi na miuma îra yandîkîîtwe wathooni bwa Musa mûruti ngûgî waku woû Ngai, i biîtûûrîîtwe îgûrû rîetû, n'ûntû Itûkwîyîrîîtie 12 N'ûrikithîîtie bûra waugire ûkaarûtha kîrî tiû na atongoria beetû na njîra ya gûtûreetera kînyamaara. Bûra kwarûthirwe Njerusaremu bûtaarorûthîka kaîrî kîrî taûni nwa îrîkû nthîgûrû. 13 Wa ta bûra kwandîkîîtwe wathooni bwa Musa, kînyamaara gîkî kîonthe gîgûtûûyîîra. Îndî amwe na ûûgû tûtirombeete Mwathani Ngai wetû atûrekera meeyia meetû na tûthingata ûmma bwake. 14 Kwoogu Mwathani nwabangîîte gûtwa nthînje, na warûtha bu n'ûntû rîonthe Mwathani Ngai wetû ûrûthaga bûra kûbatîîrue, naati tûtaathîkîra kayû gaaku. 15 Îîndî, Mwathani Ngai wetû, woû waarutire antû baaku kuuma nthî ya Miisiri na njara yaku ya inya na watûma riîtwa rîaku rîkumithua mwanka îmunthî, tûriuga itwîyîîtie na twarûtha mabîtia. 16 Îî Mwathani, kûringana na mîrûthîre yaku ya ûtheru, tûrîkûromba ûrutarute mûthûûro na marûrû biume Njerusaremu mûciî waku, kîrîma gîaku kîîtheru. Na n'ûntû bwa meeyia meetû na ma ba baaba, Njerusaremu na antû baaku batuîkîîte gîntû gîa kûmenagîîrua n'atûûri beetû. 17 Îîndî Ngai wetû, thikîîria îromba na gûkaya kwa mûruti ngûgî waku, n'ûntû bwa ûkumio bwa riîtwa rîaku, Mwathani, îgîîrua nyomba yaku kîao kaîrî îra yenyangiirue. 18 Matû maaku i manthikîîrie, Îî Mwathani wakwa. Meetho maaku i maraithîîrie moone kûragaragua wa taûni îra îgwetanîrîîtue na riîtwa rîaku. Tûtigûkûretera makaya meetû n'ûntû tûrî baatheru, îndî n'ûntû bwa kîao gîaku kîînene. 19 Îî Mwathani, thikîîria, Îî Mwathani, tûrekere, Îî Mwathani, n'ûntû bwa ûkumio bwa riîtwa rîaku, thikîîria na ûrûthe ûûgû ûtagûkarakara, n'ûntû taûni îno na antû baaku beetanîrîîtue na riîtwa rîaku!
Mûraîka Ngaburieri ataûra ûroria bwa biumia mîrongo mûgwanja
20 Wa nkîaragia woogu, nkîrombaga na nkîîriraga meeyia maakwa na ma antû baakwa Isiraeri, amwe na kweyana makaya maakwa kîrî Mwathani Ngai wakwa n'ûntû bwa kîrîma gîake kîra kîtheru, 21 nkîrombaga woogu, muntû woora Ngaburieri, ûra ndaarî nkwona mbere kîonekiini gîakwa, aaya endamîîte na mpwî îgiita rîa kûruta kîgongwana kîa ûgoro. 22 Akûûya ambîîra, “Ndanieri, ndaaya gûkwa ûûme na wooti bwa kûmenya mantû. 23 Rîra wambîîrie maromba maaku, i rîo îcookio rîeyanirwe na îîndî ka ndaaya gûkwîra rîo, n'ûntû n'wendeetwe mûno. Kwoogu îîndî thikîîria bwega mûno na ûgwate mantû ma kîoneki gîaku.”
24 “Biumia mîrongo mûgwanja biaigîîtwe n'ûntû bwa antû baaku na taûni întheru. Îgiita rîru i rîa kûthiria mabîtia, meeyia, na i rîa kwîtheria n'ûntû bwa moothûûku, kûreeta ûtheru, gwîkîra kîoneki na ûroria kîrore, na waka maguta Bantû Ara Atheru Mûno. 25 Kwoogu îîndî menya na ûgwate bwega. Kuuma kagiita kara îcookio rîarutirwe rîa gwaka na gûcookanîîria Njerusaremu mwanka rîra Mwîtûûrîrua maguta akaaya, gûkeethîrwa kûrî na biumia mûgwanja, na bantû a biumia mîrongo îthanthatû na biîrî Njerusaremu îgaakwa kaîrî na barabara inthongi na nthingo indito cia ûkaria, îndî gûgaakwa îgiitaani rîa thîîna. 26 Nyuma ya biumia bibu mîrongo îthanthatû na biîrî, Mwîtûûrîrua maguta agaateegwa na atiîthîrwa akûrûtha ûntû, na njûûrî ya mûnene ûra ûkaaya îkenyangia taûni na bantû ara atheru. Mûthia wayo ûkaaya ta mûguû wa rûûyî ûreteete mûthiro ta bûra Mwathani abaangîîte. 27 Mûnene ûyu akaarûtha kîrîîkanîro na baingî bantû a kiumia kîmwe, îndî îgiitaani rîa nucu ya îgiita rîru, agaatigithia ûruti bwa biewa na igongwana. Bantû ara atheru Nyomba ya Ngai gûkaarûngîkwa mûbuanaano ûra ûreetaga wînyangia ûra ûgaakara oogo mwanka îgiita rîra rîaigîîtwe i Ngai rîa kûthiria ûra ûcuaigîîte oogo.”