Ndanieri 10

Îtheta rîa mîgongo na mainya ma îgûrû

1 Mwankaani wa îthatû wa wathani bwa mûnene Sairas wa Pasia, Ndanieri ûra kaîrî eetagwa Mberitesasa n'agwûrîîrue ûntû bwegiî ndûa îînene na kwerewa kwa bu aakugwatire gûkûrûkîîra kîoneki. 2 Kagiitaani gaku niû, Ndanieri, i ndaarîrîîte bantû a biumia bithatû. 3 Ndeeni ya biumia bibu bithatû, ntaarîîte irio biega, na gûtirî nyama kana ndibei biathûngîrîîte kanyua gaakwa, na nteebakîîte kinya maguta. 4 Ntugû ya mîrongo îîrî na inya cia mweri wa mbere, ndûûngi îkumbo rîa muuro ûmûnene, ûra wîtagwa Tigiris, 5 ndaûkîîria meetho ndoona muntû weekîrîîte nguo ya gatani, na kauna gaake oogeete mûcibi wa thaabu îra nkembe mûno ya kuuma Ufasi. 6 Mwîrî wake wakari ta kiricorite, na ûthiû bwakari ta rweni, meetho maakari ta ndûmûrî cia iciinka, njara ciake na magûrû biakari ta makengi ma rûthuku rûûkire, na kayû ka rwaria rwake gaakari ta îgondoka rîa ntundu îînene ya antû. 7 Niû, Ndanieri, i niû ndoonire kîoneki gîkî ndî ninka, n'ûntû antû bara twarî nabo i baarî bakûgwatwa i kîmako mûno na baugia kwîbitha. 8 Kwoogu, ndaatigirwe ninka nkîîbonagîra kîoneki gîkî gîa kwamia. Ndaathirîîrwe n'inya na mwîrî wakwa wagarûka kûrû, na ndaathirîrwa n'inya kûrû. 9 Ndaacooka ndeegua kayû ka mîgambo yake, na rîra ndeegiirue kayû ka mîgambo yake ndaagwatwa i toro înene, ndawa nthî na ûthiû.

10 Warîru njara yandingithia ndainaina. Ndaaturia maru ndaagwata nthî na njara. 11 Ambîîra, “Ndanieri, woû wendeetwe mûno, thikîîria bwega mîgambo îra nthiîte gûkwarîria. Rûngama bwega na magûrû maaku n'ûntû îîndî gantûmîîtwe kîrî woû.” Kwoogu, wa akîmbaragîria mîgambo îno, ndaarûngama nkiinainaga. 12 Ambîîra, “Ndanieri tiga kûmaka, n'ûntû kuuma ntugû îra wendire kûmenya mantû mama na wenyiia mbere ya Ngai waku, mîgambo yaku n'îeguirwe na n'yo îtûmîîte mbûya. 13 Îndî mûnene wa ûnene bwa Pasia i bu bwandigîîrie bantû a ntugû mîrongo îîrî na îmwe. Kwoogu, i Mikaeri ûmwe wa araîka bara banene, n'we araayire gûnteethia, na ndaramûtigire noogo barî na mûnene wa Pasia. 14 Niû ndaaya gûgûteethia kûmenya bûra gûgaakarîka kîrî antû baaku ntugûûni cia mûthia. Kîoneki gîkî kîrîonania mantû ma ntugû ikaaya.”

15 Akûmbîîra ntheto ino, ndeenîka ûthiû bwakwa nthî na ndaaga mîgambo ya kwaria. 16 Rîru ûmwe ûra aarî ndeeni ya mwîrî wa kîîmuntû aandingithia mîromo yakwa na ndaarugûra kanyua na ndaaria, na ndamwîra, “Mwathi wakwa, kîoneki gîkî i kîmbîkîrîîte ûrûrû na ndaaga inya. 17 N'ata niû mûruti ngûgî waku mbûmba kwaria naawe mwathi wakwa? N'ûntû ga nkwinaina na gûtirî inya ntigeerie, na ntirî na mîruke îîngî.”

18 Kaîrî ûra aakari ta muntû andingithia na ambîkîra inya. 19 Ambîîra, “Menya ûmaka, woû mwende mûno, ûkiri bûrookara naawe. Gîta inya na ûûmîîrie!” Akwaria naani ndeegua ndî na inya na ndauga, “Ka mwathi wakwa aarie n'ûntû ûkûmbîkîra inya.” 20 Acooka auga, “N'ûkûmenya i mbi n'ûntû ndaaya kîrî woû? Îîndî nwa mwanka ncooke nkarûe na mûnene wa Pasia, na rîra nkaarîîkania n'we, mûnene wa Ngiriki n'we akaaya. 21 Îndî nwa mwanka nkwîre mara maandîkîîtwe Îbukuuni rîa Ûmma. Gûtirî ûngî ndî n'we wa gûnteethia kûrûa na anene baba tatiga Mikaeri mûnene waku.”